ກະຊວງພາຍໃນ ປະກາດການຈັດຕັ້ງຫຼາຍຕຳແໜ່ງ

ກະຊວງພາຍໃນ ໄດ້ຈັດພິທີປະກາດການຈັດຕັ້ງຂຶ້ນ ໃນວັນທີ 28 ທັນວາ ນີ້ໂດຍການເຂົ້າຮ່ວມຂອງ ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ, ມີບັນດາຮອງລັດຖະມົນຕີ, ຄະນະຫ້ອງການ, ກົມ, ສະຖາບັນ, ສູນ ແລະ ພະນັກງານ-ລັດຖະກອນ ຂອງ ກະຊວງພາຍໃນເຂົ້າຮ່ວມ.
ໃນພິທີ, ທ່ານ ບຸນຍົງ ສີສຸພັນ ຫົວໜ້າກົມຈັດຕັ້ງ ແລະ ພະນັກງານ ໄດ້ຂຶ້ນຜ່ານດໍາລັດ ແລະ ຂໍ້ຕົກລົງວ່າດ້ວຍການອະນຸມັດໃຫ້ພະນັກງານກະຊວງພາຍໃນ  ອອກພັກການ-ຮັບອຸດໜູນບຳນານ ຈຳນວນ 7 ທ່ານ ຍິງ 4 ທ່ານ ແລະ ພ້ອມດຽວກັນນີ້ ກໍໄດ້ຜ່ານດຳລັດ ແລະ ຂໍ້ຕົກລົງ ວ່າດ້ວຍການການຍົກຍ້າຍ ແລະ ແຕ່ງຕັ້ງພະນັກງານ ຊຶ່ງໃນນີ້ ໄດ້ແຕ່ງຕັ້ງ ທ່ານ ວັນນະ ບຸບຜາ ໄປຮັບໜ້າທີ່ໃໝ່ ເປັນຫົວໜ້າຫ້ອງການ; ແຕ່ງຕັ້ງ ທ່ານ ນິມມະວົງ ອິນທະວົງ ເປັນຫົວໜ້າກົມແຂ່ງຂັນ ແລະ ຍ້ອງຍໍ; ແຕ່ງຕັ້ງ ທ່ານ ຄຳກອງ ລາວລີ ເປັນຫົວໜ້າກົມຄຸ້ມຄອງລັດຖະກອນ; ແຕ່ງຕັ້ງທ່ານ ລາຕີ ພິມມະຈັນ ໄປຮັບໜ້າທີ່ໃໝ່ ເປັນຮອງຫົວໜ້າກົມເອກະສານແຫ່ງຊາດ; ແຕ່ງຕັ້ງ  ທ່ານ ນາງ ນຸ່ນ ພົມມີໄຊ ເປັນຮອງຫົວໜ້າກົມແຜນທີ່;  ແຕ່ງຕັ້ງ ທ່ານ ນາງ ປາລິດາ ອິນທະວົງ ເປັນຮອງຫົວໜ້າກົມແຂ່ງຂັນ ແລະ ຍ້ອງຍໍ; ແຕ່ງຕັ້ງ ທ່ານ ສຸລິສຸກ ທໍ່ ເປັນຮອງຫົວໜ້າກົມເອກະສານ; ແຕ່ງຕັ້ງ ທ່ານ ນງ ສຸລິພອນ ອິນແສງ ເປັນຮອງຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ. ນອກຈາກນີ້ ຍັງໄດ້ປະກາດແຕ່ງຕັ້ງຂັ້ນຫົວໜ້າ ແລະ ຮອງຫົວໜ້າພະແນກ ແລະ ປະກາດສັບຊ້ອນ ຍົກຍ້າຍພະນັກງານໄປຮັບໜ້າທີ່ໃໝ່ຈຳນວນໜຶ່ງ.
ໃນໂອກາດດັ່ງກ່າວ,ທ່ານ ທອງຈັນ ມະນີໄຊ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງບັນດາທ່ານທີ່ໄດ້ຮັບນະໂຍບາຍອຸດໜູນບໍານານໃນຄັ້ງນີ້, ພ້ອມທັງສະແດງຄວາມຮູ້ບຸນຄຸນແລະຂອບໃຈເປັນຢ່າງສູງຕໍ່ການອຸທິດເຫື່ອແຮງ, ສະຕິປັນຍາຢ່າງບໍ່ຮູ້ອິດຮູ້ເມື່ອຍຂອງບັນດາທ່ານໃນໄລຍະຜ່ານມາ.  ພ້ອມກັນນັ້ນ ບັນດາທ່ານທີ່ຮັບການແຕ່ງຕັ້ງຕໍາແໜ່ງບໍລິຫານຂັ້ນຫົວໜ້າກົມ, ຮອງກົມ, ຫົວໜ້າພະແນກ, ຮອງຫົວໜ້າພະແນກແລະຍົກຍ້າຍສັບຊ້ອນບ່ອນປະຈໍາການໃນຄັ້ງນີ້ບັນດາທ່ານລ້ວນແລ້ວແຕ່ມີມາດຕະຖານ, ເງື່ອນໄຂຄົບຖ້ວນ, ເປັນຜູ້ທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້ຄວາມສາມາດແລະບົດຮຽນປະສົບການໃນການຈັດຕັ້ງປະຕິບັດວຽກງານມາແລ້ວ. ການແຕ່ງຕັ້ງຕຳແໜ່ງບໍລິຫານຂັ້ນຫົວໜ້າກົມ,ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກແລະການສັບຊ້ອນຍົກຍ້າຍພະນັກງານໄປຮັບໜ້າທີ່ໃໝ່ໃນຄັ້ງນີ້ແມ່ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່ຕິດພັນກັບຄວາມຮູ້ຄວາມສາມາດຂອງແຕ່ລະສະຫາຍທີ່ຖືກແຕ່ງຕັ້ງແລະສັບຊ້ອນຍົກຍ້າຍແລະເມື່ອຕໍາແໜ່ງບໍລິຫານຂັ້ນນັ້ນວ່າງລົງພ້ອມທັງເປັນການສ້າງພະນັກງານເພື່ອສືບຖອດປ່ຽນແທນໃນຕໍ່ໜ້າທັງໝົດນັ້ນຈະເປັນການເພີ່ມກຳລັງແຮງໃຫ້ແກ່ບັນດາຫົວໜ່ວຍການຈັດຕັ້ງໃຫ້ມີຄວາມເຂັ້ມແຂງ, ໜັກແໜ້ນເຕີບໃຫຍ່ຂະຫຍາຍຕົວແລະພັດທະນາຂຶ້ນເລື້ອຍໆພ້ອມກັນເຮັດສຳເລັດໜ້າທີ່ການເມືອງທີ່ໄດ້ຮັບມອບໝາຍດ້ວຍປະສິດທິພາບແລະປະສິດທິຜົນສູງກວ່າເກົ່າ. 
ຂ່າວ-ພາບ: ນາງແສງຈັນ