ໃນພິທີ, ສະຫາຍ ວັນດີ ບຸດສະດີ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານບົດລາຍງານການປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໃນ 1 ປີຜ່ານມາ ຊຶ່ງໄດ້ຍົກໃຫ້ເຫັນຜົນສໍາເລັດ, ດ້ານດີ, ດ້ານອ່ອນ, ສາເຫດ, ບົດຮຽນທີ່ຖອດຖອນໄດ້ ແລະ ໄດ້ກໍານົດທິດທາງວຽກງານໃນ 1 ປີຕໍ່ໜ້າ ເພື່ອແນໃສ່ສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງຂອງວຽກງານພະນັກງານ ເພື່ອສືບຕໍ່ນຳພາຂະແໜງການຕ່າງປະເທດໃຫ້ໄປຕາມແນວທາງ ແລະ ນະໂຍບາຍທີ່ພັກວາງໄວ້.
ຫຼັງຈາກນັ້ນ, ສະຫາຍ ທອງສະຫວັນ ພົມວິຫານ ກໍໄດ້ໃຫ້ກຽດຂຶ້ນເຜີຍແຜ່, ເຊື່ອມຊຶມ ຜົນສຳເລັດກອງປະຊຸມວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວປະເທດປະຈໍາປີ 2024 ເພື່ອແນໃສ່ເຮັດໃຫ້ສະມາຊິກພັກ, ພະນັກງານ-ລັດຖະກອນ ຂອງກະຊວງການຕ່າງປະເທດ ໄດ້ຮັບຮູ້ ແລະ ເຂົ້າໃຈຢ່າງເປັນເອກະພາບຕໍ່ເນື້ອໃນຜົນສໍາເລັດຂອງກອງປະຊຸມດັ່ງກ່າວ ແລະ ນໍາໄປຜັນຂະຫຍາຍເຂົ້າໃນວຽກງານຕົວຈິງຂອງຕົນ ແນໃສ່ເສີມຂະຫຍາຍດ້ານຕັ້ງໜ້າ, ແກ້ໄຂຂໍ້ຄົງຄ້າງ ແລະ ສິ່ງຫຍໍ້ທໍ້ຕ່າງໆ ໃຫ້ບັນລຸຕາມຄາດໝາຍທີ່ວາງໄວ້.
ພາຍຫຼັງສໍາເລັດການເຜີຍແຜ່ເອກະສານແລ້ວ, ກະຊວງການຕ່າງປະເທດ ໄດ້ຈັດພິທີມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ບັນດາໜ່ວຍພັກ ທີ່ຂຶ້ນກັບອົງຄະນະພັກກະຊວງການຕ່າງປະເທດ ຊຶ່ງໃນປີນີ້ ມີບັນດາໜ່ວຍພັກ ທີ່ໄດ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປີ 2024 ທັງໝົດຈໍານວນ 38 ໜ່ວຍພັກ ຈາກທັງໝົດ 59 ໜ່ວຍພັກ ກວມເອົາ 64%.ນອກນັ້ນ, ເພື່ອສະແດງໃຫ້ເຫັນເຖິງຄວາມໝາຍໝັ້ນໃນການຈັດຕັ້ງປະຕິບັດແຜນການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໃນປີຕໍ່ໄປ, ບັນດາໜ່ວຍພັກພາຍໃນກະຊວງການຕ່າງປະເທດ ໄດ້ຂຶ້ນຈັບມືແຂ່ງຂັນ ເພື່ອພ້ອມກັນຕັ້ງໜ້າຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ ປະຈໍາປີ 2025 ໃຫ້ມີຜົນສໍາເລັດສູງ ທັງຮັບປະກັນດ້ານປະລິມານ ແລະ ຄຸນນະພາບຕາມທິດນໍາຂອງຂັ້ນເທິງໄດ້ວາງໄວ້.
ສະຫາຍ ທອງສະຫວັນ ພົມວິຫານ ຍັງໄດ້ໃຫ້ກຽດໂອ້ລົມ, ເຜີຍແຜ່ ແລະ ຊີ້ນໍາ ກ່ຽວກັບການຈັດຕັ້ງປະຕິບັດຄຳແນະນຳກ່ຽວກັບການສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ສະບັບປັບປຸງໃໝ່ ຊຶ່ງຈະເລີ່ມຈັດຕັ້ງປະຕິບັດ ໃນປີ 2025 ໂດຍໄດ້ເນັ້ນໜັກໃຫ້ເພີ່ມທະວີຄວາມເອົາໃຈໃສ່ ເສີມຂະຫຍາຍດ້ານດີ ແລະ ເອົາໃຈໃສ່ປັບປຸງດ້ານຄົງຄ້າງ ໃນວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ແລະ ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເພື່ອຮັບປະກັນໄດ້ດ້ານປະລິມານ ແລະ ຄຸນນະພາບຕາມທິດນໍາຂອງຂັ້ນເທິງ, ທັງນີ້ກໍເພື່ອຮັບປະກັນໃຫ້ການຈັດຕັ້ງຂະແໜງການຕ່າງປະເທດ ເວົ້າລວມ, ເວົ້າສະເພາະແມ່ນບັນດາໜ່ວຍພັກ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ທັງ 4 ດ້ານຄື: ດ້ານການເມືອງ, ດ້ານແນວຄິດ, ດ້ານການຈັດຕັ້ງ ແລະ ດ້ານແບບແຜນນຳພາວິທີເຮັດວຽກ ໃຫ້ມີບາດກ້າວໃໝ່ຂຶ້ນໄປເລື້ອຍໆ.
(ຂ່າວ: ກະຊວງການຕ່າງປະເທດ, ພາບ: ສຳນານ)
ຄໍາເຫັນ