 |
ທ່ານ ພອຍຄຳ ຮຸ່ງບຸນຍວງ ໄດ້ລາຍງານຫຍໍ້ກ່ຽວກັບສະພາບຈຸດພິເສດຂອງແຂວງ, ການນຳພາ-ຊີ້ນຳ ຈັດຕັ້ງປະຕິບັດວຽກງານຮອບດ້ານ ໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ ຊຶ່ງພາຍໃຕ້ການນຳພາ-ຊີ້ນຳຂອງພັກ-ລັດຖະບານ, ຄະນະພັກ ຄະນະກຳມະການປົກຄອງແຂວງ, ສະພາປະຊາຊົນແຂວງ ໄດ້ສຸມທຸກຄວາມພະຍາຍາມນຳພາ-ຊີ້ນຳ ພັດທະນາແຂວງໄຊສົມບູນ ຢ່າງຮອບດ້ານ, ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ສຸມໃສ່ຈັດຕັ້ງປະຕິບັດ 6 ເປົ້າໝາຍໃຫຍ່ ໃນການພັດທະນາພື້ນຖານໂຄງລ່າງເສດຖະກິດ-ສັງຄົມ ຕາມ 5 ທ່າແຮງ, ເອົາໃຈໃສ່ນຳພາຄຸ້ມຄອງການລົງທຶນຂອງລັດ, ການລົງທຶນຂອງພາກເອກະຊົນທັງພາຍໃນ ແລະ ຕ່າງປະເທດ ໃຫ້ເຄື່ອນໄຫວຖືກຕ້ອງຕາມກົດໝາຍ, ລະບຽບການ ແລະ ສັນຍາ, ປັດຈຸບັນ ມີໂຄງການລົງທຶນທັງໝົດ 180 ໂຄງການ, ຂັ້ນສູນກາງຄຸ້ມຄອງ 39 ໂຄງການ ແລະ ຂັ້ນແຂວງຄຸ້ມຄອງ 141 ໂຄງການ, ໄດ້ຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ, ການສົ່ງເສີມການປູກຝັງ-ລ້ຽງສັດ, ໄດ້ສຸມໃສ່ຄຸ້ມຄອງ, ປັບປຸງ ແລະ ກໍ່ສ້າງເສັ້ນທາງຄົມມະນາຄົມໃນທົ່ວແຂວງ ຢ່າງເປັນປົກກະຕິ; ຂົງເຂດວັດທະນະທຳ-ສັງຄົມ ໄດ້ເອົາໃຈໃສ່ປັບປຸງລະບົບການຮຽນ-ການສອນ, ວຽກງານບໍລິຫານຄຸ້ມຄອງການສຶກສາ ແລະ ກິລາ ທຸກລະດັບ, ຍົກລະດັບການປິ່ນປົວສຸຂະພາບຂອງໂຮງໝໍແຂວງ, ໂຮງໝໍເມືອງ ແລະ ສຸກສາລາ ໃຫ້ມີຄຸນນະພາບດີຂຶ້ນ, ປົກປັກຮັກສາ ແລະ ເສີມຂະຫຍາຍວັດທະນະທຳ, ຮີດຄອງປະເພນີອັນດີງາມຂອງຊາດ, ຂອງປະຊາຊົນບັນດາເຜົ່າ ຕິດພັນກັບການທ່ອງທ່ຽວ, ນຳພາສ້າງຄອບຄົວ ແລະ ບ້ານວັດທະນະທຳ ບັນລຸຕາມແຜນການທີ່ວາງໄວ້; ສຳເລັດການສ້າງຕັ້ງຕາແສງ ເຊິ່ງທົ່ວແຂວງມີທັງໝົດ 14 ຕາແສງ; ນຳພາຢ່າງແຂງແຮງ ວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແລະ ແກ້ໄຂຄວາມທຸກຍາກຂອງປະຊາຊົນ ຕາມ 4 ເນື້ອໃນ 4 ຄາດໝາຍ, ໄດ້ເອົາໃຈໃສ່ປະຕິບັດແຜນການຮ່ວມມືກັບປະເທດເພື່ອນມິດຍຸດທະສາດ ໂດຍສະເພາະແມ່ນ ສສ ຫວຽດນາມ ແລະ ສປ ຈີນ ເພື່ອຍາດແຍ່ງເອົາການຊ່ວຍເຫຼືອ ແລະ ດຶງດູດການລົງທຶນເຂົ້າມາພັດທະນາ ແຂວງໄຊສົມບູນ.
 |
ໂອກາດນີ້, ທ່ານ ນາງ ວຽງທອງ ສີພັນດອນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຢ່າງຮອບດ້ານ ທີ່ຍາດມາໄດ້ ພ້ອມທັງໄດ້ເນັ້ນໜັກໃຫ້ສືບຕໍ່ກຳແໜ້ນວຽກງານສຶກສາອົບຮົມການເມືອງ-ແນວຄິດ, ເພີ່ມທະວີຄວາມສາມັກຄີພາຍໃນພັກ ໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ, ເພີ່ມທະວີການນຳພາຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ, ສືບຕໍ່ເຮັດວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ, ປັບປຸງລະບົບການເມືອງ, ຍົກສູງບົດບາດການນຳພາຂອງພັກ ໃຫ້ເປັນແກນນຳ ທຸກຂົງເຂດວຽກງານຢ່າງແທ້ຈິງ, ນຳພາ-ຊີ້ນຳວຽກງານກວດກາ, ກວດສອບໃຫ້ແທດເຖິງກວ່າເກົ່າ, ຈັດຕັ້ງປະຕິບັດມາດຕະການປ້ອງກັນ-ສະກັດກັ້ນ, ຄວບຄຸມ ແລະ ແກ້ໄຂບັນຫາການຕັດໄມ້, ທຳລາຍປ່າ ຢ່າງຕັ້ງໜ້າ, ຊຸກຍູ້ ສົ່ງເສີມປະຊາຊົນຜະລິດກະສິກຳ ບຸກບືນພັດທະນາຕົນເອງ ຕາມທິດຜະລິດເປັນສິນຄ້າໃຫ້ຫຼາຍຂຶ້ນ ຢ່າງບໍ່ຢຸດຢັ້ງ.
ຂ່າວ: ສີລິພອນ ສົງຄຳ
ຄໍາເຫັນ