ຄະນະໂຄສະນາອົບຮົມສູນກາງພັກ ປະກາດການຈັດຕັ້ງ

ໃນພິທີ, ສະຫາຍ ນາງ ກັນລະຍາ ແສງແກ້ວວົງພະຈັນ ຮອງຫົວໜ້າກົມຄຸ້ມຄອງ-ພະນັກງານຄະນະຈັດຕັ້ງສູນກາງພັກ ຂຶ້ນຜ່ານຄໍາສັ່ງ ແລະ ມະຕິຕົກລົງ ຂອງຄະນະເລຂາທິການສູນກາງພັກ, ຄໍາສັ່ງ ວ່າດ້ວຍການຍົກຍ້າຍພະນັກງານການນໍາຂັ້ນສູງ ໄປຮັບໜ້າທີ່ໃໝ່, ກົມການເມືອງສູນກາງພັກ ອອກຄຳສັ່ງ ຍົກຍ້າຍ ສະຫາຍ ໂພໄຊ ໄຂຄຳພິທູນ ກຳມະການສູນກາງພັກ ຮອງເລຂາຄະນະບໍລິຫານງານພັກແຂວງ ສະຫວັນນະເຂດ ໄປຮັບໜ້າທີ່ໃໝ່ຢູ່ ຄະນະໂຄສະນາອົບຮົມສູນກາງພັກ.

ຄະນະເລຂາທິການສູນກາງພັກ ມະຕິຕົກລົງ ວ່າດ້ວຍການແຕ່ງຕັ້ງ ຮອງຫົວໜ້າຄະນະໂຄສະນາອົບຮົມສູນກາງພັກ, ຄະນະເລຂາທິການສູນກາງພັກ ຕົກລົງແຕ່ງຕັ້ງ ສະຫາຍ ໂພໄຊ ໄຂຄຳພິທູນ ກຳມະການສູນກາງພັກ ເປັນຮອງຫົວໜ້າຄະນະໂຄສະນາອົບຮົມສູນກາງພັກ.

ໂອກາດດັ່ງກ່າວ, ສະຫາຍ ຄໍາພັນ ເຜີຍຍະວົງ ໄດ້ໃຫ້ກຽດໂອ້ລົມ ຊຶ່ງມີເນື້ອໃນທີ່ສໍາຄັນບາງຕອນວ່າ: ວຽກງານໂຄສະນາອົບຮົມ ເປັນວຽກງານສໍາຄັນຂອງພັກ-ລັດ ສະນັ້ນ ຂັ້ນເທິງ ຈຶ່ງໄດ້ເພີ່ມຈຳນວນຄະນະນໍາຂັ້ນສູງ ຂອງ ຄອສພ ຕື່ມອີກ ເພື່ອຊ່ວຍໃນການຊີ້ນໍາ-ນໍາພາວຽກງານວິຊາສະເພາະ ໃນສະເພາະໜ້າ ແລະ ຍາວນານ ໃຫ້ມີການປ່ຽນແປງໃໝ່ທາງດ້ານປະລິມານ ແລະ ຄຸນນະພາບ ແລະ ມີຄວາມເຊື່ອໝັ້ນວ່າ ດ້ວຍປະສົບການ ຂອງ ສະຫາຍ ໂພໄຊ ໄຂຄໍາພິທູນ ທີ່ມີນັ້ນຈະຫັນບົດຮຽນ-ຄວາມຮູ້ທີ່ມີເຂົ້າສູ່ວຽກງານຕົວຈິງ ໃຫ້ປະກົດຜົນຢ່າງເປັນຮູບປະທໍາ, ຈາກນັ້ນ ຍັງໄດ້ຍ້ອງຍໍ, ຊົມເຊີຍ ຕໍ່ສະຫາຍ ໂພໄຊ ໄຂຄໍາພິທູນ ຈົ່ງສືບຕໍ່ໃນການປະຕິບັດໜ້າທີ່ວຽກງານ ຄອສພ ໃນໄລຍະໃໝ່ ແລະ ຍັງໄດ້ຮຽກຮ້ອງມາຍັງຄະນະນໍາ ທົ່ວ ຄອສພ ຈົ່ງໃຫ້ການສະໜັບສະໜູນ ຊ່ວຍເຫຼືອ ສະຫາຍ ໂພໄຊ ໄຂຄໍາພິທູນ ໃນການປະຕິບັດວຽກງານໃຫ້ສໍາເລັດຜົນ ຕາມທີ່ຂັ້ນເທິງມອບໝາຍ ແລະ ຈົ່ງສືບຕໍ່ບຸກບືນສູ້ຊົນຜ່ານຜ່າວຽກງານຕ່າງໆໃຫ້ເດີນແມ່ນແລ່ນສະດວກສົມທີ່ຂັ້ນເທິງໄວ້ເນື້ອເຊື່ອໃຈ.

(ຂ່າວ-ພາບ: ແສງຈັນ)