ການຈັດກິດຈະກໍາປູກຕົ້ນໄມ້ຂອງກະຊວງການຕ່າງປະເທດຄັ້ງນີ້ແມ່ນເພື່ອເປັນການສ້າງຂະບວນການຂ່ຳນັບຮັບຕ້ອນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມິຖຸນາ 2025ພ້ອມທັງເປັນການປະຕິບັດຄຳຂວັນ ສ ສີຂຽວ ຂອງນະຄອນຫຼວງວຽງຈັນທີ່ໄດ້ວາງອອກ, ສ້າງສະພາບແວດລ້ອມຢູ່ຂອບເຂດນະຄອນຫຼວງວຽງຈັນ ກໍຄືຂອບເຂດທົ່ວປະເທດໃຫ້ເປັນພື້ນທີ່ສີຂຽວ ເຮັດໃຫ້ມີອາກາດທີ່ສົດຊື່ນ ແລະ ສ້າງຄວາມຮົ່ມເຢັນ, ທັງເປັນການປູກຈິດສໍານຶກໃຫ້ແກ່ພະນັກງານ-ລັດຖະກອນ ໃຫ້ມີຈິດໃຈມັກຮັກໃນການປູກຕົ້ນໄມ້ ເພື່ອປົກປັກຮັກສາສິ່ງແວດລ້ອມທີ່ດີ.
ກິດຈະກຳດັ່ງກ່າວ ໄດ້ຈັດຂຶ້ນທຸກໆປີເພື່ອເພີ່ມພື້ນທີ່ສີຂຽວ ໃຫ້ກັບທຳມະຊາດ ແລະ ເພື່ອສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ໃຫ້ເປັນຂະບວນການຟົດຟື້ນ. ສຳລັບປີນີ້, ກະຊວງການຕ່າງປະເທດໄດ້ປູກຕົ້ນໄມ້ຈຳນວນ 18 ຕົ້ນ ປະກອບມີຕົ້ນໄມ້ຮົ່ມ, ຕົ້ນໄມ້ມີດອກ ແລະ ຕົ້ນໄມ້ກິນໝາກຄື: ຕົ້ນບາລະມີ, ຕົ້ນດອກຄູນ, ຕົ້ນໝາກມ່ວງ, ຕົ້ນໝາກອາໂວກາໂດ, ຕົ້ນໝາກຜູ ພັນໜ່ວຍໃຫຍ່, ຕົ້ນໝາກຊົມພູ (ໝາກຈຽງ), ຕົ້ນຝາງແດງ.
(ຂ່າວ: ກຕທ)
ຄໍາເຫັນ