ແຂ່ງຂັນຄະນິດຄິດໄວ ຊີງແຊັມວຽງຈັນ ຄັ້ງທີ IX

ທ່ານ ສຸລະໄຊ ຈົງຈິດໄພສານ ຜູ້ອໍານວຍການສູນຄະນິດຄິດໄວສະມາດແມັດ ໃຫ້ຮູ້ວ່າ: ການແຂ່ງ ຂັນລາຍການດັ່ງກ່າວໃນຄັ້ງນີ້, ຈັດຂຶ້ນເພື່ອສ້າງເວທີໃຫ້ເຍົາວະຊົນລາວໄດ້ຖອດຖອນບົດຮຽນ ປະສົບການ ແລະ ສະແດງຄວາມສາມາດທາງດ້ານຄະນິດສາດ ແນໃສ່ຝຶກທັກສະການຄິດຄຳນວນ, ການຄວບຄຸມສະມາທິ ແລະ ການເຮັດວຽກພາຍໃຕ້ແຮງກົດດັນຂອງເວລາ ແລະ ສະພາບແວດລ້ອມທີ່ມີຜູ້ຊົມ ແລະ ສື່ມວນຊົນຈຳນວນຫຼາຍ, ເພື່ອພັດທະນາຄວາມພ້ອມໃຫ້ເທົ່າທຽບກັບລະດັບສາກົນເທື່ອລະກ້າວ. ປີນີ້ ມີນັກຮຽນເຂົ້າຮ່ວມທັງໝົດ 160 ຄົນຈາກທົ່ວປະເທດ ໂດຍແບ່ງອອກເປັນ 3 ລະດັບອາຍຸຄື: ລະດັບ A (ອາຍຸ 5-7 ປີ): ທົດສອບໂຈດບວກ-ລົບ 4 ຊັ້ນ 2 ຫຼັກຈຳນວນ 100 ຂໍ້ (ເວລາ 15 ນາທີ); ລະດັບ B (ອາຍຸ 7 ປີປາຍ- 9 ປີ): ທົດສອບໂຈດບວກ-ລົບ 4 ຊັ້ນ 2 ຫຼັກຈຳນວນ 100 ຂໍ້ (ເວລາ 10 ນາທີ); ລະດັບ C (ອາຍຸ 9 ປີປາຍ - 15 ປີ): ທົດສອບໂຈດບວກ-ລົບ 4 ຊັ້ນ 2 ຫຼັກ ຈຳນວນ 100 ຂໍ້ (ເວລາ 10 ນາທີ). ນອກຈາກນີ້, ທຸກລະດັບຍັງໄດ້ແຂ່ງຂັນການບວກຄຳປາກເປົ່າໂຈດບວກ-ລົບ 4 ຊັ້ນ 2 ຫຼັກຈຳນວນ 50 ຂໍ້.

ຜ່ານການແຂ່ງຂັນຜົນປະກົດວ່າ: ການແຂ່ງຂັນລະດັບ A: ຊະນະເລີດ ທີ 1: ນາງ ປິ່ນສຸດາ ແສງເພັດ (149/150 ຄະແນນ); ທີ 2: ທ້າວ ສີວິໄລ ດວງສະຫວັນ (146 ຄະແນນ), ທີ 3: ທ້າວ ວີລະພາບ ຜົງສະຫວັນ (133 ຄະແນນ); ລະດັບ B: ທີ 1: ນາງ ພິມພາ ແກ້ວດວງດີ (150/150 ຄະແນນ), ທີ 2: ນາງ ທິບທິດາພອນ ແກ້ວມາ (149 ຄະແນນ) ແລະ ທີ 3: ທ້າວ ສອນທະວີ ດວງສະຫວັນ (142 ຄະ ແນນ); ລະດັບ C: ທີ 1: ທ້າວ ຄໍາມຸງຄຸນ ລໍບຸນແອງ (148 ຄະແນນ), ທີ 2: ນາງ ເພັດມະນີ ພົມມາຈັກ (148 ຄະແນນ) ແລະ ທີ 3: ນາງ ສົມປາດຖະໜາ ສິງທະບຸດ (144 ຄະແນນ). ຜູ້ຊະນະເລີດ ທີ 1-3 ໄດ້ຮັບຂັນລາງວັນ, ທຶນຮຽນສະມາດແມັດ (6 ເດືອນ, 3 ເດືອນ, 1 ເດືອນຕາມລະດັບ) ແລະ ຄອດຮຽນພາສາບໍ່ເສຍຄ່າຢູ່ເຮືອນຮຽນຮູ້ຮ່ວມສໍາລັບເດັກດອນໜູນ (ລວມມູນຄ່າລາງວັນທັງໝົດ 25 ລ້ານກີບ). ພ້ອມນີ້ ຜູ້ເຂົ້າແຂ່ງຂັນທຸກຄົນຍັງໄດ້ຮັບຫຼຽນຊົມເຊີຍ, ຂອງທີ່ລະນຶກຈາກທະນາຄານການຄ້າຕ່າງປະເທດລາວ ແລະ ບັດເຕີມເງິນຈາກລາວໂທລະຄົມ ແລະ T-Plus. ພາຍໃນງານຍັງໄດ້ມີການສະແດງຄວາມສາມາດຂອງນ້ອງໆຈາກເຮືອນຮຽນຮູ້ຮ່ວມສໍາລັບເດັກດອນໜູນ (ຮ້ອງເພງ, ເຕັ້ນ, ຫຼິ້ນໄວໂອລິນ) ແລະ ພິທີມອບລາງວັນການແຂ່ງຂັນແຕ້ມຮູບສັດປະຈຳຊາດ ສົກ 2025-2026.