 |
ສະຫາຍ ນາງ ວຽງທອງ ສີພັນດອນ ໄດ້ເຜີຍແຜ່ມະຕິກອງປະຊຸມຄົບຄະນະ ຄັ້ງທີ 3 ຂອງຄະນະບໍລິຫານງານສູນກາງພັກ ສະໄໝທີ XII ແລະ ກົດລະບຽບຂອງພັກປະຊາຊົນ ປະຕິວັດລາວ ສະໄໝທີ XII ຊຶ່ງໄດ້ຍົກໃຫ້ເຫັນວ່າ: ກອງປະຊຸມໄດ້ສຸມໃສ່ຕີລາຄາສະພາບການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ໂດຍປຶກສາຫາລື ແລະ ໃຫ້ທິດຊີ້ນຳວຽກງານສຳ ຄັນຈຳນວນໜຶ່ງດັ່ງນີ້: ຕີລາຄາຕໍ່ການນຳພາ-ຊີ້ນຳຂອງກົມການເມືອງ ແລະ ຄະນະເລຂາທິການສູນກາງພັກ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026, ຕີລາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີ ແລະ ທິດທາງແຜນ ການ 6 ເດືອນທ້າຍປີ 2026, ກ່ຽວກັບວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ, ຮ່າງມະຕິ ວ່າດ້ວຍການເພີ່ມທະວີປ້ອງກັນ,ສະກັດກັ້ນ, ຕ້ານ ແລະ ແກ້ໄຂພະຍາດອາດຍາສິດ, ການສໍ້ລາດບັງຫຼວງ, ປະກົດການຫຍໍ້ທໍ້ ແລະ ການຟຸມເຟືອຍໃນກົງຈັກການຈັດຕັ້ງ ແລະ ໃນສັງຄົມ.
ໃນໂອກາດດັ່ງກ່າວ ຍັງໄດ້ມີພິທີປະກາດການຈັດຕັ້ງ ຂອງ ຫ້ອງວ່າການສຳນັກງານປະທານປະເທດ ແລະ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ໃຫ້ແກ່ 5 ໜ່ວຍພັກທີ່ຂຶ້ນກັບ ຫສປທ ແລະ ວາງທິດທາງແຜນການ ປີ 2026 ຕື່ມອີກ.
ໃນຕ້ອນທ້າຍ, ສະຫາຍ ນາງ ວຽງທອງ ສີພັນດອນ ຍັງໄດ້ໃຫ້ກຽດໂອ້ລົມໂດຍໄດ້ເນັ້ນໃຫ້ຄະນະພັກ, ຄະນະນໍາ ຫສປທ ພ້ອມດ້ວຍສະມາຊິກພັກຈົ່ງມີຫຼັກໝັ້ນຄຸນທາດການເມືອງໜັກແໜ້ນອຸ່ນອ່ຽນ-ທຸ່ນທ່ຽງ, ມີຄວາມເຊື່ອໝັ້ນຕໍ່ການນໍາພາຂອງພັກ, ເອົາໃຈໃສ່ປະຕິບັດໜ້າທີ່ຄວາມຮັບຜິດຊອບໃຫ້ມີຜົນສຳ ເລັດ, ສໍາຄັນທີ່ສຸດຕ້ອງມີຄວາມສາມັກຄີເປັນປຶກແຜ່ນ, ຍົກສູງໜ້າທີ່ເປັນເສນາທິການຂອງ ຫສປທ ໃຫ້ທະລຸແຕ່ລະໜ້າວຽກ, ປູພື້ນຖານການຈັດຕັ້ງສໍາເລັດແລ້ວຄະນະພັກແຕ່ລະໜ່ວຍ ກໍຄືສະມາຊິກພັກທຸກສະຫາຍ ແລະ 3 ອົງການຈັດຕັ້ງມະຫາຊົນ ຕ້ອງໄດ້ພ້ອມກັນເປັນເຈົ້າການຊ່ວຍຄະນະພັກ, ຄະນະນໍາ ຫສປທ ປະຕິບັດໜ້າທີ່ການເມືອງ ໃຫ້ສຸມຕະລຸມບອນໃສ່ການກະກຽມກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ຫສປທ ໃຫ້ສໍາເລັດຜົນໂດຍໄວ, ມອບໃຫ້ຄະນະພັກ-ຄະນະນໍາ ຫສປທ ນໍາເອົາເນື້ອໃນເອກະສານ ໄປຜັນຂະຫຍາຍ ແລະ ຈັດຕັ້ງປະຕິບັດ ຢູ່ພາຍໃນ ຫສປທ ກໍຄືບັນດາກົມໃຫ້ໄດ້ຮັບຜົນດີ.
(ຂ່າວ-ພາບ: ສຳນານ)
ຄໍາເຫັນ