ແກ່ນທ້າວ ປະກາດແຕ່ງຕັ້ງຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ເມືອງ

ໃນພິທີ, ສະຫາຍ ພັນເອກ ສຸກສົມພອນ ທອງຄຳ ຫົວໜ້າຫ້ອງການ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ຜ່ານຂໍ້ຕົກລົງຂອງຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງ ສະບັບເລກທີ 36, ລົງວັນທີ 20 ເມສາ 2026 ວ່າດ້ວຍການແຕ່ງຕັ້ງຄະນະກໍາມະການປ້ອງກັນຊາດ-ປ້ອງກັນຄວາມສະຫງົບເມືອງແກ່ນທ້າວ ຊຶ່ງປະກອບມີ: ສະຫາຍ ຄໍາປຸ່ນ ນວນສະບັບ ເປັນປະທານ, ສະຫາຍ ສີຄານ ແກ່ນມະນີ ເປັນຮອງປະທານ, ສະຫາຍ ພັນໂທ ບຸນຍູ້ ອິນທະວອນ ເປັນຮອງປະທານ ທັງເປັນຜູ້ປະຈຳການ, ສະຫາຍ ພັນໂທ ອຸ່ນເຮືອນ ກັນທະວົງ ເປັນຮອງປະທານ, ສະຫາຍ ສັນຕິພາບ ປັນຍາສີ ເປັນກຳມະການ ແລະ ສະຫາຍ ພັນຕີ ວົງໄຊ ເຮືອງລິດເປັນກຳມະການ. ພ້ອມນີ້, ຍັງໄດ້ຜ່ານຂໍ້ຕົກລົງຂອງຄະນະກຳມະການປ້ອງກັນຊາດ-ປ້ອງກັນຄວາມສະຫງົບແຂວງ ສະບັບເລກທີ 38 ວ່າດ້ວຍຂອບເຂດສິດ ແລະ ໜ້າທີ່ຂອງຄະນະກຳມະການປ້ອງກັນຊາດ-ປ້ອງກັນຄວາມສະຫງົບຂັ້ນເມືອງ ເພື່ອເປັນບ່ອນອີງໃນການເຄື່ອນໄຫວວຽກງານໃຫ້ມີປະສິດທິພາບ.

ສະຫາຍ ເພັງນິລັນ ຄໍາພັນເພັງ ໄດ້ເນັ້ນໜັກໃຫ້ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບເມືອງຕ້ອງກໍາແໜ້ນ ແລະ ເຊື່ອມຊຶມສິດ-ໜ້າທີ່ຂອງຕົນຢ່າງລະອຽດຊັດເຈນ, ເອົາໃຈໃສ່ເຮັດວຽກງານສ່ອງແສງລາຍງານເປັນປົກກະຕິ, ບັນດາກໍາລັງຕ້ອງສືບຕໍ່ເສີມຂະຫຍາຍມູນເຊື້ອອັນດີງາມຂອງກອງທັບ, ເພີ່ມທະວີການສຶກສາອົບຮົມການເມືອງ-ນໍາພາແນວຄິດໃຫ້ພະນັກງານນັກຮົບ, ຍົກສູງສະຕິລະວັງຕົວ, ກໍາແໜ້ນສະພາບການຮອບດ້ານ ແລະ ປັບປຸງກໍາລັງໃຫ້ມີຄວາມເຂັ້ມແຂງ ເພື່ອປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນເມືອງໃຫ້ດີຂຶ້ນເລື້ອຍໆ.

ໂອກາດນີ້, ສະຫາຍເລຂາຄະນະບໍລິຫານງານພັກແຂວງ ຍັງໄດ້ມອບພາຫະນະ (ລົດສິ້ງ) ຈໍານວນ1 ຄັນໃຫ້ກອງຮ້ອຍທະຫານຊາຍແດນ 158 ຄຸ້ມຄອງ ເພື່ອນໍາໃຊ້ເຂົ້າວຽກງານລວມຂອງກົມກອງໃຫ້ເກີດປະໂຫຍດສູງສຸດ ແລະ ນໍາໃຊ້ໄດ້ຢ່າງຍາວນານ.

(ແຫຼ່ງຂ່າວ: ເມືອງແກ່ນທ້າວ)