 |
ກອງປະຊຸມຄັ້ງນີ້, ໄດ້ຕີລາຄາການຈັດຕັ້ງປະຕິບັດ ວຽກງານຈັດຕັ້ງ ແລະ ການປົກຄອງ ໄລຍະ 5 ປີຜ່ານມາ ແລະ ທິດທາງ 5 ປີໃນຕໍ່ໜ້າ, ພ້ອມທັງຮັບຟັງບົດປະກອບຄໍາເຫັນກ່ຽວກັບວຽກງານຕ່າງໆເຊັ່ນ: ບົດຮຽນກ່ຽວກັບການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຂອງຄະນະຊາວໜຸ່ມແຂວງ, ບົດຮຽນກ່ຽວກັບການຈັດຕັ້ງປະຕິບັດ ແຜນກຳນົດສ້າງພະນັກງານ-ລັດຖະກອນ ຂອງເມືອງເຊບັ້ງໄຟ, ບົດຮຽນກ່ຽວກັບການກະກຽມ ສ້າງຕາແສງ ແລະ ທິດທາງແຜນການເຄື່ອນໄຫວໃນຕໍ່ໜ້າ ຂອງເມືອງຫີນບູນ. ພ້ອມນັ້ນ, ຍັງໄດ້ເຊື່ອມຊຶມບັນດາເອກະສານທີ່ສໍາຄັນ ເປັນຕົ້ນ ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ XII, ມະຕິຂອງກົມການເມືອງສູນກາງພັກ ວ່າດ້ວຍການສ້າງແຜນກຳນົດພະນັກງານ ນໍາພາ-ຄຸ້ມຄອງ, ມະຕິຕົກລົງວ່າດ້ວຍການເພີ່ມທະວີ ວຽກງານແຂ່ງຂັນ-ຍ້ອງຍໍ ໃນໄລຍະໃໝ່.
ໂອກາດນີ້, ສະຫາຍ ໄຊຊະນະ ໂຄດພູທອນ ໄດ້ມີຄໍາເຫັນໂອ້ລົມຕໍ່ກອງປະຊຸມ ເພື່ອເປັນທິດທາງການຜັນຂະຫຍາຍ ແລະ ຈັດຕັ້ງປະຕິບັດວຽກງານໃນຕໍ່ໜ້າໂດຍໄດ້ເນັ້ນໃຫ້ ຄະນະພັກແຕ່ລະຂັ້ນຕ້ອງໄດ້ເພີ່ມທະວີການສຶກສາອົບຮົມການເມືອງ-ແນວຄິດ ດ້ວຍການຈັດຕັ້ງຮໍ່າຮຽນ, ຍົກລະດັບທິດສະດີມາກ-ເລນິນ, ແນວຄິດປະທານໄກສອນພົມວິຫານ, ມູນເຊື້ອອັນດີງາມຂອງພັກ, ແນວທາງນະໂຍບາຍຂອງພັກ ໃຫ້ຖັນແຖວພະນັກງານ, ສະມາຊິກພັກ ຢ່າງເປັນລະບົບຕໍ່ເນື່ອງ, ເພື່ອກຳແໜ້ນເນື້ອໃນຈິດໃຈ ແລະ ເປັນເຈົ້າການໃນການປະຕິບັດວຽກງານຢ່າງມີຜົນສໍາເລັດ, ສືບຕໍ່ປັບປຸງຄຸນນະພາບຂອງສະມາຊິກພັກ, ພະນັກງານໃຫ້ມີຄວາມໜັກແໜ້ນທາງດ້ານອຸດົມການ, ມີສະຕິຕໍ່ການຈັດຕັ້ງ, ມີລະບຽບວິໄນ, ມີຄວາມກ້າຫານຕ້ານກັບປະກົດການຫຍໍ້ທໍ້ຕ່າງໆ ທີ່ເກີດຂຶ້ນ, ສຸມໃສ່ປັບປຸງກໍ່ສ້າງຮາກຖານພັກໃຫ້ມີຄວາມໜັກແໜ້ນ, ຍູ້ແຮງຂະບວນການກໍ່ສ້າງໜ່ວຍພັກປອດໃສ, ເຂັ້ມແຂງແລະໜັກແໜ້ນໃຫ້ກວມເອົາຈຳນວນຫຼາຍ ຂອງໜ່ວຍພັກທັງໝົດ, ສ້າງມະຫາຊົນຜູ້ໜຸ່ມແໜ້ນ, ເພດ, ເຜົ່າ ຜູ້ທີ່ມີຄວາມຮູ້, ຄວາມສາມາດພົ້ນເດັ່ນໃນຂະບວນການຕົວຈິງຂອງວຽກງານ ເພື່ອຂະຫຍາຍເຂົ້າເປັນສະມາຊິກພັກ ໂດຍເລັ່ງໃສ່ເຂດຊົນນະບົດຫ່າງໄກສອກຫຼີກ, ຫົວໜ່ວຍທຸລະກິດຂອງລັດ ແລະ ເອກະຊົນ, ເອົາໃຈໃສ່ສ້າງພັກ ໃຫ້ມີຄວາມເຂັ້ມແຂງ, ໜັກແໜ້ນ ທາງດ້ານການຈັດຕັ້ງ, ເພີ່ມທະວີຄວາມສາມັກຄີພາຍໃນພັກ, ຢຶດໝັ້ນຕາມຫຼັກການລວມສູນປະຊາທິປະໄຕ, ນຳພາເປັນໝູ່ຄະນະ, ແບ່ງຄວາມຮັບຜິດຊອບໃຫ້ບຸກຄົນ ແລະ ຕົກລົງຕັດສິນບັນຫາເປັນໝູ່ຄະນະ, ປັບປຸງກົນໄກແບບແຜນວິທີນຳພາ, ວິທີເຮັດວຽກໃຫ້ຖືກຕ້ອງສອດຄ່ອງກັບລະບຽບຂອງພັກ, ສ້າງແຜນກຳນົດ ກໍ່ສ້າງ ແລະ ບຳລຸງພະນັກງານເພື່ອເລືອກເຟັ້ນເອົາພະນັກງານໄປຍົກລະດັບທາງດ້ານທິດສະດີ ແລະ ວິຊາສະເພາະໃຫ້ຮັບປະກັນຕາມເງື່ອນໄຂ ແລະ ມາດຖານ, ສືບຕໍ່ປັບປຸງກົງຈັກແຕ່ລະຂັ້ນ ໃຫ້ມີຄວາມໜັກແໜ້ນ, ເຂັ້ມແຂງຕາມທິດກະທັດຮັດ, ສົມເຫດສົມຜົນ, ນຳໃຊ້ເຕັກນິກ ແລະ ວິທີການຄຸ້ມຄອງທີ່ທັນສະໄໝເຂົ້າໃນການບໍລິຫານເພື່ອຮັບປະກັນລັກສະນະໂປ່ງໃສ, ສຸມໃສ່ປັບປຸງພາລະບົດບາດ, ສິດ ແລະ ໜ້າທີ່ ຂອງຕາແສງ ເພື່ອເປັນບ່ອນອີງໃນການເຄື່ອນໄຫວໜ້າທີ່ວຽກງານ, ປັບປຸງນິຕິກໍາຕ່າງໆ ທີ່ຕິດພັນກັບຄວາມຮັບຜິດຊອບກັບຕາແສງ ແລະ ພາກສ່ວນອື່ນ ເພື່ອແບ່ງຂັ້ນຄຸ້ມຄອງໃຫ້ຊັດເຈນ, ສ້າງໃຫ້ພະນັກງານທີ່ຢູ່ຂັ້ນຕາແສງມີຄວາມຮັບຮູ້, ເຂົ້າໃຈ ໃນສິດ ແລະ ໜ້າທີ່ຕາແສງ ດ້ວຍການຈັດຕັ້ງຝຶກອົບຮົມ ແລະ ແລກປ່ຽນບົດຮຽນກັບປະເທດເພື່ອນມິດ ຕາມເງື່ອນໄຂທີ່ເໝາະສົມ.
 |
ສະຫາຍ ໄຊຊະນະ ໂຄດພູທອນ ຍັງໄດ້ເນັ້ນໃຫ້ຄະນະພັກແຕ່ລະຂັ້ນ ພາຍຫຼັງສຳເລັດກອງປະຊຸມຄັ້ງນີ້ ຕ້ອງໄດ້ນຳເອົາເນື້ອໃນຈິດໃຈຂອງບົດລາຍງານ ແລະ ເນື້ອໃນບົດໂອ້ລົມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ ໄປຈັດຕັ້ງຜັນຂະຫຍາຍໃຫ້ສະມາຊິກພັກ, ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນຮັບຮູ້, ເຊື່ອມຊຶມ, ພ້ອມກັນຈັດຕັ້ງປະຕິບັດໃຫ້ມີຜົນສຳເລັດ ແລະ ຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໄໝ່.
ຂ່າວ: ກອງຄໍາ
ຄໍາເຫັນ