ການນໍາແຂວງຫຼວງນ້ຳທາ ລົງຊຸກຍູ້ວຽກງານຂົງເຂດວັດທະນະທຳ-ສັງຄົມ ຢູ່ເມືອງ

ທ່ານ ສີຈັນ ລໍທອງໂຫຼຍ ໄດ້ລາຍງານສະພາບການພັດທະນາເສດຖະກີດ-ສັງຄົມຂອງເມືອງໂດຍຫຍໍ້ວ່າ: ໃນໄລຍະ 1 ປີຜ່ານມາ, ບັນດາຂະແໜງການຂົງເຂດວັດທະນະທໍາ-ສັງຄົມ ຂັ້ນເມືອງໄດ້ຕັ້ງໜ້າເຄື່ອນໄຫວວຽກງານຕາມພາລະບົດບາດຂອງຕົນ ຢ່າງມີຄວາມຮັບຜິດຊອບສູງ, ທົ່ວເມືອງມີໂຮງຮຽນ 158 ແຫ່ງ, ອັດຕາເຂົ້າຮຽນສຸດທິຊັ້ນປະຖົມບັນລຸໄດ້ 99.1% ແລະ ຊັ້ນມັດທະຍົມ 94.8%. ມີບ້ານສາທາລະນະສຸກແບບຢ່າງ100%, ສຸມໃສ່ການປ້ອງກັນພະຍາດໄຂ້ຍຸງລາຍ ແລະ ການບໍລິການຕາມນະໂຍບາຍ 5 ດີ, 1 ພໍໃຈ. ໄດ້ປະເມີນສ້າງຄອບຄົວ ແລະ ບ້ານວັດທະນະທໍາ ໄດ້ 75 ບ້ານ, ມີແຫຼ່ງທ່ອງທ່ຽວທັງໝົດ 16 ແຫ່ງ ຊຶ່ງໃນໄລຍະຜ່ານມາມີນັກທ່ອງທ່ຽວເຂົ້າມາທ່ຽວຊົມທັງໝົດ 5,937 ຄົນ. ໄດ້ປະຕິບັດນະໂຍບາຍອຸດໜູນຕ່າງໆ ເປັນເງິນກວ່າ 1.3 ຕື້ກີບ, ແຈກຢາຍເຂົ້າສານ 828 ກວ່າໂຕນ ພ້ອມສັງກະສີ ແລະ ອຸປະກອນກໍ່ສ້າງໃຫ້ແກ່ 356 ຄອບຄົວ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ, ພ້ອມກັນນັ້ນ ສາມາດມ້າງຄະດີໄດ້ທັງໝົດ 109 ລາຍ, ກັກຕົວຜູ້ຖືກຫາໄດ້ 183 ຄົນ ທີ່ພົວພັນກັບບັນຫາຢາເສບຕິດ ແລະ ປະກົດການຫຍໍ້ທໍ້ຕ່າງໆ.

ໃນໂອກາດນີ້, ທ່ານ ວົງມະນີ ເພື່ອປະຊາ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ ແລະ ໄດ້ເນັ້ນໜັກໃຫ້ຄະນະນຳ, ພະນັກງານຫຼັກແຫຼ່ງ ຈົ່ງເພີ່ມທະວີການສຶກສາອົບຮົມການເມືອງ-ແນວຄິດໃຫ້ໜັກແໜ້ນ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິ ແລະ ການບິດເບືອນຂໍ້ມູນຜ່ານສື່ສັງຄົມອອນລາຍ, ພ້ອມນັ້ນ ທ່ານໄດ້ຊີ້ນໍາໃຫ້ຂະແໜງການຕ່າງໆ ສືບຕໍ່ປັບປຸງແບບແຜນວິທີເຮັດວຽກໃຫ້ເປັນວິທະຍາສາດ, ມີຈຸດສຸມ ແລະ ໃກ້ຊິດກັບມະຫາຊົນ.ເອົາໃຈໃສ່ຍົກສູງຄຸນນະພາບການຮຽນ-ການສອນໃນເຂດຫ່າງໄກສອກຫຼີກ, ມີຄວາມສາມັກຄີພາຍໃນ ເເລະ ພາຍນອກ ເປັນແບບຢ່າງນໍາໜ້າໃຫ້ຂົງເຂດວັດທະນະທຳສັງຄົມ ໃຫ້ມີຜົນສຳເລັດຕາມລະດັບຄາດໝາຍຂອງຂັ້ນເທີງວາງອອກ.

(ແຫຼ່ງຂ່າວ: ເມືອງຫຼວງນໍ້າທາ)