 |
ພິທີດັ່ງກ່າວໄດ້ມີຂຶ້ນໃນວັນທີ 9 ກັນຍາຜ່ານມາ, ທີ່ຫ້ອງປະຊຸມໃຫຍ່ຕຶກເຈົ້າອານຸວົງ ກະຊວງ ສສກ ໃຫ້ກຽດເຂົ້າຮ່ວມ ແລະ ໂອ້ລົມໂດຍທ່ານ ສີຈັນ ຈິດຕະປັນຍາ ຫົວໜ້າກົມກິລາລະດັບສູງ ທັງເປັນຫົວໜ້າຄະນະນັກກິລາລາວ.
ໃນພິທີໄດ້ຮັບຟັງການລາຍງານຂອງທ່ານ ບຸນຍະແສງ ນະຊຽງຄຳ ຫົວໜ້າພະແນກກວດກາ, ຕິດຕາມ ແລະ ປະເມີນຜົນ ກົມກິລາລະດັບສູງ ທັງເປັນຮອງຫົວໜ້າຄະນະນັກກິລາລາວ ກ່ຽວກັບການແນະນຳລະອຽດເລື່ອງລະບຽບການເຂົ້າຮ່ວມ, ຕາຕະລາງການເດີນທາງຂອງແຕ່ລະປະເພດກິລາ, ລະບຽບດ້ານການກວດຄົນເຂົ້າເມືອງ (ການໃຊ້ບັດ AD Card / Pre-validated Cards), ຂໍ້ກຳນົດກ່ຽວກັບສະຖານທີ່ພັກເຊົາ (Villas, Cruise Ship ແລະ ໂຮງແຮມ), ການບໍລິການອາຫານການກິນ, ລວມທັງມາດຕະການຄວາມປອດໄພ ແລະ ຂໍ້ຫ້າມຕ່າງໆ ຕາມລະບຽບການຂອງປະເທດເຈົ້າພາບ.
 |
ໂອກາດນີ້, ທ່ານ ສີຈັນ ຈິດຕະປັນຍາ ໄດ້ເນັ້ນໜັກໃຫ້ຄະນະນຳ, ຄູຝຶກ ແລະ ນັກກິລາທຸກທ່ານ ຍົກສູງຄວາມຮັບຜິດຊອບທາງການເມືອງ, ຮັກສາລະບຽບວິໄນຢ່າງເຂັ້ມງວດ, ເອົາໃຈໃສ່ຮັກສາສຸຂະພາບ ແລະ ຄວາມປອດໄພໃນລະຫວ່າງການເດີນທາງ ພ້ອມທັງຕັ້ງໜ້າຝຶກຊ້ອມ ແລະ ປະຕິບັດໜ້າທີ່ຂອງຕົນດ້ວຍຄວາມຮັບຊອບສູງ ຕາງໜ້າໃຫ້ປະເທດຊາດ ເພື່ອສ້າງຜົນງານ ແລະ ຍາດແຍ່ງເອົາໄຊຊະນະມາສູ່ປະເທດຊາດ ແລະ ປະຊາຊົນລາວບັນດາເຜົ່າໃຫ້ມີຄວາມພາກພູມໃຈ.
ໃນພິທີໄດ້ມອບບັດ AD Card (Accreditation Card) ໃຫ້ຄະນະນັກກິລາທີມຊາດລາວ ພ້ອມທັງເປີດໂອກາດໃຫ້ພາກສ່ວນກ່ຽວຂ້ອງໄດ້ປຶກສາຫາລື ແລະ ປະສານງານວຽກງານຈຸດສຸມຕ່າງໆ ເພື່ອຮັບປະກັນໃຫ້ການເຄື່ອນໄຫວເຂົ້າຮ່ວມການແຂ່ງຂັນກິລາເອຊຽນເກມ ຄັ້ງທີ 20 ດຳເນີນໄປດ້ວຍຄວາມສະດວກ, ປອດໄພ ແລະ ປະສົບຜົນສຳເລັດຢ່າງຈົບງາມ.
ການເຂົ້າຮ່ວມງານກິລາເອຊຽນເກມ ຄັ້ງທີ 20 ມີທັງໝົດ 15 ປະເພດກິລາ ຄື: ວູຊູ, ກະຕໍ້, ມວຍສາກົນ, ຈູຈິດຊູ, ກາຣາເຕໂດ, ລອຍນໍ້າ, ແລ່ນ-ລານ, ຍີມນາສຕິກ, ຊັອບເທັນນິດ, ປິ່ງປ໊ອງ, ດອກປີກໄກ່, ເທັກບອນ, ຟັນດາບ, ອີ-ສະປອດ ແລະ ເທຄວັນໂດ.
ຂ່າວ: ສົງການ ພັນແພງດີ
ຄໍາເຫັນ