ກະຊວງຍຸຕິທຳ ປາຖະກະຖາ ສຳຄັນຂອງຊາດ

ທ່ານ ຄຳພັນ ພົມມະທັດ ໄດ້ຍົກໃຫ້ເຫັນເຖິງຂະບວນການປະຕິວັດແຫ່ງການກໍາເນີດ ຂອງພັກປະຊາຊົນ ປະຕິວັດລາວ ຕະຫຼອດໄລຍະ 71 ປີ ແຫ່ງການຊີ້ນໍາ-ນໍາພາຂອງ ພັກປະຊາຊົນລາວ ໃນແຕ່ລະໄລຍະຜ່ານມາ; ມູນເຊື້ອໃນການຕໍ່ສູ້ຕີເອົາຊະນະຈັກກະພັດຕ່າງດ້າວຜູ້ຮຸກຮານ, ໄດ້ຜະເຊີນໜ້າກັບພວກຈັກກະພັດລ່າເມືອງຂຶ້ນແບບເກົ່າ ແລະ ຈັກກະພັດລ່າເມືອງຂຶ້ນ ແບບໃໝ່, ພັກເຮົາໄດ້ແບກຫາບເອົາພາລະກຳອັນໜັກໜ່ວງ ເພື່ອຊີ້ນຳ - ນຳພາປວງຊົນລາວທັງຊາດ ຕໍ່ສູ້ຕ້ານການຮຸກຮານຂອງຈັກກະພັດ ແລະ ລູກແຫຼ້ງຕີນມືປະຕິການຂາຍຊາດຢ່າງດຸເດືອດຂ້ຽວຂາດ ເຕັມໄປດ້ວຍຄວາມເສຍສະຫຼະກ້າວໄປເຖິງການປົດປ່ອຍປະເທດຊາດ ຢ່າງສົມບູນໃນປີ 1975 ແລະ ໄລຍະປົກປັກຮັກສາ, ສ້າງສາພັດທະນາປະເທດຊາດ, ການຈັດຕັ້ງປະຕິບັດແນວທາງປ່ຽນແປງໃໝ່ ຕະຫຼອດ 71 ປີຜ່ານມາ ພັກປະຊາຊົນ ປະຕິວັດລາວ ໄດ້ເອົາໃຈໃສ່ຊີ້ນຳ-ນຳພາ ດ້ວຍຄວາມເດັດດ່ຽວ, ສະຫຼາດສ່ອງໃສ ແລະ ມີຄວາມເຕີບໃຫຍ່ເຂັ້ມແຂງໃນທຸກດ້ານເປັນກ້າວໆມາ. ເສີມຂະຫຍາຍມູນເຊື້ອທາດແທ້ຂອງພັກປະຊາຊົນ ປະຕິວັດລາວ ມີຄວາມຈົງຮັກພັກດີ ແລະ ຢຶດໝັ້ນໃນແນວຄິດ-ທິດສະດີມາກ-ເລນິນ, ແນວຄິດ ໄກສອນ ພົມວິຫານ ກໍຄືຈຸດໝາຍສັງຄົມນິຍົມຢ່າງໜັກແໜ້ນ; ຢຶດໝັ້ນ ແລະ ປະຕິບັດຢ່າງຖືກຕ້ອງບັນດາຫຼັກການພື້ນຖານດ້ານການຈັດຕັ້ງ ແລະ ການເຄື່ອນໄຫວຂອງພັກ, ນັ້ນຄືຫຼັກການລວມສູນປະຊາທິປະໄຕ, ເວລາໃດກໍຖືສໍາຄັນການເສີມຂະຫຍາຍຄວາມສາມັກຄີ ເປັນເອກະພາບບົນພື້ນຖານແນວທາງແຜນນະໂຍບາຍຂອງພັກ, ພັກໄດ້ເປັນເຈົ້າການປັບປຸງປ່ຽນແປງຕົນເອງຢູ່ສະເໝີ, ເອົາໃຈໃສ່ບຳລຸງສ້າງຖັນແຖວສະມາຊິກພັກ ໃຫ້ມີຄວາມເປັນແບບຢ່າງນໍາໜ້າ, ເປັນກໍາລັງແຮງສູ້ຮົບໃນທຸກຂົງເຂດວຽກງານທັງຢູ່ຂັ້ນສູນກາງ ແລະ ທ້ອງຖິ່ນຮາກຖານ.

ທ່ານ ຄຳພັນ ບຸນພາຄົມ ຮອງເລຂາຄະນະບໍລິຫານງານພັກກະຊວງ ຮອງລັດຖະມົນຕີກະຊວງຍຸຕິທຳ ກໍໄດ້ຍົກໃຫ້ເຫັນເຖິງວັນນັກຮົບເສຍອົງຄະ ແລະ ເສຍສະຫຼະຊີວິດ ເພື່ອປະເທດຊາດ ຄົບຮອບ 80 ປີ, ປະຫວັດຄວາມເປັນມາ, ການກຳເນີດບັ້ນຮົບປ້ອງກັນຕົວເມືອງທ່າແຂກ; ສະພາບ ແລະ ການກະກຽມການຕໍ່ສູ້ຕ້ານພວກລ່າເມືອງຂຶ້ນແບບເກົ່າຂອງໜ່ວຍພັກເມືອງທ່າແຂກ; ເຫດການ ແລະ ການຕໍ່ສູ້ຢ່າງພິລະອາດຫານຂອງທະຫານ ແລະ ປະຊາຊົນຢູ່ເມືອງທ່າແຂກ ຍ້ອນການກະທໍາທີ່ໄຮ້ມະນຸດສະທໍາ ແລະ ໂຫດຮ້າຍປ່າເຖື່ອນຂອງພວກລ່າເມືອງຂຶ້ນແບບເກົ່າຜູ້ຮຸກຮານ. ວັນທີ 21 ມີນາ ຈຶ່ງກາຍເປັນວັນຄຽດແຄ້ນຂອງປະຊາຊົນລາວ.

ໃນວັນດຽວກັນນີ້, ຍັງໄດ້ມີການປະກາດການຈັດຕັ້ງຮອງລັດຖະມົນຕີ ແລະ ຫົວໜ້າກົມ ຊຶ່ງໃນພິທິດັ່ງກ່າວ ທ່ານ ນັນທະພົນ ລີວັດທະນາ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງພະນັກງານມີດັ່ງນີ້: ແຕ່ງຕັ້ງ ສະຫາຍ ນາງ ສີສຸດາ ໂສພາວັນດີ ເປັນຮອງລັດຖະມົນຕີ ກະຊວງຍຸຕິທໍາ, ສະຫາຍ ນະລົງລິ ນໍລະສິງ ເປັນຫົວໜ້າກົມກົດໝາຍ,ສະຫາຍ ນາງ ສາຍຄິດ ວິສີສົມບັດ ເປັນຫົວໜ້າກົມຮ່ວມມືສາກົນ, ສະຫາຍ ພັນໂນລາ ທອງຈັນ ເປັນຫົວໜ້າກົມໂຄສະນາເຜີຍແຜ່ກົດໝາຍ ແລະ ສະຫາຍ ແສງເພັດ ລ່ຽມພະຈັນ ເປັນຫົວໜ້າກົມຄຸ້ມຄອງ ແລະ ສົ່ງເສີມວຽກງານຍຸຕິທຳ ກະຊວງຍຸຕິທຳ.

ໃນໂອກາດນີ້, ທ່ານ ຄຳພັນ ພົມມະທັດ ກໍໄດ້ໃຫ້ກຽດຂຶ້ນມອບດຳລັດຂອງນາຍົກລັດຖະມົນຕີ ໃຫ້ແກ່ຜູ້ທີ່ໄດ້ຮັບການແຕ່ງຕັ້ງໃນຄັ້ງນີ້ຕາມລຳດັບ ແລະ ທ່ານ ຄຳພັນ ພົມມະທັດ ກໍໄດ້ໂອ້ລົມຮຽກຮ້ອງໃຫ້ບັນດາທ່ານທີ່ໄດ້ຮັບການແຕ່ງຕັ້ງ ແລະ ສະມາຊິກພັກ ແລະ ພະນັກງານ ພາຍໃນກະຊວງຍຸຕິທຳ ຈົ່ງສືບຕໍ່ມູນເຊື້ອອັນດີງາມ, ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ ແລະ ຕັ້ງໜ້າຜັນຂະຫຍາຍວຽກງານໃຫ້ມີບາດກ້າວຂະຫຍາຍຕົວໃໝ່ຢ່າງເຂັ້ມແຂງ, ເຊື່ອໝັ້ນໃນການນຳພາຂອງພັກ, ເສີມສ້າງຄວາມສາມັກຄີ ໃຫ້ເປັນປຶກແຜ່ນ ແລະ ຮ່ວມກັນພັດທະນາປະເທດຊາດ, ເວົ້າສະເພາະກໍຄືກະຊວງຍຸຕິທຳ ໃຫ້ມີບາດກ້າວຂະຫຍາຍຕົວໃໝ່ຢ່າງເຂັ້ມແຂງ.

ຂ່າວ-ພາບ: ບຸນຕອມ.