ຄໍາມ່ວນ-ກວາງຈິ ລົງນາມສືບຕໍ່ຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານຫວຽດນາມ

ເນື້ອໃນບົດບັນທຶກ ທັງສອງຝ່າຍໄດ້ເຫັນດີເປັນເອກະພາບ ໃນການສືບຕໍ່ຮ່ວມກັນຮັກສາມູນເຊື້ອ, ຮັດ ແໜ້ນຄວາມສາມັກຄີ, ມິດຕະພາບ, ປະສານສົມທົບໃນການປະຕິບັດໜ້າທີ່ ຊອກຫາ, ຂຸດຄົ້ນອັດຖິນັກຮົບ ທະຫານອາສາສະໝັກ ແລະ ຊ່ຽວຊານຫວຽດນນາມ ທີ່ເສຍສະຫຼະຊີວິດຢູ່ພື້ນທີ່ແຂວງຄໍາມ່ວນ ເພື່ອນໍາເອົາກັບຄືນປະເທດ ແລະ ສົ່ງສະການຢູ່ປະເທດຫວຽດນາມໃຫ້ຖືກຕ້ອງຕາມລະບຽບຂອງກອງທັບ, ສ້າງເງື່ອນໄຂອຳນວຍຄວາມສະດວກໃຫ້ກອງປະຕິບັດງານພິເສດ 589 ກອງບັນຊາການທະຫານແຂວງກວາງຈິ ສືບຕໍ່ປະ ຕິບັດຕາມແຜນການ ຊອກຫາ, ຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດທີ່ແຂວງຄໍາມ່ວນໃນລະດູແລ້ງສົກປີ 2026 - 2027 ຊຶ່ງສຸມໃສ່ບັນດາເມືອງຄື: ເມືອງມະຫາໄຊ, ຍົມມະລາດ, ໄຊບົວທອງ, ບົວລະພາ ແລະ ບັນດາຕົວເມືອງອື່ນໆ ຂອງແຂວງຄໍາມ່ວນ, ປະສານສົມທົບກັບບັນດາເມືອງໃນການໂຄສະນາເຜີຍແຜ່, ປຸກລະດົມຂົນຂວາຍປະຊາຊົນ ສະໜອງຂໍ້ມູນຂຸມຝັງສົບ, ຮັບປະກັນຄວາມປອດໄພ, ຊ່ວຍເຫຼືອຍາມສຸກເສີນ ແລະ ປິ່ນປົວພະຍາດໃຫ້ພະນັກງານ, ນັກຮົບຂອງກອງ 589 ໃນເວລາເຈັບເປັນ, ເກີດອຸບັດເຫດໃນໄລຍະທີ່ປະຕິບັດໜ້າທີ່ໃນແຂວງ, ຄະນະປະຕິບັດງານພິເສດສອງແຂວງ ມີໜ້າທີ່ຊີ້ນໍາບັນດາພະແນກການ, ຂະແໜງການ ແລະ ທ້ອງຖິ່ນທຸກຂັ້ນ ປະຕິບັດໃຫ້ດີກ່ຽວກັບລະບອບທາງດ້ານນະ ໂຍບາຍຕໍ່ຜູ້ທີ່ໄດ້ຮັບການແຕ່ງຕັ້ງໂດຍກົງຈາກອໍານາດການປົກຄອງ ໃຫ້ເຂົ້າຮ່ວມໃນການປະສານສົມທົບສໍາຫຼວດ, ເກັບກຳຂໍ້ມູນ ແລະ ຊອກຫາ, ຂຸດຄົ້ນອັດຖິນັກຮົບທະຫານອາສາສະໝັກ ແລະ ຊ່ຽວຊານຫວຽດນາມ ແລະ ປະຊາຊົນຜູ້ທີ່ໄດ້ສະໜອງຂໍ້ມູນຊີ້ບອກຈຸດຂຸມຝັງສົບນັກຮົບຢູ່ພື້ນທີ່ແຂວງຄໍາມ່ວນ ໃຫ້ຖືກຕາມລະບຽບກົດໝາຍຂອງ ສສ ຫວຽດນາມ. ທັງສອງຝ່າຍໄດ້ໃຫ້ຄຳໝັ້ນສັນຍາ ຈະຮັດແໜ້ນຄວາມສາມັກຄີ ແລະ ປະຕິ ບັດຕາມເນື້ອໃນບົດບັນທຶກຢ່າງເຂັ້ມງວດ. ຫາກມີບັນຫາເກີດຂຶ້ນໃໝ່ ຈະຮ່ວມກັນແລກປ່ຽນ, ພິຈາລະນາແກ້ໄຂຢ່າງສອດຄ່ອງ ແລະ ມີປະສິດທິພາບ.

ຂ່າວ: ກອງຄໍາ