ກະຊວງຍຸຕິທໍາ ປິດຊຸດຝຶກອົບຮົມວຽກງານທະບຽນສານ

ໃນວັນທີ 29ທັນວາ 2023 ຜ່ານມານີ້. ທີ່ສະຖາບັນຍຸຕິທຳແຫ່ງຊາດ ໄດ້ປີດຊຸດຝຶກອົບຮົມວຽກງານທະບຽນສານ ໂດຍເປັນປະທານຂອງ ທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທຳ, ມີ ຫົວໜ້າກົມ, ຮອງຫົວໜ້າກົມ, ຫົວໜ້າ, ຮອງຫົວໜ້າສະຖາບັນຍຸຕິທໍາແຫ່ງຊາດ, ຄະນະຮັບຜິດຊອບ, ແຂກຖືກເຊີນ, ຄູ-ອາຈານ ແລະ ນັກຝຶກອົບຮົມເຂົ້າຮ່ວມ.

 ທ່ານ ສີວິໄຊ ປະສານພອນ ຮອງຫົວໜ້າສະຖາບັນຍຸຕິທໍາແຫ່ງຊາດ  ໄດ້ຂຶ້ນຜ່ານບົດລາຍງານຜົນສໍາເລັດຝຶກອົບຮົມວຽກງານທະບຽນສານຂອງກະຊວງຍຸຕິທຳ ຊຶ່ງຊຸດຝຶກອົບຮົມໄດ້ດຳເນີນ ມາແຕ່ວັນທີ 25 ຫາ 29 ທັນວາ2023 ທີ່ຜ່ານມາໂດຍການສົມທົບກັນລະຫວ່າງ ສະຖາບັນຍຸຕິທໍາແຫ່ງຊາດ ກັບກົມທະບຽນສານ, ມີຜູ້ເຂົ້າຮ່ວມຊຸດຝຶກອົບຮົມທັງໝົດ ຈຳນວນ 62ທ່ານ, ຍິງ 26ທ່ານ.ທີ່ມາຈາກກົມທະບຽນສານ, ບັນດາພະແນກຍຸຕິທໍາແຂວງ, ບັນດາຫ້ອງການຍຸຕິທໍາເມືອງ ໃນຂອບເຂດທົ່ວປະເທດ.
ຈຸດປະສົງການຝຶກອົບຮົມວຽກງານທະບຽນສານໃນຄັ້ງນີ້.ເພື່ອໃຫ້ພະນັກງານທະບຽນສານ ມີຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ມີທັດສະນະຫຼັກໝັ້ນ, ມີຈັນຍາບັນວິຊາຊີບ ແລະ ມີຄວາມຮັບຜິດຊອບສູງຕໍ່ໜ້າທີ່ວຽກງານ, ເປັນການຍົກລະດັບໃຫ້ພະນັກງານທະບຽນສານ ຜູ້ທີ່ຍັງບໍ່ທັນໄດ້ຜ່ານການຝຶກອົບຮົມ ໃຫ້ເຫັນໄດ້ ແລະ ເຂົ້າໃຈກ່ຽວກັບພາລະບົດບາດ - ໜ້າທີ່ຂອງຕົນ ໃຫ້ກາຍເປັນພະນັກງານທະບຽນສານທີ່ມີຄວາມໜັກແໜ້ນທາງດ້ານວິຊາການເປັນຕົ້ນແມ່ນເພີ່ມຄວາມຮັບຮູ້ ແລະ ຄວາມເຂົ້າໃຈກ່ຽວກັບທັກສະການຄົ້ນຄ້ວາ ແລະ ກວດກາສັນຍາ, ກວດກາເອກະສານ ໃຫ້ມີຄວາມຖືກຕ້ອງກັບຄວາມເປັນຈິງ ແລະ ສອດຄ່ອງກັບກົດໝາຍ. ຊຶ່ງເປັນການປະກອບສ່ວນໂດຍກົງເຂົ້າໃນການສ້າງລັດທີ່ປົກຄອງດ້ວຍກົດໝາຍເທື່ອລະກ້າວ.ໃນພິທີກໍໄດ້ມີການມອບ-ຮັບໃບຢັ້ງຢືນໃຫ້ຜູ້ເຂົ້າຮ່ວມຝຶກອົບຮົມ ຊຶ່ງໃຫ້ກຽດມອບໂດຍທ່ານຮອງລັດຖະມົນຕີກະຊວງຍຸຕິທໍາ.
ທ່ານ ເກດສະໜາ ພົມມະຈັນ ກໍໄດ້ມອບໃບຢັ້ງຢືນ ແລະ ມີຄຳເຫັນໂອ້ລົມ ໃຫ້ຜູ້ສຳເລັດການຝຶກອົບຮົມຄັ້ງນີ້ວ່າ:ການຝຶກອົບຮົມ ຈະເປັນການສ້າງເງື່ອນໄຂ ແລະ ບາດກ້າວການຫັນປ່ຽນໃໝ່ໃນວຽກງານທະບຽນສານ, ເປັນກຳລັງແຮງໃຫ້ພະນັກງານຂັ້ນສູນກາງ, ພະນັກງານຂັ້ນທ້ອງຖິ່ນໃນວຽກດັ່ງກ່າວ ແລະ ຜູ້ທີ່ສໍາເລັດການຝຶກອົບຮົມຈະໄດ້ນຳເອົາຄວາມຮູ້ທີ່ໄດ້ຮັບຈາກການຝຶກອົບຮົມໄປຈັດຕັ້ງຜັນຂະຫຍາຍເຂົ້າໃນການເຄື່ອນໄຫວໜ້າທີ່ວຽກງານໃຫ້ປາກົດຜົນເປັນຈິງ.ຂ່າວ: ໄຊຍະສິດ ບັນຍາວົງພາບ: ເຂັມເພັດ ແສງທອງຄໍາ