 |
ຈຸດປະສົງຂອງການເຜີຍແຜ່ ເພື່ອໃຫ້ຮັບຮູ້ ແລະ ເຂົ້າໃຈຢ່າງຈະແຈ້ງ ແລະ ເລິກເຊິ່ງ ຕໍ່ເຫດຜົນ ແລະ ຄວາມຈຳເປັນ ໃນການເກັບກູ້ອາວຸດປືນ ແລະ ວັດຖຸລະເບີດ ຕາມແນວທາງນະໂຍບາຍຂອງພັກ-ລັດ ກໍຄືນິຕິກຳຂອງຂັ້ນເທິງວາງອອກ, ທັງສາມາດນຳເອົາເນື້ອໃນເອກະສານ ກໍຄືນິຕິກຳ ທີ່ນຳມາເຜີຍແຜ່ໃນຄັ້ງນີ້ ໄປເຜີຍແຜ່ເຊື່ອມຊຶມ ແລະ ປຸກລະດົມ ພະນັກງານ-ລັດຖະກອນ ທີ່ຢູ່ພາຍໃຕ້ຄວາມຮັບຜິດຊອບຂອງຕົນ ຕະຫຼອດຮອດຍາດຕິພີ່ນ້ອງ ໃຫ້ການຮ່ວມມື ແລະ ປະຕິບັດຕາມນິຕິກຳ ກໍຄືຄຳສັ່ງຂອງຂັ້ນເທິງວາງອອກ ຢ່າງເຂັ້ມງວດ, ມີປະສິດທິພາບ, ປະສິດທິຜົນ ແລະ ສຳເລັດຕາມກຳນົດເວລາ.
ເອກະສານທີ່ນຳມາເຜີຍແຜ່ໃນຄັ້ງນີ້ ປະກອບມີ ຄື: ຄຳສັ່ງເລກທີ 11/ນຍ, ລົງວັນທີ 07 ສິງຫາ 2024 ວ່າດ້ວຍການເກັບກູ້ອາວຸດປືນ ແລະ ວັດຖຸລະເບີດ; ຄຳສັ່ງເລກທີ 31/ຄ.ປກສ-ປກສ, ລົງວັນທີ 24 ມິຖຸນາ 2026 ວ່າດ້ວຍການຈັດຕັ້ງປະຕິບັດການເກັບກູ້ອາວຸດປືນ ແລະ ວັດຖຸລະເບີດ ໃນຂອບເຂດທົ່ວປະເທດ ແລະແຈ້ງການສະບັບເລກທີ 311/ປກສ, ລົງວັນທີ 16 ກໍລະກົດ 2026ວ່າດ້ວຍການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີ ວ່າດ້ວຍການເກັບກູ້ອາວຸດປືນ ແລະ ວັດຖຸລະເບີດ ຊຶ່ງບັນດາເອກະສານ ກໍຄືນິຕິກຳເຫຼົ່ານັ້ນ ເຜີຍແຜ່ໂດຍທ່ານ ພັນເອກ ສຸວັນ ທອງຈະເລີນ ຫົວໜ້າກົມ 200 ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ, ຄະນະກໍາມະການເກັບກູ້ອາວຸດເສີກຂັ້ນສູນກາງ.
 |
ໃນໂອກາດດັ່ງກ່າວ, ທ່ານ ປະທານກອງປະຊຸມ ໄດ້ຍົກໃຫ້ເຫັນຄວາມໝາຍຄວາມສໍາຄັນໃນການຈັດຕັ້ງຜັນຂະຫຍາຍທິດຊີ້ນຳຂອງຂັ້ນເທິງ ໃນວຽກງານເກັບກູ້ອາວຸດປືນ ແລະ ວັດຖຸລະເບີດ ເຊິ່ງຕ້ອງໄດ້ປຸກລະດົມໃຫ້ທົ່ວປວງຊົນລາວທັງຊາດ ເວົ້າລວມ, ເວົ້າສະເພາະ ພະນັກງານ-ລັດຖະກອນ ພາຍໃນ ຫສນຍ ທີ່ມີອາວຸດປືນ ແລະ ວັດຖຸລະເບີດ ໄວ້ໃນຄອບຄອງ ຕ້ອງໄດ້ມອບໃຫ້ເຈົ້າໜ້າທີ່ກ່ຽວຂ້ອງ ເປັນຜູ້ຄຸ້ມຄອງຢ່າງລວມສູນ ເພື່ອປະກອບສ່ວນເຮັດໃຫ້ທົ່ວສັງຄົມ ມີຄວາມສະຫງົບ, ປອດໄພ ແລະ ເປັນລະບຽບຮຽບຮ້ອຍດີ. ອັນສຳຄັນ, ທ່ານ ປະທານກອງປະຊຸມ ໄດ້ຮຽກຮ້ອງໃຫ້ຜູ້ເຂົ້າຮ່ວມ ໂດຍສະເພາະ ຜູ້ທີ່ມີອາວຸດປືນ ແລະ ວັດຖຸລະເບີດ ຈົ່ງພ້ອມກັນເປັນແບບຢ່າງນຳໜ້າໃນການປະຕິບັດກົດໝາຍ ແລະ ລະບຽບການດັ່ງກ່າວ ຢ່າງເຂັ້ມງວດ, ພ້ອມທັງ ປຸກລະດົມຄອບຄົວ, ພີ່ນ້ອງ ແລະ ຊຸມຊົນ ຂອງຕົນ ໃຫ້ການຮ່ວມມືເຊັ່ນດຽວກັນ; ສະເໜີໃຫ້ຜູ້ເຂົ້າຮ່ວມນຳເອົາບັນດາເນື້ອໃນຈິດໃຈ ກໍຄືເອກະສານ ທີ່ໄດ້ຮັບການເຜີຍແຜ່ເຊື່ອມຊືມໃນຄັ້ງນີ້ ໄປເຜີຍແຜ່ຕໍ່ໃຫ້ແກ່ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນ ໄດ້ຮັບຮູ້, ເຂົ້າໃຈ ແລະ ພ້ອມກັນປະຕິບັດຢ່າງເຂັ້ມງວດ. ນອກນັ້ນ ກໍໃຫ້ມີສະຕິ ແລະ ເປັນເຈົ້າການຮ່ວມກັນ ກໍລະນີພົບເຫັນ ຫຼື ຮູ້ຂໍ້ມູນ ກ່ຽວກັບການຄອບຄອງ, ຜະລິດ ແລະ ຄ້າຂາຍອາວຸດ ທີ່ຜິດກົດໝາຍ ໃຫ້ແຈ້ງຕໍ່ເຈົ້າໜ້າທີ່ກ່ຽວຂ້ອງຊາບ ເພື່ອມີມາດຕະການແກ້ໄຂ ຢ່າງວ່ອງໄວ ແລະ ທັນການ.
ພາບ-ຂ່າວ: ກົມປະຊາສຳພັນ, ຫສນຍ
ຄໍາເຫັນ