 |
ທ່ານ ເດວິດ ຣີດ ໄດ້ລາຍງານສະພາບລວມໂດຍສັງເຂບ ການດຳເນີນງານຂອງບໍລິສັດ ພູເບ້ຍ ມາຍນິງ ຈຳກັດ ໃນໄລຍະຜ່ານມາ ຊຶ່ງບໍລິສັດ ໄດ້ດໍາເນີນງານຮ່ວມມືກັບລັດຖະບານລາວ ມາເປັນເວລາຍາວນານ ພາຍໃຕ້ສັນຍາ ວ່າດ້ວຍການສຳຫຼວດ ແລະ ຜະລິດແຮ່ທາດ. ມາເຖິງປັດຈຸບັນ ພາຍໃນຂອບເຂດສຳປະທານຂອງບໍລິສັດ ໄດ້ດຳເນີນ 2 ໂຄງການຄື: ໂຄງການຫ້ວຍຊາຍ ບ້ານຫ້ວຍຊາຍ ແລະ ໂຄງການພູຄຳ ບ້ານນໍ້າຍອນ ຊຶ່ງໂຄງການຫ້ວຍຊາຍ ໄດ້ປຸງແຕ່ງຄຳ-ເງິນ ແທ່ງປະສົມ ໄດ້ເລີ່ມດຳເນີນມາຕັ້ງແຕ່ປີ 2012 ແລະ ຄາດວ່າຈະຂະຫຍາຍໄປໄດ້ຈົນເຖິງ ປີ 2034 ຕາມແຜນອາຍຸການຂອງໂຄງການ; ສ່ວນໂຄງການພູຄຳ ຜະລິດຄຳ-ທອງ ໄດ້ເລີ່ມດຳເນີນມາຕັ້ງແຕ່ປີ 2008 ເປັນຕົ້ນມາ, ທາງບໍລິສັດ ໄດ້ປະກອບສ່ວນ 1.25 ຕື້ ໂດລາ ໃນການເສຍພັນທະອາກອນ, ຄ່າຊັບພະຍາມກອນແຮ່ທາດ ແລະ ເງິນປັນຜົນ ໃຫ້ແກ່ລັດຖະບານ, ໄດ້ປະກອບສ່ວນພັດທະນາເສດຖະກິດ-ສັງຄົມໂດຍທາງອ້ອມ ດ້ວຍການຈັດຊື້ ຫຼາຍກວ່າ 3.8 ຕື້ ໂດລາ, ພັດທະນາຊຸມຊົນທາງດ້ານການສຶກສາ, ສາທາ, ພື້ນຖານໂຄງລ່າງ ແລະ ຊີວິດການເປັນຢູ່ ໂດຍຜ່ານກອງທຶນພັດທະນາຊຸມຊົນ ທີ່ໄດ້ເຊັນສັນຍາຮ່ວມກັນກັບອົງການປົກຄອງແຂວງ ໄຊສົມບູນ ຄິດໄລ່ເປັນເງິນ 750,000 ໂດລາຕໍ່ປີ, ນອກນີ້ ຍັງໄດ້ຊ່ວຍສ້າງຄວາມເຂັ້ມແຂງໃຫ້ແກ່ຂະແໜງບໍ່ແຮ່ ໂດຍຜ່ານການຝຶກອົບຮົມ ແລະ ຖອດຖອນບົດຮຽນຈາກຕ່າງປະເທດສູ່ພະນັກງານຄົນລາວ, ປັດຈຸບັນ ພະນັກງານພາຍໃນບໍລິສັດ ມີທັງໝົດ 3,000 ພັນກວ່າຄົນ, ຄົນລາວກວມເອົາ 93% ຂອງຈຳນວນພະນັກງານທັງໝົດ.
 |
ທ່ານ ນາງ ວຽງທອງ ສີພັນດອນ ໄດ້ຮຽກຮ້ອງມາຍັງບໍລິສັດ ພູເບ້ຍ ມາຍນິງ ຈຳກັດ ຈົ່ງສືບຕໍ່ຊຸກຍູ້, ຊ່ວຍເຫຼືອແຂວງ ໃຫ້ປະຊາຊົນບັນດາເຜົ່າໃນທົ່ວແຂວງ ໄດ້ເຂົ້າເຖິງການສຶກສາ ແລະ ເຂົ້າເຖິງການບໍລິການດ້ານສາທາລະນະສຸກຢ່າງທົ່ວເຖິງ, ສືບຕໍ່ການພັດທະນາອະນຸລັກຮັກສາສິ່ງແວດລ້ອມ ແລະ ຊອກຫາພະລັງງານທົດແທນຄືນເຊັ່ນ: ດິນ, ນໍ້າ ແລະ ອື່ນໆ, ຍົກລະດັບຄຸນນະພາບຂອງແຮງງານຄົນລາວ ແລະ ຮັບເອົາຄົນໃນທ້ອງຖິ່ນເຂົ້າມາເປັນພະນັກງານຂອງບໍລິສັດ ໃຫ້ຫຼາຍຂຶ້ນ ເພື່ອໃຫ້ເຂົາເຈົ້າມີລາຍຮັບເຂົ້າສູ່ຄອບຄົວ ເພື່ອພັດທະນາຊີວິດການເປັນຢູ່ຂອງເຂົາເຈົ້າ ໃຫ້ດີຂຶ້ນເທື່ອລະກ້າວ.
ຂ່າວ: ຮົວຈັ້ງ ດຣາເຊັ້ງ
ຄໍາເຫັນ