 |
ທ່ານ ວຽງນະຄອນ ບົວລະພັນ ຮອງຫົວໜ້າພະແນກສຶກສາທິການ ແລະ ກິລາແຂວງຈຳປາສັກ ໄດ້ກ່າວໃນພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 32 ປີ ໃນອາທິດຜ່ານມາວ່າ: ທົ່ວແຂວງຈຳປາສັກ ມີໂຮງຮຽນສາມັນສຶກສາ 1,143 ແຫ່ງ, ມີອາຄານຮຽນ 1,932 ຫລັງ (ຖາວອນ 1,345ຫຼັງ, ເຄິ່ງຖາວອນ 443ຫຼັງ, ຊົ່ວຄາວ 144ຫຼັງ, ມີຫ້ອງຮຽນ 4,485 ຫ້ອງ, ມີນັກຮຽນ 127,057 ຄົນ, ຍິງ 63,263 ຄົນ ແລະ ມີພະນັກງານ-ລັດຖະກອນທັງໝົດ 5,276 ຄົນ, ຍິງ 3,355 ຄົນ. ສຳລັບຜົນສໍາເລັດທີ່ພົ້ນເດັ່ນໃນການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍມີ 3 ກຸ່ມວຽກ ເປັນຕົ້ນ ກຸ່ມວຽກງານສຶກສາ:ໄດ້ການຂະຫຍາຍຕາໜ່າງການສຶກສາ ໂດຍສະເພາະ ໂຮງຮຽນລ້ຽງເດັກ-ອະນຸບານ ມີ 247 ແຫ່ງ, ປະຖົມ 727 ແຫ່ງ, ມັດທະຍົມ 169 ແຫ່ງ, ອາຊີວະສຶກສາ ແລະ ຊັ້ນສູງ 24 ແຫ່ງ; ຜົນງານການຮຽນ-ການສອນ: ນັກຮຽນເກັ່ງຂັ້ນຊັ້ນ ມ4 ແລະ ມ7 ສາມາດຍາດໄດ້ 9 ລາງວັນໃນລະດັບຊາດ (ຫຼຽນຄຳ 1, ຫຼຽນເງິນ 2, ຫຼຽນທອງ 2 ແລະ ຊົມເຊີຍ 4) ຈັດຢູ່ໃນອັນດັບ 3 ຂອງທົ່ວປະເທດ. ຜົນສອບຈົບຊັ້ນ ປ5 ແລະ ມ7 ປະຕິບັດໄດ້ 100%, ສ່ວນ ມ4 ປະຕິບັດໄດ້ 99.9%; ການພັດທະນາຄູ ແລະ ຈັດສັນ: ໄດ້ບັນຈຸລັດຖະກອນຄູໃໝ່ໃນສົກຮຽນ 2025-2026 ທັງໝົດ 751 ຄົນ, ພ້ອມທັງຈັດຝຶກອົບຮົມຍົກລະດັບຄູສອນຫ້ອງຄວບ ແລະ ຄູສອນທີ່ສອນບໍ່ຖືກສາຍຈຳນວນຫຼວງຫຼາຍ.
 |
ສ່ວນກຸ່ມວຽກງານວິທະຍາສາດ: ພະແນກ ສສກ ແຂວງ ຮ່ວມກັບມະຫາວິທະຍາໄລຈຳປາສັກ ແລະ ວິທະຍາໄລຄູປາກເຊ ໄດ້ສຶກສາຄົ້ນຄວ້າວິໄຈສະພາບບັນຫາຂະແໜງການສຶກສາ ຈຳນວນ 3 ຫົວຂໍ້ ໂດຍມີຫົວຂໍ້ "ແນວທາງພັດທະນາຄຸນນະພາບການສຶກສາ ສາຍສາມັນ" ໄດ້ສຳເລັດຜົນ ແລະ ກຽມນຳສະເໜີ.
ກຸ່ມວຽກງານກິລາ-ກາຍຍະກຳ:ນັກກິລາແຂວງຈຳປາສັກ ຍາດໄດ້ 126 ຫຼຽນ (ຄຳ 28 ຫຼຽນ, ເງິນ 44 ຫຼຽນ, ທອງ 54 ຫຼຽນ) ຈັດຢູ່ໃນອັນດັບ 5 ຂອງງານມະຫະກຳກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ພ້ອມທັງທີມເຕະບານຍິງ ສາມາດຄວ້າແຊ້ມອັນດັບ 1 ທົ່ວປະເທດ ຈາກລາຍການ ໂຄລາ-ໂຄຄາ ລາວ.
ທ່ານ ວຽງນະຄອນ ບົວລະພັນ ໃຫ້ຮູ້ຕື່ມວ່າ: ສຳລັບທິດທາງແຜນການຈຸດສຸມ ໃນສົກຮຽນ 2026-2027, ພະແນກ ສສກ ແຂວງຈຳປາສັກ ໄດ້ວາງ 11 ຄາດໝາຍສູ້ຊົນ ເປັນຕົ້ນ ຊຸກຍູ້ອັດຕາເຂົ້າຮຽນເດັກ 5 ປີ ໃຫ້ບັນລຸ 79%, ຫລຸດຜ່ອນອັດຕາປະລະຊັ້ນປະຖົມລົງເຫລືອ 5,6% ແລະ ສືບຕໍ່ຍົກລະດັບຄຸນນະພາບການສຶກສາທຸກຊັ້ນ-ທຸກສາຍ ແລະ ສ້າງນັກກິລາແຂວງໃຫ້ຕິດທີມຊາດຢ່າງໜ້ອຍ 1 ຄົນ.ຂ່າວ-ພາບ: ຈັນທະວີສັກ
ຄໍາເຫັນ