ແກ່ນທ້າວປະຕິບັດວາລະແຫ່ງຊາດສຳເລັດຫຼາຍດ້ານ

 ເປັນແຕ່ລະໜ້າວຽກ ໂດຍອີງໃສ່ທ່າແຮງຂອງທ້ອງຖິ່ນ ສຸມໃສ່ຊຸກຍູ້ສົ່ງເສີມການຜະລິດສະບຽງອາຫານໃຫ້ພຽງພໍກັບການສະໜອງຊົມໃຊ້ພາຍໃນ,ທົດແທນການນຳເຂົ້າ ແລະ ສົ່ງອອກເປັນສິນຄ້າເປັນຕົ້ນການຜະລິດເຂົ້າ, ຜະລິດພືດຜັກ, ການລ້ຽງສັດໃຫຍ່(ຄວາຍ,ງົວ), ແບ້,ປາ,ໄຂ່ແລະອື່ນໆ.ຕິດພັນກັບການຈັດຕັ້ງກຸ່ມຜະລິດ,ຫົວໜ່ວຍທຸລະກິດກະສິກຳໃຫ້ມີຄວາມເຂັ້ມແຂງ.
5 ປີຜ່ານ(2020-2024)ເມືອງແກ່ນທ້າວ ໄດ້ຊຸກຍູ້ການຈັດຕັ້ງກຸ່ມຜະລິດກະສິກຳດ້ານການປູກ - ການລ້ຽງໄດ້ທັງໝົດ 45 ກຸ່ມ, ມີ 23 ບ້ານ, ມີສະມາຊິກທັງໝົດ 806 ຄົນຍິງ 182 ຄົນ, ທຽບໃສ່ ປີ 2019 ເພີ່ມຂຶ້ນ 20 ກຸ່ມ, ເທົ່າກັບ 44.44% ໃນນີ້: ກຸ່ມລ້ຽງງົວມີ 15 ກຸ່ມ, ມີສະມາຊິກ 298 ຄົນ, ມີສັດ ຈໍານວນ 3.601 ໂຕ; ກຸ່ມລ້ຽງໝູ 6 ກຸ່ມ, ມີສະມາຊິກ 67 ຄົນ, ມີສັດ 828 ໂຕ; ກຸ່ມປູກເຂົ້າ 1 ກຸ່ມ, ມີສະມາຊິກກຸ່ມ 50 ຄົນ, ມີເນື້ອທີ່ 74.66 ເຮັກຕາ; ກຸ່ມປູກມັນຕົ້ນ 10 ກຸ່ມ, ມີສະມາຊິກ 192 ຄົນ, ມີເນື້ອທີ່ 441.92 ເຮັກຕາ; ກຸ່ມປູກພືດຜັກ 3 ກຸ່ມ, ມີສະມາຊິກ 33 ຄົນ, ເນື້ອທີ່ 6.80 ເຮັກຕາ, ກຸ່ມປູກສາລີ 1 ກຸ່ມ, ມີສະມາຊິກກຸ່ມ 15 ຄົນ, ເນື້ອທີ່ 65 ເຮັກຕາ; ກຸ່ມປູກໝາກຂາມຫວານ 1 ກຸ່ມ, ສະມາຊິກ 20 ຄົນ, ເນື້ອທີ່ 13.51 ເຮັກຕາແລະກຸ່ມປູກຢາງພາລາ 8 ກຸ່ມ, ມີສະມາຊິກກຸ່ມ 131 ຄົນ,ເນື້ອທີ່ 171.86 ເຮັກຕາ; ພ້ອມດຽວກັນນັ້ນກໍສາມາດສ້າງຄອບຄົວຕົວແບບໄດ້ 18 ຄອບຄົວ ໃນນີ້:ຕົວແບບດ້ານການປູກ 10 ຄອບຄົວ, ຕົວແບບການລ້ຽງ 8 ຄອບຄົວ.
5 ປີຜ່ານມາສາມາດກວດກາ ແລະຢັ້ງຢືນແຫຼ່ງກໍາເນີດສິນຄ້າ ພືດກະສິກໍາ,ເມັດພັນພືດອາຫານສັດ ແລະ ເສດພືດກະສິກໍາເພື່ອເຄື່ອນຍ້າຍພາຍໃນ ແລະ ອອກຕ່າງປະເທດ ທັງໝົດ 2.136,470 ໂຕນ, ຜົນຜະລິດສົ່ງອອກ ເພີ່ມຂຶ້ນ 1.994,742 ໂຕນ, ລວມມູນຄ່າ 50.174 ຕື້ກີບ, ສະເລ່ຍ 10,034.8 ຕື້ກີບຕໍ່ປີ; ສຳລັບການດຸ່ນດ່ຽງເຂົ້າເພື່ອບໍລິໂພກພາຍໃນປີ 2024 ພວກເຮົາສາມາດຜະລິດເຂົ້າໄດ້ທັງໝົດ 31,367.45 ໂຕນ ໃນນີ້: ແນວພັນ 456.52 ໂຕນ, ແຮສຸກເສີນ 3,629.02 ໂຕນ; ບໍລິໂພກພາຍໃນ 10,199.35 ໂຕນ, ເສຍຫາຍຫຼັງເກັບກ່ຽວ 10% ເທົ່າກັບ 3,136.74 ໂຕນແລະ ສາມາດຂາຍເປັນສິນຄ້າ 24,505.15 ໂຕນ.ໄດ້ຊຸກຍູ້ ໃຫ້ບໍລິສັດທີ່ມີເງື່ອນໄຂສ້າງຕັ້ງໂຮງງານບົດຫີນຈຳນວນ 1 ແຫ່ງ (ພູດູ່ບ້ານຫ້ວຍເປັດ), ໂຮງງານປັ້ນອິດ 31 ແຫ່ງ,ໂຮງງານອົບແຫ້ງສາລີ - ລານຕາກມັນຕົ້ນ 17 ແຫ່ງ, ສາງເກັບມ້ຽນແລະລ້າງໝາກແຕງຍີ່ປຸ່ນ 1 ແຫ່ງ, ໂຮງງານເຂົ້າປຸ້ນ 6 ແຫ່ງ, ປັບປຸງໂຮງສີເຂົ້າ 11 ແຫ່ງ.
ສໍາລັບວຽກການສ້າງຄວາມເຂັ້ມແຂງດ້ານການຈັດເກັບລາຍຮັບງົບປະມານ ເມືອງໄດ້ຈັດຕັ້ງປະຕິບັດຄຳສັ່ງເລກທີ 18/ນຍວ່າດ້ວຍການເພີ່ມທະວີການຄຸ້ມຄອງແລະຕ້ານການຮົ່ວໄຫຼຂອງລາຍຮັບງົບປະມານຊຶ່ງໄດ້ສ້າງເງື່ອນໄຂໃນການເກັບຖານລາຍຮັບໃໝ່ຈຳນວນໜຶ່ງແລະຫັນເປັນທັນສະໄໝ ເພື່ອອັດການຮົ່ວໄຫຼຂອງລາຍຮັບງົບປະມານເປັນຕົ້ນ:ການປັບປຸງລະບົບການແຈ້ງພາສີ, ການແກ້ໄຂລົດນຳເຂົ້າທີ່ບໍ່ຖືກຕ້ອງ, ການເຊື່ອມຂໍ້ມູນດ້ານລາຍຮັບຜ່ານລະບົບຄຸ້ມຄອງທັນສະໄໝແລະອື່ນໆ ຊຶ່ງສາມາດເກັບລາຍຮັບງົບປະມານເພີ່ມຂຶ້ນໃນແຕ່ລະປີ.
ກ່ຽວກັບການສົ່ງເສີມການປະຢັດ,ຕ້ານການຟຸ່ມເຟືອຍແລະການແກ້ໄຂໜີ້ສິນ, ອັນພົ້ນເດັ່ນໄດ້ສຸມໃສ່ການປະຕິບັດນິຕິກຳດ້ານການປະຕິບັດລາຍຈ່າຍໂດຍສະເພາະດຳລັດເລກທີ 205/ລບແລະດຳລັດ 599/ລບ,ໄດ້ເຮັດໃຫ້ລາຍຈ່າຍງົບປະມານຮັດກຸມຂຶ້ນໃນແຕ່ລະປີໂດຍສະເພາະລາຍຈ່າຍດ້ານບໍລິຫານ ແລະ ດັດສົມສົ່ງເສີມ ສະເລ່ຍແລ້ວຫຼຸດລົງ 0.84% ຕໍ່ປີ; ການປະຕິບັດດຳລັດວ່າດ້ວຍລົດຂອງລັດສະບັບເລກທີ 599/ນຍ, ສາມາດເກັບກຳຂໍ້ມູນລົດລັດຈຳນວນ 72 ຄັນ (ລົດໃຫຍ່ 23 ຄັນ, ລົດຈັກ 49 ຄັນ) ໃນນີ້: ສຳເລັດການຕິດປ້າຍສະຕິກເກີແລ້ວ 63 ຄັນ, ເທົ່າກັບ 87.5%, ໃນນີ້ລົດໃຫຍ່ຈຳນວນ 14 ຄັນເທົ່າກັບ 60.86% (ຍັງລົດໃຫຍ່ 9 ຄັນ), ລົດຈັກ 49 ຄັນ, ເທົ່າກັບ 100%; ໄປພ້ອມດຽວກັນນີ້ເພື່ອຮັບປະກັນເຮັດໃຫ້ກົງຈັກການຈັດຕັ້ງມີຄວາມກະທັດຮັດຕາມທິດປະຢັດພວກເຮົາຍັງໄດ້ປັບປຸງກົງຈັກການຈັດຕັ້ງຂັ້ນຫ້ອງການເຮັດໃຫ້ໜ່ວຍງານຫຼຸດ 29% ຂອງໜ່ວຍງານທັງໝົດ, ໄດ້ຂຽນແຜນກຳນົດຕຳແໜ່ງງານສຳເລັດແລະຮັບຮອງຈາກສາຍຕັ້ງແຂວງແລ້ວ 95.65%.
ໄດ້ສຸມໃສ່ຢ່າງຕັ້ງໜ້າໃນການຄຸ້ມຄອງການສົ່ງອອກແລະນຳເຂົ້າສິນຄ້າໃນນີ້ມູນຄ່າການສົ່ງອອກສິນຄ້າໄປຕ່າງປະເທດມີທ່າອ່ຽງເພີ່ມຂຶ້ນຊຶ່ງ 5 ປີຜ່ານມາສາມາດສົ່ງອອກສິນຄ້າໄປຕ່າງປະເທດໄດ້ທັງໝົດ 1,394.019 ໂຕນ, ລວມມູນຄ່າທັງໝົດ 163,737,415 ໂດລາ, ທຽບໃສ່ໄລຍະ 5 ປີຜ່ານມາມູນຄ່າການສົ່ງອອກເພີ່ມຂຶ້ນ 99.82% ແລະສາມາດຄຸ້ມຄອງການນຳເຂົ້າສິນຄ້າຈາກຕ່າງປະເທດ ໄດ້ທັງໝົດ 453,420,966 ຫົວໜ່ວຍ, ມູນຄ່າ 1,090,505,065 ໂດລາ, ທຽບໃສ່ໄລຍະ 5 ປີ ຜ່ານມາ ແມ່ນເພີ່ມຂຶ້ນ 2 ເທົ່າຕົວ.ສິນຄ້ານຳເຂົ້າສ່ວນຫຼາຍແມ່ນນ້ຳມັນເຊື້ອໄຟ, ພາຫະນະ, ຊິ້ນສ່ວນອາໄລ່, ເຄື່ອງກໍ່ສ້າງ, ເຄື່ອງໃຊ້ໄຟຟ້າ ແລະ ເຄື່ອງອຸປະໂພກ-ບໍລິໂພກ.