ຄະນະໂຄສະນາ-ອົບຮົມ ເມືອງພຽງ ແຂວງໄຊຍະບູລີ ຈັດພິທີປາຖະກະຖາ 4 ວັນສຳຄັນປະຫວັດສາດຂອງພັກ-ຂອງຊາດ.

ຄະນະໂຄສະນາ-ອົບຮົມເມືອງພຽງ ແຂວງໄຊຍະບູລີ ໄດ້ຈັດພິທີປາຖະກະຖາ 4 ວັນສຳຄັນປະຫວັດສາດຂອງພັກ-ຂອງຊາດ ຄື:ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງຄົບຮອບ 65 ປີ,ວັນໄຊຊະນະດຽນບຽນຟູ ຄົບຮອບ 70 ປີ, ວັນວິລະກຳການໂຕນຄຸກຢ່າງມະຫັດສະຈັນຂອງບັນດາທ່ານຜູ້ນຳຂອງພັກ ແລະແນວລາວຮັກຊາດຄົບຮອບ 64 ປີ,ວັນເກີດຂອງປະທານໂຮຈີມິນ ຄົບຮອບ 134ປີຢູ່ທີ່ຫ້ອງປະຊຸມຂອງເມືອງ ໃນຕອນເຊົ້າວັນທີ 15 ພຶດສະພາ 2024, ໂດຍການເປັນກຽດເຂົ້້າຮ່ວມແລະໃຫ້ກຽດປາຖະກະຖາຂອງທ່ານ ບຸດສະກອນ ອິນທະລັງສີ ເລຂາພັກເມືອງເຈົ້າເມືອງໆພຽງ,ມີບັນດາຄະນະປະຈຳພັກເມືອງ, ກຳມະການພັກເມືອງຫົວໜ້າ-ຮອງຫົວໜ້າຫ້ອງການ, ພ້ອມບັນດາສະມາຊິກພັກ,ພະນັກງານອ້ອມຂ້າງເມືອງເຂົ້າຮ່ວມ.
ໃນພິທີທ່ານ ບຸດສະກອນ ອິນທະລັງສີ ໄດ້ໃຫ້ກຽດປາຖະກະຖາ ເລົ່າຄືນມູນເຊື້ອ 4 ວັນສໍາຄັນປະຫວັດສາດຂອງພັກ,ຂອງຊາດໃນຄັ້ງນີ້ໂດຍໄດ້ຍົກໃຫ້ເຫັນມູນເຊື້ອ,ຄວາມໝາຍຄວາມສຳຄັນຕະຫຼອດເຖິງການເຕີບໃຫຍ່ຂະຫຍາຍຕົວແລະມູນເຊື້ອຄຸນງາມຄວາມດີໃນແຕ່ລະໄລຍະໃຫ້ແກ່, ສະມາຊິກພັກ,ພະນັກງານນາຍ ແລະ ພົນທະຫານ ນາຍ ແລະ ພົນຕຳຫລວດໄດ້ຮັບຮູ້ເຂົ້າໃຈຢ່າງເລິກເຊິ່ງເພື່ອເຮັດໃຫ້ສະມາຊິກພັກ, ພະນັກງານ, ທະຫານ, ຕໍາຫຼວດ ໄດ້ມີຄວາມຮັບຮູ້, ເຂົ້າໃຈ ແລະ ຮ່ໍາຮຽນເອົາແບບຢ່າງ ຂອງຜູ້ນໍາ, ມີນໍ້າໃຈຮັກຊາດອັນ ສູງສົ່ງ ແລະ ຄວາມອົງອາດກ້າຫານ, ຄວາມເດັດດ່ຽວໜຽວແໜ້ນ ຂອງນັກຮົບປະຕິວັດໃນຂະ ບວນການຕໍ່ສູ້ປົດປ່ອຍຊາດ ໃນເມື່ອກ່ອນທັງເປັນການທົບທວນຫວນຄືນມູນເຊື້ອອົງອາດກ້າຫານ ຂອງກອງທັບ, ຂອງຜູ້ນໍາພັກ-ລັດ ໂດຍສະເພາະແມ່ນ ການນໍາພາຊີ້ນໍາອັນສະຫຼາດຊ່ອງໃສ ຂອງພັກໃນການຜ່າວົງປິດລ້ອມ ຂອງກອງພັນທີ 2 ວິລະຊົນ ແລະ ວິລະກໍາໂຕນຄຸກຢ່າງມະຫັດສະຈັນ ຂອງຜູ້ນໍາພັກ.ແລະເສີມຂະຫຍາຍມູນເຊື້ອຄວາມສາມັກຄີ ແລະ ການຮ່ວມສໍາພັນສູ້ຮົບຕ້ານຈັກກະ ພັດລ່າເມືອງຂຶ້ນຝຣັ່ງ ຂອງກອງທັບ ແລະ ປະຊາຊົນ 3 ຊາດ ອິນດູຈີນ ລາວ-ຫວຽດນາມ-ກໍາປູເຈຍ ໃນການຮ່ວມມືໃນໄລຍະໃໝ່ ໃຫ້ຂະຫຍາຍຕົວຍິ່ງຂຶ້ນ.ພ້ອມທັງປຸກລະດົມປວງຊົນລາວທັງຊາດ, ເວົ້າສະເພາະປະຊາຊົນຊາວເມືອງພຽງ ໃຫ້ສືບຕໍ່ສ້າງສາພັດທະນາເມືອງພຽງຢ່າງບໍ່ຢຸດຢັ້ງພ້ອມກັນປະກອບສ່ວນເຂົ້າໃນພາລະກິດປົກປັດຮັກສາແລະສ້າງສາພັດທະນາປະເທດຊາດສືບທອດຕໍ່ໄປ. ໂດຍ: ແສງສຸດາ ກິ່ງສະຫວັດ.