ຫສປທ ເຜີຍແຜ່ເອກະສານວັນສ້າງຕັ້ງແນວລາວສ້າງຊາດ ແລະ ວັນສ້າງຕັ້ງສະຫະພັນແມ່ຍິງລາວ

ໃນພິທີ, ສະຫາຍ ອິນທະປັນຍາ ຂຽວວົງພະຈັນໄດ້ ເຜີຍແຜ່ເອກະສານ ຊຶ່ງໄດ້ຍົກໃຫ້ເຫັນການກຳເນີດ ແລະ ເຕີບໃຫຍ່ຂະຫຍາຍຕົວຂອງແນວລາວສ້າງຊາດ, ຜົນງານພົ້ນເດັ່ນຂອງແນວລາວສ້າງຊາດໃນແຕ່ລະໄລຍະ, ມູນເຊື້ອອັນສະຫງ່າງາມຂອງແນວລາວສ້າງຊາດ, ເສີມຂະຫຍາຍມູນເຊື້ອຂອງແນວລາວສ້າງຊາດເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ໃນໄລຍະໃໝ່, ແຮງຈູງໃຈ ແລະ ແຜນວຽກການສະເຫຼີມສະຫຼອງ 75 ປີ ແນວລາວສ້າງຊາດ, ໃນນັ້ນໄດ້ຍົກໃຫ້ເຫັນການກຳເນີດ ແລະ ການເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ, ການດຳເນີນກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ I ຫາ VIII, ສັງລວມຜົນງານການເຄື່ອນໄຫວຂອງສະຫະພັນແມ່ຍິງແຕ່ລະໄລຍະ, ມູນເຊື້ອອັນດີງາມຂອງສະຫະພັນແມ່ຍິງລາວ ແລະ ການເສີມຂະຫຍາຍເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່.

ໃນການຈັດຕັ້ງເຜີຍແຜ່ສອງເອກະສານ ສຳຄັນຄັ້ງນີ້: ແມ່ນເພື່ອເຮັດໃຫ້ສະມາຊິກພັກ ແລະ ພະນັກງານ-ລັດຖະກອນ ພາຍໃນສຳນັກງານປະທານປະເທດ ເຫັນໄດ້ມູນເຊື້ອແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງແນວລາວສ້າງຊາດ ແຕ່ລະໄລຍະຜ່ານມາຈົນເຖິງປັດຈຸປັນ ແລະ ໃຫ້ເຫັນໄດ້ມູນເຊື້ອແຫ່ງການກຳເນີດ ແລະ ການເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ,ຕະຫຼອດໃນໄລຍະ 70 ປີ ທີ່ຜ່ານມາ.

ໃນໂອກາດດັ່ງກ່າວຍັງໄດ້ມີພິທີອ່ານຂໍ້ຕົກລົງ ໃຫ້ພະນັກງານພັກການເຂົ້າຮັບອຸດໜູນບຳນານ ຈຳນວນ 2 ສະຫາຍ.

(ຂ່າວ-ພາບ: ສຳນານ)