 |
ທ່ານ ອຸດົມໄຊ ລັດຕະນະເຮືອງສີ ຮອງປະທານຄະນະກຳມະການປົກຄອງເມືອງປະທານຄະນະກຳມະການຄຸ້ມຄອງໄພພິບັດຂັ້ນເມືອງໄຊບົວທອງ ໃຫ້ຮູ້ວ່າ: ພາຍຫຼັງພະຍຸໄດ້ພັດຜ່ານຈຳນວນ 4 ຄັ້ງ ໃນຊ່ວງເດືອນກໍລະກົດ ຫາ ເດືອນກັນຍາ 2026, ຄະນະກຳມະການໄພພິບັດຂັ້ນເມືອງ ຮ່ວມກັບຫ້ອງການກ່ຽວຂ້ອງ ໄດ້ລົງສຳຫຼວດ ແລະ ປະເມີນຄວາມເສຍຫາຍໃນຫຼາຍຂະແໜງການ ພົບວ່າມີມູນຄ່າຄວາມເສຍຫາຍລວມ 16.59 ຕື້ກວ່າກີບ. ສຳລັບພື້ນຖານໂຄງລ່າງ ມີເສັ້ນທາງເສຍຫາຍ 13 ເສັ້ນ ແລະ ຂົວ 7 ແຫ່ງ; ສະເພາະເສັ້ນທາງມີມູນຄ່າເສຍຫາຍປະມານ 14.14 ຕື້ກີບ, ສ່ວນຂົວມີມູນຄ່າເສຍຫາຍກວ່າ 103 ລ້ານກີບ. ນອກນັ້ນ ຍັງມີເຂດບ້ານຈຳນວນໜຶ່ງຖືກຕັດຂາດໃນຊ່ວງນ້ຳຖ້ວມ ໂດຍສະເພາະແຕ່ສາມແຍກບ້ານນາພ້າວ ເຂົ້າໄປຫາບ້ານໜອງຜື-ກຸດນ້ຳໃສ-ທ່າແຮ່, ທົ່ງຕຽມ ຮອດບ້ານທ່າໂພ ປະຊາຊົນບາງເຂດຕ້ອງໃຊ້ເຮືອເດີນທາງໄປມາ. ສ່ວນເຂດບ້ານນາພ້າວ-ນາກະທິງ-ນາຊຽງຄວນ ກໍປະສົບບັນຫາການສັນຈອນໃນລະດູຝົນເຊັ່ນກັນ.
ດ້ານການຜະລິດກະສິກຳ ມີເນື້ອທີ່ນາເສຍຫາຍ 1,337 ເຮັກຕາ, ລະບົບຊົນລະປະທານ 4 ແຫ່ງ, ສັດລ້ຽງປະເພດງົວ, ຄວາຍ, ແບ້ ແລະ ສັດປີກຫຼາຍກວ່າ 243 ໂຕ, ພ້ອມທັງໜອງປາ 58 ໜອງ ແລະ ມີປາປະມານ 90,500 ໂຕ, ມູນຄ່າເສຍຫາຍດ້ານກະສິກຳ ແລະ ຊົນລະປະທານລວມປະມານ 2.11 ຕື້ກີບ. ນອກນັ້ນ ຍັງມີໂຮງຮຽນ 1 ແຫ່ງຖືກນໍ້າຖ້ວມ ມີອຸປະກອນການຮຽນເສຍຫາຍກວ່າ 7 ລ້ານກີບ ແລະ ພາຫະນະ ເຊັ່ນ: ລົດໄຖ, ລົດຈັກ ເສຍຫາຍກວ່າ 55 ລ້ານກີບ. ສ່ວນລະບົບໄຟຟ້າມີໝໍ້ແປງໄຟຟ້າເສຍຫາຍ 1 ໜ່ວຍ ແລະ ເສົາໄຟຟ້າລົ້ມ 1 ຕົ້ນ, ຜ່ານມາ ໄດ້ມີການຍົກຍ້າຍໝໍ້ນັບໄຟຟ້າ 36 ໜ່ວຍ ອອກຈາກເຂດສ່ຽງ ເພື່ອຫຼຸດຄວາມສ່ຽງຕໍ່ອັນຕະລາຍຈາກໄຟຟ້າ.
ທ່ານ ອຸດົມໄຊ ກ່າວຕື່ມວ່າ: ຄະນະນໍາເມືອງໄດ້ຈັດລຽງບູລິມະສິດຈຸດເສຍຫາຍ ເພື່ອສະເໜີຂໍງົບປະມານຈາກຂັ້ນແຂວງ ມາສ້ອມແປງຟື້ນຟູ ແລະ ປັດຈຸບັນ ປະຊາຊົນໄດ້ຊ່ວຍກັນສ້ອມແປງເສັ້ນທາງບາງຈຸດເຊັ່ນ: ການຖົມຂຸມເພື່ອໃຫ້ສັນຈອນໄດ້ສະດວກຂຶ້ນ. ສ່ວນຂົວບາງແຫ່ງຍັງມີຈຸດຊຳລຸດ ເຊິ່ງມີຄວາມສ່ຽງຕໍ່ການເກີດອຸບັດເຫດ ຈຶ່ງຕ້ອງເລັ່ງແກ້ໄຂຕາມຄວາມຈຳເປັນ. ສ່ວນແຜນໃນໄລຍະຍາວ ແມ່ນຈະສຸມໃສ່ແກ້ໄຂຍົກລະດັບເສັ້ນທາງ, ຂຸດຄອງລະບາຍນໍ້າລົງໃສ່ບ່ອນພື້ນທີ່ຕໍ່າ ແລະ ວາງທໍ່ຕາມເສັ້ນທາງໃຫ້ຫຼາຍຂຶ້ນ ເພື່ອລະບາຍນໍ້າໃຫ້ໄດ້ດີກວ່າເກົ່າ.
ທັງນີ້ ເມືອງໄຊບົວທອງ ຈະສືບຕໍ່ປະສານງານກັບຂະແໜງການກ່ຽວຂ້ອງ ເພື່ອສະເໜີຂັ້ນເທິງຂໍງົບປະມານ ແລະ ລະດົມແຫຼ່ງທຶນມາຟື້ນຟູພື້ນຖານໂຄງລ່າງ ແລະ ພື້ນທີ່ການຜະລິດຂອງປະຊາຊົນ ໃຫ້ກັບຄືນສູ່ສະພາບປົກກະຕິໂດຍໄວ.
ຂ່າວ: ກອງຄໍາ
ຄໍາເຫັນ