ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 7 ຕຸລານີ້, ທີ່ສະພາແຫ່ງຊາດ ໂດຍການເປັນປະທານຂອງທ່ານ ສອນໄຊ ສີພັນດອນ ປະທານສະພາແຫ່ງຊາດ.
ທ່ານ ລິນຄຳ ດວງສະຫວັນ ໄດ້ຊີ້ແຈງຕໍ່ຄຳຊັກຖາມຂອງ ສສຊ ໂດຍສະເພາະ ຕໍ່ກັບໂຄງການເຊົ່າ, ສຳປະທານທີ່ດິນຂອງລັດທີ່ບໍ່ໄປຕາມລະບຽບການ ຫຼື ບໍ່ໄປຕາມແຜນການທີ່ສະເໜີ ເຊັ່ນ: ບໍ່ມີການພັດທະນາ, ຈັບຈອງທີ່ດິນ, ນໍາໃຊ້ບໍ່ຖືກເປົ້າໝາຍ, ບໍ່ປະຕິບັດພັນທະ, ລວມທັງການອະນຸຍາດໃຫ້ສໍາປະທານເນື້ອທີ່ປ່າໄມ້ເພື່ອປູກພືດ ແລະ ອື່ນໆ. ຕໍ່ບັນຫາດັ່ງກ່າວ ໃນປີ 2021 ໄດ້ມີການແຕ່ງຕັ້ງຄະນະສະເພາະກິດ ເພື່ອດໍາເນີນການກວດກາໂຄງການເຊົ່າ ແລະ ສຳປະທານທີ່ດິນລັດໃນກິດຈະການຕ່າງໆ ຈຳນວນ 438 ໂຄງການຢູ່ນະຄອນຫຼວງວຽງຈັນ ແລະ ບັນດາແຂວງໃນທົ່ວປະເທດ. ໃນນັ້ນ, ເພື່ອສືບຕໍ່ແກ້ໄຂບັນຫາດັ່ງກ່າວ ມາຮອດກາງປີ 2023 ກະຊວງກະສິກຳ ແລະ ສິ່ງແວດລ້ອມ (ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໃນເມື່ອກ່ອນ) ໄດ້ສືບຕໍ່ລົງກວດກາໂຄງການເຊົ່າ ແລະ ສຳປະທານທີ່ດິນທັງໝົດ ລວມທັງໂຄງການຈໍານວນ 438 ໂຄງການທີ່ຢູ່ໃນເປົ້າໝາຍ ທີ່ສະພາແຫ່ງຊາດຮັບຮອງ ແນໃສ່ກວດກາຄືນການນໍາໃຊ້ຊັບພະຍາກອນດິນ, ຕິດພັນກັບການຄຸ້ມຄອງສິ່ງແວດລ້ອມຂອງໂຄງການປະເພດຕ່າງໆຄືນໃໝ່ ແລະ ສຳເລັດການກວດກາຕົວຈິງ ໃນຕົ້ນປີ 2025 ລວມມີ ໂຄງການລົງທຶນທັງໝົດ 2,547 ໂຄງການ (ມີ 570 ໂຄງການທີ່ມີບັນຫາ), ສໍາລັບການອອກໃບຕາດິນ ກະຊວງ ຮ່ວມກັບທ້ອງຖິ່ນ ແລະ ພາກເອກະຊົນ ສາມາດປະຕິບັດໄດ້ 156,070 ຕອນ ລື່ນຄາດໝາຍ 4.5 ເທົ່າ ຫຼື 459% ຂອງຄາດໝາຍແຜນການ ປະຈຳປີ 2026 ທີ່ສະພາແຫ່ງຊາດຮັບຮອງ ຖືວ່າເກີນຄາດໝາຍແຜນການ 5 ປີ (2026-2030) ທີ່ສະພາຮັບຮອງ (ແຜນ 5 ປີ ແມ່ນ 150,000 ຕອນ).
ໃນຂະນະດຽວກັນ, ເພື່ອເປັນການແກ້ໄຂບັນຫາການບຸກລຸກປ່າໄມ້, ພັກ ແລະ ລັດຖະບານໄດ້ອອກຄໍາສັ່ງ 15/ນຍ, ຄໍາສັ່ງ 11/ນຍ, ຄໍາສັ່ງ 11/ຄລສພ, ໂດຍປະຕິບັດຕາມບັນດາຄໍາສັ່ງ ຂະແໜງການໄດ້ເອົາໃຈໃສ່ຄຸ້ມຄອງປ່າໄມ້ຕາມລະບົບ 3 ປະເພດປ່າ ແລະ ວຽກງານດັ່ງກ່າວໄດ້ຖືກກໍານົດເປັນ 1 ໃນ 7 ແຜນງານຂອງຂະ ແໜງກະສິກຳ ແລະ ສິ່ງແວດລ້ອມ ແຕ່ນີ້ຮອດປີ 2030. ຊຶ່ງໄລຍະຜ່ານມາ ໄດ້ປະສານສົມທົບກັບພາກສ່ວນກ່ຽວຂ້ອງທັງສູນກາງ ແລະ ທ້ອງຖິ່ນລົງສໍາຫຼວດພາກສະໜາມ, ຕິດຕາມ ກວດກາ ການບຸກລຸກພື້ນທີ່ດິນປ່າໄມ້ ແລະ ປ່າໄມ້, ໄຟໄໝ້ປ່າ ແລະ ການປ່ຽນແປງປະເພດການນໍາໃຊ້ທີ່ດິນ, ຕິດປ້າຍ ແລະ ປັກຫຼັກໝາຍໃນ ແລະ ນອກ 3 ປະເພດປ່າ, ກະຊວງ ກສ ໄດ້ເຂັ້ມງວດໃນການຈັດຕັ້ງປະຕິບັດກົດໝາຍ ແລະ ລະບຽບການ ກ່ຽວກັບ ການບຸກລຸກປ່າໄມ້ ນັບແຕ່ປີ 2021 ເປັນຕົ້ນມາ ສາມາດກວດພົບ ແລະ ປະຕິບັດກົດໝາຍຕໍ່ຜູ້ລະເມີດ ຈໍານວນ 1,173 ກໍລະນີ, ມີຜູ້ລະເມີດ 1,492 ຄົນ. ຕໍ່ການກະທໍາດັ່ງກ່າວ ໄດ້ດໍາເນີນຄະດີຕໍ່ຜູ້ລະເມີດຈໍານວນ 579 ຄະດີ ສະຫຼຸບ ແລະ ສົ່ງສຳນວນຄະດີໃຫ້ອົງການໄອຍະການປະຊາຊົນຈຳນວນ 163 ຄະດີ, ສານປະຊາຊົນຕັດສິນແລ້ວ 39 ຄະດີ, ໂຈະການສືບສວນ-ສອບສວນ 72 ຄະດີ, ດຳເນີນການສຶກສາອົບຮົມ ແລະ ຊັດມ້ຽນ 920 ຄະດີ ເຮັດໃຫ້ບັນຫາການບຸກລຸກທີ່ດິນປ່າໄມ້ໄດ້ຮັບການແກ້ໄຂເທື່ອລະກ້າວ. (ຂ່າວ-ພາບ: ສຳນານ)
ຄໍາເຫັນ