ສອງໂຮງຮຽນສືບຕໍ່ຮັດແໜ້ນສາຍພົວພັນສະໜິດແໜ້ນ

ພັກກອມມູນິດຫວຽດນາມ ຖືເອົາພື້ນຖານພັກເປັນບັນຫາທີ່ສຳຄັນ, ການກໍ່ສ້າງ ແລະ ບຳລຸງທິດສະດີໃຫ້ພະນັກງານຢູ່ຂັ້ນພື້ນຖານ ຖືເປັນໜ້າທີ່ໜຶ່ງທີ່ມີຄວາມໝາຍ ແລະ ຄວາມສຳຄັນຫຼາຍ. ການບຳລຸງທິດສະດີໃຫ້ແກ່ພະນັກງານໃນແຕ່ລະຍຸກກໍມີລັກສະນະແຕກຕ່າງກັນ, ສະນັ້ນ ໃນແຕ່ລະຍຸກ, ແຕ່ລະສະໄໝ, ແຕ່ລະໄລຍະ ພວກເຮົາມີຄວາມຈຳເປັນຕ້ອງໄດ້ປັບປຸງ, ສຶກສາອົບຮົມ ແລະ ຂຽນເອກະສານໃຫ້ສອດຄ່ອງກັບແຕ່ລະໄລຍະນັ້ນໆ.

ປັດໄຈທີ່ຈະເຮັດໃຫ້ການກໍ່ສ້າງພື້ນຖານພັກຢູ່ທ້ອງຖິ່ນເຂັ້ມແຂງ ມີ: ດ້ານກຳລັງຄວາມສາມາດຂອງອົງການຈັດຕັ້ງພັກ: ພື້ນຖານພັກຕ້ອງມີຄວາມສາມາດໃນການນຳພາ-ຊີ້ນຳ ເພື່ອເປັນແບບຢ່າງຢ່າງຈິງຈັງ ເມື່ອເຮັດໄດ້ແບບນັ້ນ, ອົງການຈັດຕັ້ງພັກຢູ່ຂັ້ນພື້ນຖານຈຶ່ງຈະເຂັ້ມແຂງ, ດ້ານຄຸນນະພາບຂອງສະມາຊິກພັກຢູ່ທ້ອງຖິ່ນ: ພັກກອມມູນິດຫວຽດນາມ ໄດ້ວາງມາດຕະຖານໃຫ້ສະມາຊິກພັກຢູ່ທ້ອງຖິ່ນ ໂດຍມີ 6 ມາດຕະຖານ ຕົ້ນຕໍຄື:ມາດຕະຖານທີ 1: ມີສັດທາ ແລະ ຄວາມເຊື່ອໝັ້ນ, ກ້າຮຽນຮູ້ ແລະ ນຳເອົາແນວທາງ, ມະຕິ ເຂົ້າສູ່ທ້ອງຖິ່ນຂອງຕົນ, ມາດຕະຖານທີ 2: ມີຄວາມກ້າຫານ, ກ້າປະເຊີນໜ້າ, ກ້າເວົ້າຄວາມຈິງ ແລະ ບໍ່ຫຼີກລ່ຽງສິ່ງທີ່ຜິດພາດ ຫຼື ບັນຫາທີ່ເກີດຂຶ້ນ, ມາດຕະຖານທີ 3: ກ້າເຮັດ, ກ້າກະທຳ ແລະ ກ້າຮັບຜິດຊອບ, ສະມາຊິກພັກຕ້ອງກ້າຮັບຜິດຊອບວຽກງານ, ວຽກໃດທີ່ໜັກ ຫຼື ຍາກ ແມ່ນຕ້ອງຮັບເອົາກ່ອນ, ບໍ່ແບ່ງ ຫຼື ຖິ້ມໃຫ້ຜູ້ອື່ນເຮັດ, ມາດຕະຖານທີ 4: ຕ້ອງພັດທະນາຕົນເອງ, ພັດທະນາຮູບແບບການເຮັດວຽກໃຫ້ມີຄວາມທັນສະໄໝ ແລະ ກ້າວໜ້າຢູ່ສະເໝີ,

ມາດຕະຖານທີ 5: ຕ້ອງສູ້ຊົນ ແລະ ຜ່ານຜ່າສິ່ງທີ່ຫຍຸ້ງຍາກ ຫຼື ສິ່ງກີດຂວາງ ຕ້ອງຊອກຫາທຸກວິທີທາງເພື່ອແກ້ໄຂບັນຫາໃຫ້ລຸລ່ວງໄປໄດ້ ແລະ ມາດຕະຖານທີ 6: (ລະບົບການຈັດຕັ້ງ ແລະ ການຜັນຂະຫຍາຍມະຕິ) ການຜັນຂະຫຍາຍມະຕິ: ມະຕິຂອງພັກໃນແຕ່ລະຂັ້ນ ຕ້ອງໄດ້ຮັບການຜັນຂະຫຍາຍເຂົ້າສູ່ປະຊາຊົນ, ເຮັດແນວໃດໃຫ້ປະຊາຊົນໄດ້ຮັບຮູ້, ເຂົ້າໃຈ ແລະ ນຳໄປປະຕິບັດຕາມ ນີ້ແມ່ນສິ່ງທີ່ວັດແທກປະສິດທິພາບຂອງສະມາຊິກພັກຢູ່ຂັ້ນພື້ນຖານ.

ໃນວັນດຽວກັນ, ສອງຄະນະ ຍັງໄດ້ພົບປະແລກປ່ຽນ, ທັງສອງຝ່າຍໄດ້ສົນທະນາຢ່າງກົງໄປກົງມາ ດ້ວຍຄວາມສະໜິດແໜ້ນ ບົນພື້ນຖານຄວາມສາມັກຄີພິເສດ ແລະ ການຮ່ວມມືຮອບດ້ານ, ໂດຍໄດ້ຍົກໃຫ້ເຫັນຜົນສໍາເລັດ ແລະ ໝາກຜົນຂອງການຮ່ວມມືໃນໄລຍະຜ່ານມາ. ພ້ອມດຽວກັນນັ້ນ, ທັງສອງຝ່າຍໄດ້ຕົກລົງ ແລະ ປຶກສາຫາລື 4 ບັນຫາ ສຳຄັນ ຄື: ເພີ່ມທະວີການຄົ້ນຄວ້າວິທະຍາສາດຮ່ວມກັນ 3 ນະຄອນ (ນະຄອນຫຼວງວຽງຈັນ, ນະຄອນຫຼວງຮ່າໂນ້ຍ ແລະ ນະຄອນໂຮ່ຈິມິນ) ໃນປີ 2027, ການຈັດຝຶກອົບຮົມໃນຫົວຂໍ້ສະເພາະໃຫ້ແກ່ພະນັກງານຂັ້ນຕາແສງ, ການຈັດຝຶກອົບຮົມຫົວຂໍ້ສະເພາະໃຫ້ພະນັກງານກວດສອບພາກກາງ, ການຝຶກອົບຮົມວຽກງານການຈັດຕັ້ງຮາກຖານພັກ, ວຽກງານຄຸ້ມຄອງພັກດ້ວຍລະບົບດີຈີຕອນ ແລະ ບັນຫາສຳຄັນອື່ນໆ.

ນອກຈາກພົບປະແລກປ່ຽນບົດຮຽນກັນແລ້ວ, ຄະນະຜູ້ແທນໄດ້ເຂົ້າຢ້ຽມຂໍ່ານັບການນຳນະຄອນຫຼວງວຽງຈັນ ເພື່ອລາຍງານແຜນການຮ່ວມມືຂອງສອງໂຮງຮຽນ ແລະ ຍັງໄດ້ຮັບຟັງການລາຍງານແຜນພັດທະນາເສດຖະກິດ - ສັງຄົມ ຂອງນະຄອນຫຼວງວຽງຈັນ.

(ຂ່າວ: ແສງຈັນ)