 |
ທ່ານ ພັນໂທ ຄຳເບັນ ແກ້ວສາຍທອງ ຄະນະປະຈຳພັກເມືອງ ຫົວໜ້າກອງບັນຊາການທະຫານເມືອງສາລະວັນ ທັງເປັນຫົວໜ້າອະນຸກຳມະການ ປກຊ-ປກສ ແລະ ຮັກສາສຸຂະພາບ ໄດ້ເປີດເຜີຍຕໍ່ສື່ມວນຊົນໃນວັນທີ 22 ກັນຍາຜ່ານມາວ່າ: ວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ ເປັນໜຶ່ງໃນໜ້າທີ່ສຳຄັນຫຼັກ ຊຶ່ງທາງຄະນະກຳມະການໄດ້ວາງແຜນປ້ອງກັນຢ່າງລະອຽດຮອບດ້ານ ທັງກຳລັງພົນ, ພາລາທິການ ແລະ ເຕັກນິກ. ໃນນັ້ນ, ໄດ້ກຳນົດເອົາຈຸດປ້ອງກັນສຳຄັນທັງໝົດ 12 ຈຸດ ໂດຍມີການບັນຈຸຊັບຊ້ອນກຳລັງເຂົ້າປະຈຳການທັງວົງໃນ ແລະ ວົງນອກ, ພ້ອມທັງຈັດສັນເສັ້ນທາງ ແລະ ລະບາຍການສັນຈອນບໍ່ໃຫ້ເກີດຄວາມແອອັດ. ນອກຈາກນີ້, ຍັງໄດ້ຈັດຕັ້ງໜ່ວຍແພດເຄື່ອນທີ່ເພື່ອຕິດຕາມ ແລະ ເບິ່ງແຍງສຸຂະພາບຂອງການນຳຕະຫຼອດຮອດມວນຊົນທີ່ມາທ່ຽວໃນງານບຸນຄັ້ງນີ້. ການປະຕິບັດໜ້າທີ່ ແມ່ນເລີ່ມຈັດຕັ້ງປະຕິບັດນັບແຕ່ວັນທີ 23-27 ກັນຍາ 2026 ໂດຍມີການປະສານສົມທົບກັນຢ່າງແໜ້ນແຟ້ນລະຫວ່າງ ກຳລັງປ້ອງກັນຄວາມສະຫງົບຂັ້ນແຂວງ, ຕາແສງ, ກຸ່ມບ້ານ ແລະ ຕຳຫຼວດບໍລິການປະຊາຊົນ ເພື່ອສະກັດກັ້ນ ແລະ ຕ້ານທຸກປະກົດການຫຍໍ້ທໍ້.
 |
ໂອກາດນີ້, ທ່ານ ພັນໂທ ຄຳເບັນ ແກ້ວສາຍທອງ ຍັງໄດ້ເຊີນຊວນພໍ່ແມ່ປະຊາຊົນບັນດາເຜົ່າ ແລະ ນັກທ່ອງທ່ຽວ ເຂົ້າມາທ່ຽວຊົມງານບຸນຊ່ວງເຮືອປະເພນີໃຫ້ມີບັນຍາກາດຄຶກຄື້ນ, ມ່ວນຊື່ນ. ພ້ອມທັງຮຽກຮ້ອງໃຫ້ທຸກຄົນມີສະຕິເຄົາລົບລະບຽບກົດໝາຍ, ລະມັດລະວັງການດື່ມສິ່ງມຶນເມົາແລ້ວບໍ່ຂັບຂີ່, ປະຕິບັດຕາມຂໍ້ຫ້າມຕ່າງໆຢ່າງເຂັ້ມງວດ ແລະ ຮ່ວມແຮງຮ່ວມໃຈກັນຮັກສາຄວາມສະອາດ, ຄວາມສວຍງາມ ຮ່ວມເປັນເຈົ້າພາບທີ່ດີ ແລະ ສ້າງພາບພົດອັນຈົບງາມໃຫ້ເມືອງສາລະວັນ.
 |
ຂ່າວ-ພາບ: ວິໄລວອນ ສິດທິໄຊ
ຄໍາເຫັນ