ການນໍາແຂວງໄຊສົມບູນ ລົງຕິດຕາມ ຜົນກະທົບຈາກໄພພິບັດ ພະຍຸລະດູຮ້ອນ ຢູ່ເມືອງລ້ອງຊານ

ສະຫາຍ ສົມພັນ ສີສົມບຼົ່ງ ຮອງເລຂາພັກເມືອງ ປະທານຄະນະກຳມະການປົກຄອງເມືອງລ້ອງຊານ ໄດ້ໃຫ້ຮູ້ວ່າ: ໃນຕອນກາງຄືນຂອງວັນທີ 18 ເມສາຜ່ານມານີ້, ເວລາປະມານ 1:30 ໂມງ ໄດ້ມີພະຍຸເຂົ້າເມືອງລ້ອງຊານ ຢູ່ບ້ານນໍ້າຄຸຍ, ໂພນເລົ່າ, ຊຳຄອນ, ວັງຫຼວງ, ໂພນໄຊ ແລະ ບ້ານນາໄຊ ຊຶ່ງໃນເບື້ອງຕົ້ນໄດ້ແຕ່ງຕັ້ງພະນັກງານລົງເກັບກຳຂໍ້ມູນຜົນເສຍຫາຍຢູ່ບ້ານນໍ້າຄຸຍ, ໂພນເລົ່າ ແລະ ບ້ານຊຳຄອນ ເຫັນວ່າມີ ຈຳນວນ 72 ຫຼັງຄາເຮືອນທີ່ໄດ້ຮັບຜົນເສຍຫາຍ ລວມມູນຄ່າເສຍຫາຍທັງໝົດ 809,374,000 ກີບ. ນອກນີ້, ຄາດຄະເນຜົນເສຍຫາຍຕົ້ນຢາງພາລາໃນເບື້ອງຕົ້ນ 6,000 ຕົ້ນ, ຄິດເປັນມູນຄ່າ 1,800,000,000 ກີບ. ສ່ວນບ້ານວັງຫຼວງ, ບ້ານໂພນໄຊ, ບ້ານນາໄຊ, ສຳນັກງານ, ອາຄານຂອງຫ້ອງການ ແລະ ກົມ-ກອງ ຄະນະກຳມະການຄຸ້ມຄອງໄພພິບັດຂັ້ນເມືອງ ກຳລັງສຸມໃສ່ເກັບກຳຂໍ້ມູນ ພາຍຫຼັງທີ່ສຳເລັດ ຫຼື ຮູ້ຜົນເສຍຫາຍແລ້ວ ຈຶ່ງລາຍງານໃຫ້ຊາບຕື່ມ. ພ້ອມນີ້ ຜູ້ເຂົ້າຮ່ວມກໍໄດ້ຜັດປ່ຽນປະກອບຄຳເຫັນ ໂດຍສະເພາະແມ່ນວິທີການເກັບກຳຂໍ້ມູນ, ການຊ່ວຍເຫຼືອ ແລະ ການຈັດບຸລິມະສິດຊ່ວຍເຫຼືອຄອບຄົວທຸກຍາກ ຫຼື ຄອບຄົວທີ່ເຫັນວ່າຖືກຜົນເສຍຫາຍຢ່າງໜັກໜ່ວງໄປກ່ອນ.

ໂອກາດນີ້, ສະຫາຍ ພອຍຄຳ ຮຸ່ງບຸນຍວງ ໄດ້ເນັ້ນໜັກໃຫ້ຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ເມືອງ ຈົ່ງສືບຕໍ່ເກັບກຳຂໍ້ມູນໃຫ້ລະອຽດ ແລ້ວລາຍງານໃຫ້ອົງການປົກຄອງແຂວງຊາບ ເພື່ອປືກສາຫາລືຊ່ວຍເຫຼືອຢ່າງວ່ອງໄວ, ປຸກລະດົມພໍ່ແມ່ປະຊາຊົນ ໃຫ້ເຂົາເຈົ້າມີຄວາມອຸ່ນອ່ຽງທຸ່ນທ່ຽງ ແລະ ຟື້ນຟູຜົນເສຍຫາຍທີ່ໄດ້ຮັບໃນຄັ້ງນີ້ ເພື່ອຮັບປະກັນຊີວິດການເປັນຢູ່ໄປກ່ອນ. ຈາກນັ້ນ, ສະຫາຍ ພອຍຄຳ ຮຸ່ງບູນຍວງ ພ້ອມດ້ວຍຄະນະ ກໍໄດ້ລົງເບີ່ງຜົນເສຍຫາຍຕົວຈິງ ແລະ ມອບເຄື່ອງຊ່ວຍເຫຼືອບັນເທົາທຸກ ເບື້ອງຕົ້ນ ໃຫ້ແກ່ບາງຄອບຄົວ. ສ່ວນທີ່ຍັງເຫຼືອ ແມ່ນມອບໃຫ້ຄະນະນຳຂອງເມືອງ ແລະ ພາກສ່ວນທີ່ກ່ຽວຂ້ອງມອບຕໍ່ຕາມຫຼັງ.

(ພາບ-ຂ່າວ: ຮົວຈັ້ງ ດຣາເຊັ້ງ)