 |
ກອງປະຊຸມຄັ້ງນີ້, ໄດ້ຕີລາຄາການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈໍາປີ 2025, ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ເປັນຕົ້ນ: ເປັນເຈົ້າໃນການຝຶກຝົນຫຼໍ່ຫຼອມທາງດ້ານການເມືອງ-ແນວຄິດ, ເປັນເຈົ້າໃນການປະຕິບັດກົດໝາຍ ແລະ ລະບຽບການຂອງລັດ, ເປັນເຈົ້າການພັດທະນາຕົນເອງ ແລະ ການຈັດຕັ້ງໃຫ້ເຕີບໃຫຍ່ເຂັ້ມແຂງ, ເປັນເຈົ້າໃນການປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ອອກແຮງງານ ແລະ ເປັນເຈົ້າການປະຕິບັດໜ້າທີ່ວິຊາສະເພາະຢ່າງປະດິດສ້າງ ສາມາດປະຕິບັດໄດ້ເກືອບ 100% ໃນທຸກເນື້ອໃນຂໍ້ແຂ່ງຂັນ. ໄດ້ຖືກສຳຄັນຕໍ່ວຽກງານການສຶກສາອົບຮົມວຽກງານການເມືອງແນວຄິດໃຫ້ຖັນແຖວສະມາຊິກກຳມະບານ, ເຊຶ່ອມຊຶມເນື້ອໃນເອກະສານວັນສຳຄັນຕ່າງໆຂອງພັກ ຂອງຊາດ, ສົ່ງເສີມໃຫ້ສະມາຊິກກຳມະບານ ໄປຍົກລະດັບທາງດ້ານທິດສະດີ ແລະ ວິຊາສະເພາະຢູ່ພາຍໃນ ແລະ ຕ່າງປະເທດ, ຂົນຂວາຍສະມາຊິກກຳມະບານ ໃຫ້ໄດ້ເຂົ້າເປັນສະມາຊິກກອງທຶນ ຊຶ່ງປະຕິບັດໄດ້ 15 ສະຫາຍ ກວມ 45.4%. ທັງໄດ້ເອົາໃຈໃສ່ໃນການກວດກາການຂະຫຍາຍສະມາຊິກພັກ ໃນທົ່ວແຂວງ, ມີເປົ້າໝາຍທັງໝົດ 1,119 ສະຫາຍ ຍິງ 384 ສະຫາຍ, ຕິດຕາມ ແລະ ຊຸກຍູ້ການແກ້ໄຂຜົນການກວດກາ 3 ເປົ້າໝາຍ ແລະ ວຽກງານອື່ນໆ ທີ່ຕິດພັນ ກໍໄດ້ຮັບການຈັດຕັ້ງປະຕິບັດ ຢ່າງມີຜົນສຳເລັດ.
 |
ຜ່ານການປະເມີນຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃນປີ 2025 ມີສະມາຊິກກຳມະບານໄດ້ຮັບການປະເມີນ 5 ເປັນເຈົ້າ ຈໍານວນ 33 ສະຫາຍ ຍິງ 11 ສະຫາຍ ເທົ່າກັບ 100%. ຈາກນັ້ນ, ໄດ້ຜ່ານຂໍ້ຕົກລົງ ແລະ ມອບໃບຢັ້ງຢືນໃຫ້ກຳມະບານຮາກຖານ ແລະ ສະມາຊິກກຳມະບານ 5 ເປັນເຈົ້າ ປະຈຳປີ 2025, ມອບໃບຍ້ອງຍໍໃຫ້ກົມກອງ ແລະ ບຸກຄົນທີ່ມີຜົນງານໄລຍະ 5 ປີ (2021-2025) ແລະ ມອບຫຼຽນກາກຳມະບານລາວ ໃຫ້ກົມກອງ ແລະ ບຸກຄົນ. ພ້ອມທັງຈັບມືແຂ່ງຂັນໃນປີຕໍ່ໜ້າ ເພື່ອເຮັດໃຫ້ການຈັດຕັ້ງປະຕິບັດວຽກງານກຳມະບານມີຜົນສຳເລັດ.
(ພາບ-ຂ່າວ: ທິດລານີ ໂຄດໂຍທາ)
ຄໍາເຫັນ