 |
ທ່ານ ພົຈວ ຫຸມພັນ ຜິວເຂັມພອນ ໄດ້ຍົກໃຫ້ເຫັນມູນເຊື້ອວິລະກໍາວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນແຂວງຊຽງຂວາງ, ວັນວິລະກໍາໂຕນຄຸກຢ່າງມະຫັດສະຈັນຂອງບັນດາຜູ້ນໍາພັກ-ແນວລາວຮັກຊາດ ແມ່ນໄຊຊະນະອັນໃຫຍ່ຫຼວງຂອງກໍາລັງປະກອບອາວຸດ ພາຍໃຕ້ການນໍາພາຂອງພັກ, ເປັນເຫດການປະຫວັດສາດອັນສໍາຄັນຂອງຊາດ-ຂອງພັກ, ຂອງກອງທັບ ແລະ ເປັນບົດຮຽນອັນລໍ້າຄ່າທີ່ສຸດໃຫ້ຂະບວນຕໍ່ສູ້ຂອງກອງທັບ ແລະ ປະຊາຊົນເຮົາຍາດເອົາໄຊຊະນະໃນໄລຍະຕໍ່ມາ ເພື່ອເປັນການໂຄສະນາສຶກສາອົບຮົມໃຫ້ຄະນະພັກ-ຄະນະບັນຊາ, ນາຍ ແລະ ພົນຕໍາຫຼວດ ກົມໃຫຍ່ການເມືອງ ປກສ ມີຄວາມຮັບຮູ້ເຂົ້າໃຈມູນເຊື້ອ 2 ວັນດັ່ງກ່າວ ທັງເປັນການເສີມຂະຫຍາຍທາດແທ້-ມູນເຊື້ອປະຕິວັດທີ່ມີຄວາມອົງອາດກ້າຫານ, ມີນໍ້າໃຈຮັກຊາດອັນເດັດດ່ຽວໜຽວແໜ້ນບໍ່ຍອມຈຳນົນ ແລະ ຜົນງານໄຊຊະນະອັນໃຫຍ່ຫຼວງຂອງກໍາລັງປະກອບອາວຸດ.
 |
ໃນພິທີ, ທ່ານ ພັອ ວັນນະເລດ ບຸດຕະວົງ ຫົວໜ້າຫ້ອງການເມືອງໄດ້ຜ່ານບົດສະຫຼຸບຕີລາຄາການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2024 ແລະ ທິດທາງແຜນການປີ 2025; ຜ່ານແຈ້ງການຂອງກົມໃຫຍ່ການເມືອງ ປກສ ເລື່ອງການສ້າງໜ່ວຍພັກກົມກອງຕົວແບບພາຍໃນພັກແຕ່ລະຂັ້ນ; ຜ່ານຂໍ້ຕົກລົງຂອງກະຊວງ ປກສ ວ່າດ້ວຍການແຕ່ງຕັ້ງນາຍຕໍາຫຼວດທີ່ຂຶ້ນກັບກົມໃຫຍ່ການເມືອງ ປກສ. ໃນນີ້, ທ່ານລັດຖະມົນຕີກະຊວງ ປກສ ຕົກລົງແຕ່ງຕັ້ງທ່ານ ພັອ ນາງ ຈັນທີ ເນົາວະລາດ ເປັນຫົວໜ້າກົມປະກັນສັງຄົມ ກົມໃຫຍ່ການເມືອງ ປກສ; ຜ່ານມະຕິຕົກລົງຂອງຄະນະພັກກະຊວງ ປກສ ວ່າດ້ວຍການຮັບຮອງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2024 ໂດຍຮັບຮອງເອົາ 20 ໜ່ວຍພັກກົມໃຫຍ່ການເມືອງ ປກສ ເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2024 ໃຫ້ກຽດມອບໃບຢັ້ງຢືນໂດຍທ່ານ ພົຈວ ຫຸມພັນ ຜິວເຂັມພອນ. ໃນພິທີຕາງໜ້າ 19 ກົມກອງຂຶ້ນຈັບມືແຂ່ງຂັນກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃນປີຕໍ່ໜ້າ.
ທີ່ມາ: ປ້ອງກັນຄວາມສະຫງົບ
ຄໍາເຫັນ