 |
ເປັນການຫວນຄືນມູນເຊື້ອວັນຄູແຫ່ງຊາດ, ເປັນສະແດງຄວາມຮູ້ບຸນຄຸນຕໍ່ຄູ-ອາຈານ, ເຊິ່ງໄດ້ແຈ້ງເຊີນເອົາບັນດາຕາງໜ້າອຳນາດການປົກຄອງບ້ານ 11 ບ້ານອ້ອມຂ້າງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ນອກນັ້ນ, ກໍໄດ້ມີການຝຶກຊ້ອມສີລະປະການສະແດງຂອງນັກຮຽນພາຍໃນໂຮງຮຽນ ເພື່ອກະກຽມຮັບໃຊ້ໃນງານດັ່ງກ່າວ ແລະ ໄດ້ສ້າງອອກແຮງງານອະນາໄມ, ປັບປຸງສະພາບແວດລ້ອມພາຍໃນໂຮງຮຽນ ໃຫ້ມີຄວາມສະອາດ, ສວຍງາມ; ດ້ານກິລາ-ສິລະປະ: ໄດ້ມີການປັບປຸງເດີ່ນກິລາປະເພດຕ່າງໆ ເຊັ່ນ: ເຕະບານ, ບານສົ່ງ, ກະຕໍ້ ແລະ ເປຕັງ ເພື່ອໃຫ້ນັກຮຽນໄດ້ອອກກຳລັງກາຍ ແລະ ຫ່າງໄກຈາກສິ່ງເສບຕິດ.
ສຳລັບສົກຮຽນ 2026-2027, ທາງໂຮງຮຽນ ໄດ້ເອົາໃຈໃສ່ຈັດຕັ້ງປະຕິບັດຫຼາຍໜ້າວຽກສຳຄັນ ເປັນຕົ້ນ: ຈັດການຮຽນ-ການສອນບຳລຸງພິເສດ ໃຫ້ແກ່ນັກຮຽນຊັ້ນ ມ1 (ວິຊາພາສາລາວ) ແລະ ມ2 (ວິຊາຄະນິດສາດ), ພ້ອມທັງຕັ້ງໜ້າຝຶກອົບຮົມນັກຮຽນເກັ່ງຊັ້ນ ມ4 ໃນ 4 ວິຊາຫຼັກ ເພື່ອກຽມເຂົ້າຮ່ວມການສອບເສັງຂັ້ນເມືອງ, ສົມທົບກັບພາກສ່ວນຕ່າງໆ ເພື່ອລະດົມເດັກໃນເກນອາຍຸ ໃຫ້ໄດ້ເຂົ້າຮຽນຢ່າງທົ່ວເຖິງ, ມອບໃຫ້ຄູປະຈຳຫ້ອງ ລົງພົບປະຄອບຄົວທັນທີຫາກພົບວ່ານັກຮຽນຂາດຮຽນ 2–3 ວັນ ເພື່ອສະກັດກັ້ນ ແລະ ຫຼຸດຜ່ອນອັດຕາການປະລະການຮຽນກາງປີ. ໂຮງຮຽນ ມສ ນາໄຊ, ຕັ້ງຢູ່ບ້ານນາໄຊນ້ອຍ, ຫ່າງຈາກເທສະບານເມືອງສາລະວັນ ປະມານ 23 ກິໂລແມັດ, ມີອາຄານທັງໝົດ 4 ຫຼັງ, ມີ 16 ຫ້ອງ, ໃນນັ້ນນຳໃຊ້ເປັນຫ້ອງຮຽນ 9 ຫ້ອງ, ຫ້ອງການຄູ 3 ຫ້ອງ, ຫ້ອງສະໝຸດ 1 ຫ້ອງ, ຫ້ອງບຳລຸງນັກຮຽນ ທີ່ມີຜົນການຮຽນຕໍ່າ 1 ຫ້ອງ, ມີຄູທັງໝົດ 13 ທ່ານ, ຍິງ 5 ທ່ານ, ມີນັກຮຽນທັງໝົດ 256ຄົນ, ຍິງ 158ຄົນ.
 |
ໃນຕອນທ້າຍ, ທ່ານຜູ້ອຳນວຍການໂຮງຮຽນ ໄດ້ຮຽກຮ້ອງມາຍັງອຳນາດການປົກຄອງບ້ານ ແລະ ພໍ່ແມ່ຜູ້ປົກ ຄອງ ຈົ່ງສືບຕໍ່ໃຫ້ການສະໜັບສະໜູນວຽກງານການສຶກສາ ແລະ ເຂົ້າຮ່ວມກິດຈະກຳສະເຫຼີມສະຫຼອງວັນຄູແຫ່ງຊາດ ໃຫ້ເປັນຂະບວນຟົດຟື້ນ ແລະ ຊຸກຍູ້ສົ່ງເສີມລູກຫຼານໃຫ້ໄດ້ເຂົ້າຮ່ຳຮຽນຢ່າງທົ່ວເຖິງ, ຮຽກຮ້ອງໃຫ້ຄູ-ອາຈານທຸກທ່ານ ຍົກສູງຄວາມຮັບຜິດຊອບໃນໜ້າທີ່ວິຊາສະເພາະ ເພື່ອເປັນແມ່ພິມທີ່ດີ ແລະ ນັກຮຽນທຸກຄົນ ຕັ້ງໃຈໃນການຮ່ຳຮຽນ, ເພື່ອກາຍເປັນໜໍ່ແໜງ ແລະ ກຳລັງແຮງຫຼັກແຫຼ່ງໃນການສ້າງສາພັດທະນາປະເທດຊາດໃນອະນາຄົດ.ຂ່າວ-ພາບ: ວິໄລວອນ ສິດທິໄຊ
ຄໍາເຫັນ