ກອງເສນາທິການກວດກູ້ ແລະ ທຳລາຍລະເບີດເພື່ອມະນຸດສະທໍາ ກອງທັບປະຊາຊົນລາວ ກະຊວງປ້ອງກັນປະເທດ ຮ່ວມກັບ ໜ່ວຍງານເກັບກູ້ລະເບີດ ສູນກູ້ມິນສາກົນກຳລັງປະກອບອາວຸດແຫ່ງສະຫະພັນຣັດເຊຍ ໄດ້ຈັດພິທີປາຖະກະຖາ ຫວນຄື່ນມູນເຊື້ອ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ວັນສ້າງຕັ້ງເຫຼົ່າຮົບຊ່າງແສງ ກໍາລັງປະກອບອາວຸດ ແຫ່ງ ສະຫະພັນຣັດເຊຍ ຄົບຮອບ 323 ປີ ຂຶ້ນໃນວັນທີ່ 21 ມັງກອນນີ້ ທີ່ສະໂມສອນໃຫຍ່ອົງການປົກຄອງເມືອງກາສີ ແຂວງວຽງຈັນ, ພາຍໃຕ້ການເປັນປະທານ ແລະ ປາຖະກະຖາໂດຍ ທ່ານ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ, ທ່ານ ພັນໂທ ມາກຊິມ ເຕີຄາເຊັບ ຫົວໜ້າໜ່ວຍງານເກັບກູ້ລະເບີດ ສູນກູ້ມີນສາກົນ ກຳລັງປະກອບອາວຸດແຫ່ງສະຫະພັນຣັດເຊຍ, ມີເລຂາພັກເມືອງເຈົ້າເມືອງກາສີ, ຮອງທີ່ປຶກສາທູດຝ່າຍທະຫານ ສະຖານເອກອັກຄະລັດຖະທູດ ແຫ່ງ ສ ຣັດເຊຍ ປະຈຳ ສປປ ລາວ, ມີບັນດານາຍ ແລະ ພົນທະຫານທັງຝ່າຍລາວ-ຣັດເຊຍເຂົ້າຮ່ວມ.
ທ່ານ ພົນຕີ ຈັນທອງ ສອນຕະອາດໄດ້ກ່າວ່າ: ເພື່ອສືບຕໍ່ພາລະກິດປະຕິວັດຂອງກອງທັບ ພວກເຮົາຕ້ອງໄດ້ເພີ່ມທະວີເສີມຂະຫຍາຍທາດແທ້ມູນເຊື້ອອັນສະຫງ່າອົງອາດ ຂອງກອງທັບປະຊາຊົນລາວ ພວກເຮົາເປັນຕົ້ນ: ເພີ່ມທະວີຄວາມຈົງຮັກພັກດີ ບໍລິສຸດຜຸດຜ່ອງຕໍ່ປະເທດຊາດ, ຕໍ່ພັກ,ຕໍ່ປະຊາຊົນລາວບັນດາເຜົ່າຕັ້ງໜ້າປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ, ໜ້າທີ່ການເມືອງຂອງກອງທັບ, ເດັດດ່ຽວປົກປັກຮັກສາລະບອບການເມືອງ, ປົກປັກຮັກສາອໍານາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໄດ້ຢ່າງໝັ້ນຄົງ, ສຸມໃສ່ເຮັດໃຫ້ສະພາບໃນທົ່ວປະເທດ ມີຄວາມສະຫງົບໜັກແໜ້ນ, ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ເພີ່ມທະວີການນໍາພາຂອງພັກ ຕໍ່ກອງທັບເດັດຂາດ, ໂດຍກົງ, ຮອບດ້ານ, ສ້າງກອງທັບປະຊາຊົນລາວ ໃຫ້ເປັນກອງທັບມີແບບແຜນທັນສະໄໝ, ເຊີດຊູນໍ້າໃຈເປັນເຈົ້າການເພິງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ນໍ້າໃຈປະຢັດມັດທະຍັດ, ສຸມໃສ່ວຽກງານຮັບປະກັນພະລາທິການ, ເຕັກນິກ ຮັບປະກັນໃຫ້ກອງທັບເຮັດສໍາເລັດໜ້າທີ່ແຕ່ລະໄລຍະ, ຈັດຕັ້ງປະຕິບັດແນວທາງການຕ່າງປະເທດຂອງພັກໃຫ້ຖືກຕ້ອງ, ເພີ່ມທະວີການພົວພັນຮ່ວມມືກັບກອງທັບບັນດາປະເທດເພື່ອນມິດ, ປະກອບສ່ວນເຂົ້າໃນການເສີມສ້າງສັນຕິພາບ, ສະຖຽນລະພາບ ແລະ ການຮ່ວມມືສາກົນ.
ທ່ານ ພົນຕີ ຈັນທອງ ສອນຕະອາດ ໄດ້ໃຫ້ຮູ້ຕື່ມວ່າ: ຕະຫຼອດໄລຍະ 75 ປີ ແຫ່ງການຕໍ່ສູ້ ແລະ ເຄື່ອນໄຫວຢ່າງລຽນຕິດໃນເງື່ອນ ໄຂທີ່ຫຍຸ້ງຍາກລຳບາກ ແລະ ທຸລະກັນດານທີ່ສຸດນັ້ນ, ພາຍໃຕ້ການນຳພາຂອງພັກ, ບັນດາກຳລັງປະກອບອາວຸດປະຊາຊົນລາວ ໄດ້ເຮັດສຳເລັດພາລະກິດປະຕິວັດອັນຍິ່ງໃຫຍ່ ແລະ ໜັກໜ່ວງທີ່ພັກມອບໝາຍໃຫ້ຢ່າງສະຫງ່າງາມ, ສ້າງຜົນງານອັນດີເດັ່ນ, ວິລະກຳອັນລ້ຳເລີດ ປະດັບໄວ້ໃນໜ້າປະຫວັດສາດຂອງຊາດຢ່າງສົມກຽດ, ສ້າງມູນເຊື້ອອັນດີງາມຫຼາຍປະການໄວ້ໃຫ້ແກ່ກຳລັງປະກອບອາວຸດປະຕິວັດ. ສົມແລ້ວທີ່ເປັນກອງທັບວິລະຊົນຂອງຊາດລາວວິລະຊົນ, ຊຶ່ງໄດ້ຮັບຄຳສັນລະເສີນຈາກພັກ ແລະ ລັດວ່າ: ກອງທັບຍາມໃດກໍນໍາໜ້າໃນທຸກວຽກງານ, ເດັດດ່ຽວຜ່ານຜ່າທຸກອຸປະສັກ, ຕີເອົາຊະນະສັດຕູທຸກໂຕ, ສຳເລັດທຸກໜ້າທີ່, ສົມເປັນກຳລັງແກ່ນສານທີ່ເຂັ້ມແຂງຂອງການປະຕິວັດ, ເປັນເຄື່ອງມືອັນແຫຼມຄົມຂອງພັກ ແລະ ຕະຫຼອດໄລຍະ 75 ປີ ແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງກໍາລັງປະກອບອາວຸດ, ພາຍໃຕ້ການນຳພາຂອງພັກປະຊາຊົນປະຕິວັດລາວ ແມ່ນປະຫວັດສາດແຫ່ງການທົດສອບອັນໃຫຍ່ຫຼວງ ໃນການຕໍ່ສູ້ອັນຍືດເຍື້ອຍາວນານ ເພື່ອຍາດເອົາຄວາມເປັນເອກະລາດແຫ່ງຊາດ; ຕະຫຼອດໄລຍະທາງອັນລະອິດລະອ້ຽວ, ຫຍຸ້ງຍາກລຳບາກທີ່ສຸດນັ້ນ, ແຕ່ກໍປ່ຽມລົ້ນໄປດ້ວຍຜົນງານ ແລະ ໄຊຊະນະອັນສະຫງ່າລາສີ;ພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນປະ
ຕິວັດລາວ, ກຳລັງປະກອບອາວຸດພວກເຮົາ ໄດ້ສາມັກຄີເປັນຈິດໜຶ່ງໃຈດຽວສູ້ຮົບຢ່າງພິລະອາດຫານ, ອອກແຮງປັບປຸງກໍ່ສ້າງກຳລັງຂອງຕົນ ໃຫ້ນັບມື້ເຂັ້ມແຂງ ແລະ ຂະຫຍາຍຕົວເປັນລຳດັບມາ.
ໃນໂອກາດນີ້ທ່ານ ພັນໂທ ມາກຊິມ ເຕີຄາເຊັບ ກໍໄດ້ຂຶ້ນປາຖະກະຖາ ວັນສ້າງຕັ້ງເຫຼົ່າຮົບຊ່າງແສງ ກໍາລັງປະກອບອາວຸດ ແຫ່ງ ສະຫະພັນຣັດເຊຍ ຄົບຮອບ 323 ປີ ຊຶ່ງທ່ານໄດ້ຍົກໃຫ້ເຫັນມູນເຊື້ອປະຫວັດ ຄວາມເປັນມາ ແລະ ການເຕີບໃຫຍ່ ຂະຫຍາຍຕົວຂອງວັນດັ່ງກ່າວຕື່ມອີກ.ຂ່າວ,ພາບ: ບຸນອູ້ມ
ຄໍາເຫັນ