ຂຶ້ນໃນວັນທີ 1 ພະຈິກນີ້ ທີ່ທະນາຄານດັ່ງກ່າວ ໂດຍການເປັນກຽດປາຖະກະຖາຂອງທ່ານ ບຸນສົງ ສົມມາລາວົງ ພະນັກງານອາວຸໂສບຳນານ ທຫລ,ມີທ່ານນາງ ຂັນແກ້ວ ຫຼ້າມະນີເງົາ ຮອງຜູ້ວ່າການ ທຫລ, ມີພະນັກງານອາວຸໂສບຳນານ, ພະນັກງານ-ລັດຖະກອນທົ່ວຂະແໜງການທະນາຄານ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນສົງ ສົມມາລາວົງ ໄດ້ຍົກໃຫ້ເຫັນມູນເຊື້ອປະຫວັດການກໍາເນີດທະນາຄານຢູ່ເຂດປົດປ່ອຍໄລຍະປີ 1968;ຄວາມໝາຍ-ຄວາມສໍາຄັນໃນການສ້າງຕັ້ງທະນາຄານ, ສະພາບການປ່ຽນເງິນໃນລະບອບເກົ່າ ເປັນເງິນກີບປົດປ່ອຍ ຊຶ່ງການກຳເນີດຂະຫຍາຍຕົວທະນາຄານ ແມ່ນມີຄວາມໝາຍສຳຄັນທາງດ້ານປະຫວັດສາດ ແລະ ໃນຂະບວນວິວັດແຫ່ງການຂະຫຍາຍຕົວຂອງລະບົບເງິນຕາ ແລະ ຂະແໜງທະນາຄານໃນປະເທດເຮົາ, ມັນແມ່ນໝາກຜົນຂອງການຕໍ່ສູ້ກູ້ຊາດ ເພື່ອຄວາມເປັນເອກະລາດ, ເປັນເຈົ້າຕົນເອງ, ເປັນຂີດໝາຍແຫ່ງການເຕີບໃຫຍ່ຂະຫຍາຍຕົວຂອງການປະຕິວັດ. ຂະແໜງການທະນາຄານໄດ້ຖືກໍາເນີດຂຶ້ນໃນໄລຍະເວລາທີ່ປະເທດຊາດຢູ່ໃນສະພາວະຄວາມຫຍຸ້ງຍາກ ເປັນໄລຍະແຫ່ງການຕໍ່ສູ້ກູ້ຊາດຕ້ານການຮຸກຮານຂອງຈັກກະພັດຕ່າງດ້າວຢ່າງເປັນຂະບວນຟົດຟື້ນຂອງປະຊາຊົນລາວບັນດາເຜົ່າ. ໃນເວລານັ້ນ, ສະພາບເສດຖະກິດໃນເຂດປົດປ່ອຍຢູ່ປະເທດເຮົາຍັງຫຼ້າຫຼັງ, ການຜະລິດກໍພຽງເພື່ອກຸ້ມຕົນເອງ, ໃນຂະນະທີ່ຂະແໜງທະນາຄານ ກໍຄືຄັງເງິນໃນເມື່ອກ່ອນໄດ້ເຮັດໜ້າທີ່ຢ່າງຕັ້ງໜ້າໃນການປະກອບສ່ວນສະໜັບສະໜູນຂະບວນການປະຕິວັດຊາດ ເພື່ອປົກປັກຮັກສາ ແລະ ສ້າງສາພັດທະນາເສດຖະກິດຂອງປະເທດຊາດໃຫ້ມີຄວາມເຂັ້ມແຂງ. ຕໍ່ໜ້າສະພາບການດັ່ງກ່າວນັ້ນເພື່ອຕອບສະໜອງຕໍ່ຄວາມຮຽກຮ້ອງຕ້ອງການຂອງພາລະກິດຕໍ່ສູ້ປົດປ່ອຍຊາດ ແລະ ເຮັດສຳເລັດໜ້າທີ່ໃນການປະຕິວັດຊາດປະຊາທິປະໄຕໃນຂອບເຂດທົ່ວປະເທດ ໂດຍສະເພາະແມ່ນການສ້າງເງື່ອນໄຂເອື້ອອໍານວຍໃນການພັດທະນາເສດຖະກິດ-ການເງິນໃຫ້ມີຄວາມເຂັ້ມແຂງ, ສາມາດປະກອບສ່ວນທຶນຮອນເຂົ້າໃນການຊຸກຍູ້ການຜະລິດ ແລະ ຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນເປັນກ້າວໆ, ໃນໄລຍະນີ້ເອງໄດ້ເປັນຈຸດເລີ່ມຕົ້ນໃນການສ້າງຕັ້ງ ທະນາຄານໂດຍແບ່ງເຫດການອອກເປັນແຕ່ລະໄລຍະ ເລີ່ມແຕ່ກອງປະຊຸມຄົບຄະນະຂອງສູນກາງພັກປະຊາຊົນລາວ ຄັ້ງທີ 3 ສະໄໝທີ I ໃນເດືອນ 3 ປີ 1966. ພ້ອມນີ້, ຍັງຍົກໃຫ້ເຫັນຄວາມຈໍາເປັນໃນການປະຕິຮູບລະບົບທະນາຄານຂັ້ນໜຶ່ງ ເປັນທະນາຄານສອງຂັ້ນ ແລະ ການເຄື່ອນໄຫວວຽກງານຫຼັງຈາກການປະຕິຮູບ; ສົມທຽບການບໍລິຫານງານໃນເມື່ອກ່ອນກັບໄລຍະໃໝ່ ຫຼືປັດຈຸບັນ.
ການປາຖະກະຖາໃນຄັ້ງນີ້, ເພື່ອໃຫ້ສະມາຊິກພັກ-ພະນັກງານຮຸ່ນຫຼັງຂອງຂະແໜງທະນາຄານໄດ້ເຊື່ອມຊຶມມູນເຊື້ອປະຫວັດຄວາມເປັນມາ ກໍຄືຜົນງານເຄື່ອນໄຫວຂອງຂະແໜງທະນາຄານຕະຫຼອດໄລຍະເວລາ 56 ປີຜ່ານມາ, ພ້ອມທັງເປັນການປຸກລະດົມຄວາມສາມັກຄີອັນແໜ້ນແຟ້ນສະຕິປັນຍາອັນສະຫຼາດສ່ອງໄສ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມໜ້າທີ່ໆໄດ້ຮັບມອບໝາຍໃຫ້ມີໝາກມີຜົນສຳເລັດເປັນຢ່າງດີ ພ້ອມຍົກສູງນໍ້າໃຈເສຍສະຫຼະ ແລະ ຄວາມຮັບຜິດຊອບຂອງຕົນໃຫ້ສູງຂຶ້ນເປັນເທົ່າຕົວ ພ້ອມກັນເປັນຈິດໜຶ່ງໃຈດຽວກັນສູ້ຊົນບຸກບືນຈັດຕັ້ງປະຕິບັດພາລະບົດບາດຂອງຂະແໜງທະນາຄານໃຫ້ມີບາດກ້າວ ໃໝ່ທີ່ຕັ້ງໜ້າຂຶ້ນກວ່າເກົ່າ.
(ຂ່າວ-ພາບ: ວັນເພັງ)
ຄໍາເຫັນ