ທ່ານ ໂພໄຊ ໄຊຍະສອນ ໄດ້ຊີ້ແຈງຕໍ່ການນໍາເຂົ້າແຮງງານດິບຈາກຕ່າງປະເທດ. ຍ້ອນສາເຫດການຂາດ ແຄນແຮງງານທັງປະລິມານ ແລະ ຄຸນນະພາບ, ການເຄື່ອນຍ້າຍແຮງງານຂອງປະເທດທີ່ຫຍຸ້ງຍາກໃນການຊອກວຽກ ໄປສູ່ປະເທດທີ່ມີສະພາບແວດລ້ອມໃນການເຮັດວຽກ ແລະ ພັກຢູ່ອາໃສທີ່ສະດວກ. ຊຶ່ງຜ່ານມາເຫັນວ່າມີຫຼາຍພາກສ່ວນໄດ້ນໍາເຂົ້າແຮງງານຕ່າງປະເທດທັງແບບຖຶກຕ້ອງ ແລະ ບໍ່ຖຶກຕ້ອງຕາມກົດໝາຍ ຊຶ່ງກະຊວງ ຮສສ ກໍໄດ້ອອກແຈ້ງການໂຈະຊົ່ວຄາວໃນການນຳເຂົ້າ ແລະ ການນຳໃຊ້ແຮງງານຕ່າງປະເທດຂອງບາງສັນ ຊາດ ເພື່ອເຮັດໃຫ້ການຄຸ້ມຄອງແຮງງານຕ່າງປະເທດ ທີ່ສັງຄົມໄດ້ຕັ້ງປະເດັນຂຶ້ນນີ້ ເຂົ້າສູ່ການຄຸ້ມຄອງຕາມກົດ ໝາຍ ແລະ ລະບຽບການທີ່ກ່ຽວຂ້ອງຂອງ ສປປ ລາວ ແນໃສ່ການແກ້ໄຂບັນຫາການລັກລອບເຂົ້າມາເຮັດວຽກແບບບໍ່ຖຶກຕ້ອງ, ຈຳກັດການນໍາເຂົ້າແຮງງານເພື່ອມາແຈກຢາຍ, ປ່ອຍປະລະເລີຍທີ່ບໍ່ມີຄວາມຮັບຜິດຊອບຂອງຜູ້ນໍາເຂົ້າ ແລະ ການນໍາໃຊ້ນາຍໜ້າທີ່ບໍ່ເປັນທາງການ. ແຕ່ລະພາກສ່ວນ ຕ້ອງໄດ້ເປັນເຈົ້າການໃນການຄຸ້ມຄອງການນຳເຂົ້າ ແລະ ນຳໃຊ້ແຮງງານຕ່າງປະເທດຢ່າງຖຶກຕ້ອງ; ອົງການປົກຄອງທ້ອງຖິ່ນໃຫ້ການຊ່ວຍເຫຼືອເກັບກໍາຂໍ້ມູນ ແລະ ຮ່ວມມືໃນການບັງຄັບໃຊ້ກົດໝາຍ ແລະ ລະບຽບການກ່ຽວຂ້ອງຢ່າງຮັດກຸມ ແລະ ເຂັ້ມງວດ;
ຕໍ່ສະພາບການຈັດສົ່ງແຮງງານລາວໄປເຮັດວຽກຢູ່ຕ່າງປະເທດ ພາຍຫຼັງມີດຳລັດວ່າດ້ວຍການສົ່ງຜູ້ອອກແຮງງານລາວໄປເຮັດວຽກຢູ່ຕ່າງປະເທດ ກໍໄດ້ເປີດໂອກາດໃຫ້ຜູ້ອອກແຮງງານລາວ ເຂົ້າເຖິງຕະຫຼາດແຮງງານຢູ່ຕ່າງປະ ເທດ ຊຶ່ງເປັນການສ້າງລາຍຮັບ ແລະ ພັດທະນາສີມືແຮງງານໄປຄວບຄູ່ກັນ, ບວກໃສ່ສະພາບເສດຖະກິດມີຄວາມຫຍຸ້ງຍາກ ເຮັດໃຫ້ວຽກງານການຈັດຫາງານໄປຕ່າງປະເທດ ເປັນທີ່ຮັບຮູ້ ແລະ ສົນໃຈຈາກສັງຄົມ ນັບມື້ກ້ວາງຂວາງ, ຊຶ່ງການຈັດສົ່ງແຮງງານລາວໄປເຮັດວຽກຢູ່ຕ່າງປະເທດນັ້ນ ແມ່ນຈັດຕັ້ງປະຕິບັດໂດຍໜ່ວຍງານວິຊາການຂອງລັດ ແລະ ວິສາຫະກິດບໍລິການຈັດຫາງານ ທີ່ໄດ້ຮັບການອະນຸຍາດຈາກກະຊວງ ຮສສ. ປັດຈຸບັນ, ໄດ້ມີບົດບັນທຶກຄວາມເຂົ້າໃຈ ວ່າດ້ວຍການຈ້າງງານຮ່ວມກັບ 3 ປະເທດ ຄື: ໄທ, ຍີ່ປຸ່ນ ແລະ ສ.ເກົາຫຼີ, ນັບແຕ່ປີ 2016-2026 ໄດ້ຈັດສົ່ງແຮງງານລາວໄປເຮັດວຽກຢູ່ຕ່າງປະເທດທັງໝົດ 708,751 ຄົນ ຍິງ 374,196 ຄົນ (ໃນນີ້ສົ່ງໄປໄທ ຈໍານວນ 672,936 ຄົນ ຍິງ 361,422 ຄົນ, ຍີ່ປຸ່ນ ຈໍານວນ 3,257 ຄົນ ຍິງ 1,211 ຄົນ, ສ. ເກົາຫຼີ ຈໍານວນ 32,089 ຄົນ ຍິງ 11,563 ຄົນ, ມາເລເຊຍ ຈໍານວນ 469 ຄົນ).
ເພື່ອເປັນການປ້ອງກັນ ແລະ ສະກັດກັ້ນການຫຼັ່ງໄຫຼຂອງແຮງງານລາວໄປເຮັດວຽກຢູ່ຕ່າງປະເທດແບບບໍ່ຖືກຕ້ອງ ກະຊວງ ຮສສ ໄດ້ເລັ່ງປັບປຸງບັນດານິຕິກຳທີ່ກ່ຽວຂ້ອງກັບການໄປເຮັດວຽກຢູ່ຕ່າງປະເທດ ໃຫ້ເອື້ອອຳ ນວຍກັບສະພາບຕົວຈິງ ເພື່ອດຶງດູດໃຫ້ຜູ້ອອກແຮງງານໄປເຮັດວຽກຢູ່ຕ່າງປະເທດແບບຖືກຕ້ອງຕາມກົດໝາຍຫຼາຍຂຶ້ນ, ປະສານສົມທົບກັບປະເທດທີ່ຮັບເອົາແຮງງານ ໃຫ້ນຳໃຊ້ມາດຕະການຢ່າງເດັດຂາດຕໍ່ກັບຜູ້ໃຊ້ແຮງງານທີ່ນຳໃຊ້ຜູ້ອອກແຮງງານຜິດກົດໝາຍ ດ້ວຍການກຳນົດໃນບົດບັນທຶກຄວາມເຂົ້າໃຈ ແລະ ສັນຍາສອງຝ່າຍ, ສົມທົບກັບພາກສ່ວນທີ່ກ່ຽວຂ້ອງພາຍໃນ ເປັນຕົ້ນ ຂະແໜງການຕ່າງປະເທດ ແລະ ປ້ອງກັນຄວາມສະຫງົບ ເພື່ອກຳນົດກົນໄກທີ່ເໝາະສົມ ໃນການສະກັດກັ້ນການໄປເຮັດວຽກຢູ່ຕ່າງປະເທດແບບຜິດກົດໝາຍ ແລະ ເຜີຍແຜ່ລະ ບຽບການກ່ຽວກັບການໄປເຮັດວຽກຢູ່ຕ່າງປະເທດໃຫ້ອົງການປົກຄອງຂັ້ນທ້ອງຖິ່ນ ເພື່ອສາມາດແນະນຳໃຫ້ຂໍ້ມູນຜູ້ອອກແຮງງານກ່ຽວກັບການໄປເຮັດວຽກຢູ່ຕ່າງປະເທດແບບຖືກຕ້ອງຕາມກົດໝາຍ.
ຂ່າວ: ບຸນຕອມ, ພາບ: ສຳນານ
ຄໍາເຫັນ