ກະຊວງຍຸຕິທຳເປີດຝຶກອົບຮົມພາວະການເປັນຜູ້ນຳ 

ເມື່ອບໍ່ດົນມານີ້,ທີ່ໂຮງແຮມອຳມະລີ ເມືອງວັງວຽງແຂວງວຽງຈັນ ກະຊວງຍຸຕິທໍາໄດ້ເປີດຝຶກອົບຮົມພາວະການເປັນຜູ້ນຳ ແລະ ການທົບທວນແຜນຍຸທະສາດຂອງກະຊວງຍຸຕິທຳໃນການສົ່ງເສີມຄວາມສະເໝີພາບ ລະຫວ່າງ ຍິງ-ຊາຍ ໂດຍການເປັນປະທານຮ່ວມຂອງ ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ, ທ່ານ ນາງ ໂຊຟາຢາ ຄາເຊີນ ຫົວໜ້າແຜນງານຊ່ວຍເຫຼືອທາງດ້ານກົດໝາຍ ມູນນິທິເອເຊຍ, ມີ ທ່ານ ນາງ ດວງມະນີ ລາວມາວ ຄະນະບໍລິຫານງານສູນກາງສະຫະພັນແມ່ຍິງລາວ, ປະທານຄະນະບໍລິຫານງານສະຫະພັນແມ່ຍິງກະຊວງຍຸຕິທຳ, ຄູ-ອາຈານ ທີ່ຖືກເຊີນ ເຂົ້າຮ່ວມ.
 ທ່ານ ໄພວີ ສີບົວລິພາ ກໍໄດ້ມີຄຳເຫັນວ່າ:  ສປປ ລາວ ໄດ້ເອົາໃຈໃສ່ ແລະ ໃຫ້ຄວາມສໍາຄັນໃນການຊຸກຍູ້ສົ່ງເສີມຄວາມກ້າວໜ້າຂອງແມ່ຍິງ ແລະ ໃຫ້ສິດສະເໝີພາບເທົ່າທຽມກັບເພດຊາຍໃນທຸກດ້ານ, ຍຸດທະສາດ ແລະ ແຜນງານຕ່າງໆ ແລະ ໃຫ້ບຸລິມະສິດຢ່າງຈະແຈ້ງຕໍ່ແນວທາງ, ນະໂຍບາຍ, ລັດຖະທໍາມະນູນ, ກົດໝາຍ, ນິຕິກຳ, ແຜນພັດທະນາເສດຖະກິດ-ສັງຄົມແຫ່ງຊາດ, ວິໄສທັດ, ຍຸດທະສາດ ແລະ ແຜນດໍາເນີນງານແຫ່ງຊາດ ເພື່ອຄວາມສະເໝີພາບຍິງ-ຊາຍ ກໍຄືການສ້າງແຜນກຳນົດພະນັກງານນໍາພາ-ຄຸ້ມຄອງ ເວົ້າລວມ ເວົ້າສະເພາະການສ້າງພະນັກງານນຳພາ-ຄຸ້ມຄອງ ຂອງຂະແໜງການຍຸຕິທຳ ເພື່ອເປັນກໍາລັງແຮງປະກອບສ່ວນເຂົ້າໃນຂະບວນການປົກປັກຮັກສາ ແລະ ສ້າງສາພັດທະນາປະເທດຊາດ ຄ່ຽງບ່າຄ່ຽງໄຫຼ່ກັບເພດຊາຍ.
ທ່ານໄດ້ກ່າວຕື່ມອີກວ່າ: ການຝຶກອົບຮົມໃນຄັ້ງນີ້ ແມ່ນມີຄວາມໝາຍ-ຄວາມສໍາຄັນເປັນຢ່າງຍິ່ງ ເພາະຈະພ້ອມກັນຄົ້ນຄ້ວາ, ປຶກສາຫາລື ແລະ ຊ່ວຍປະກອບຂໍ້ມູນການສ້າງແຜນຍຸດທະສາດ ໃນການສົ່ງເສີມຄວາມສະເໝີພາບ ລະຫວ່າງ ຍິງ-ຊາຍ ຂະແໜງການຍຸຕິທຳ ໃຫ້ໄດ້ຮັບການຈັດຕັ້ງປະຕິບັດເທື່ອລະກ້າວ ແລະ ເພື່ອເປັນການສ້າງຄວາມເຂັ້ມແຂງໃຫ້ແກ່ແມ່ຍິງກໍຄືສະພາວະການເປັນຜູ້ນຳຂອງແມ່ຍິງກະຊວງຍຸຕິທໍາ ແລະ ການສົ່ງເສີມບົດບາດຍິງ-ຊາຍ ກ້າວໄປເຖິງການລຶບລ້າງທຸກຮູບການຈໍາແນກ ແລະ ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ໃຫ້ໄດ້ຮັບຜົນປະໂຫຍດສູງສຸດ ແລະ ປະສົບຜົນສໍາເລັດເປັນກ້ວາໆ. 
ຂ່າວ-ພາບ: ນ. ບຸນຖອມ ພະສະແຫວ