ຄະນະນຳ ຄອ ແຂວງຊຸກຍູ້ວຽກງານຢູ່ ນະຄອນ-ຫຼວງພະບາງ

ທ່ານ ນາງ ວຽນວິໄລ ດີລະພັນ ຫົວໜ້າຄະນະໂຄສະນາອົບຮົມ (ອຄ) ແຂວງຫຼວງພະບາງ ພ້ອມຄະນະລົງຊຸກຍູ້ວຽກງານຢູ່ ຄອ ນະຄອນ-ຫຼວງພະບາງ ເມື່ອບໍ່ດົນມານີ້ ໂດຍທ່ານໄດ້ຊີ້ນຳໃຫ້ ຄະນະໂຄສະນາອົບຮົມນະຄອນ-ຫຼວງພະບາງ ສືບຕໍ່ຈັດຕັ້ງປະຕິບັດວຽກງານໂຄສະນາສຶກສາອົບຮົມ ໃຫ້ເຂົ້າສູ່ລວງເລິກ ດ້ວຍຄຸນນະພາບໃໝ່, ເອົາໃຈໃສ່ຫຼາຍບັນຫານຳເອົາວຽກງານການເມືອງ-ແນວຄິດ ສອດຫ້ອຍເຂົ້າໄປທຸກຂົງເຂດວຽກງານ ແນໃສ່ຮັບໃຊ້ວຽກງານກອງປະຊຸມ 3 ຂັ້ນຂອງພັກ ໃຫ້ສົມກັບເປັນວຽກງານໂຄສະນາຂອງພັກ ຢ່າງແທ້ຈິງ.
ໂອກາດນີ້, ທ່ານ ວີ ເຮີເຊຍໄມ ຫົວໜ້າຄະນະໂຄສະນາອົບຮົມນະຄອນ-ຫຼວງພະບາງ ກໍໄດ້ລາຍງານສະພາບວຽກງານລວມຂອງ ຄະນະໂຄສະນາອົບຮົມນະຄອນ-ຫຼວງພະບາງ ໄລຍະ 9 ເດືອນຜ່ານມາ ໂດຍຍົກໃຫ້ເຫັນດ້ານດີທີ່ພົ້ນເດັ່ນ ແລະ ຂໍ້ຄົງຄ້າງຈຳນວນໜຶ່ງທີ່ຈະຕ້ອງໄດ້ພ້ອມກັນສືບຕໍ່ແກ້ໄຂ. ຈາກນັ້ນ, ໄດ້ມີການແລກປ່ຽນຄຳເຫັນດ້ານວິຊາສະເພາະ ລະຫວ່າງ ຄະນະໂຄສະນາອົບຮົມແຂວງ ກັບຄະນະໂຄສະນາອົບຮົມນະຄອນ ໂດຍໄດ້ຍົກເອົາວຽກງານຕົວຈິງຂຶ້ນມາແລກປ່ຽນ ກ່ຽວກັບວຽກງານໂຄສະນາ ແນວທາງນະໂຍບາຍຂອງພັກ, ກົດໝາຍຂອງລັດ ວັນສຳຄັນຂອງຊາດ, ຂອງພັກ, ຂອງທ່ານຜູ້ນຳ, ເຫດການທີ່ພົ້ນເດັ່ນພາຍໃນນະຄອນ-ຫຼວງພະບາງ, ວຽກງານສຶກສາອົບຮົມພະນັກງານ, ສະມາຊິກພັກ, ທະຫານ-ຕຳຫຼວດ ແລະ ປະຊາຊົນບັນດາເຜົ່າ, ວຽກງານເກັບກຳສັງລວມຫາງສຽງສັງຄົມ ພາຍໃນການຈັດຕັ້ງກົມກອງ ແລະ ສັງຄົມ, ວຽກງານບໍລິຫານ, ຈັດຕັ້ງ, ກວດກາ ພ້ອມທັງເປັນເອກະພາບ ກັບບັນດາຄຳເຫັນ ເພື່ອນຳໄປຈັດຕັ້ງປະຕິບັດ ແລະ ສືບຕໍ່ແກ້ໄຂຂໍ້ຄົງຄ້າງໃນຕໍ່ໜ້າ.
ພ້ອມກັນນີ້, ຄະນະໂຄສະນາອົບຮົມແຂວງຫຼວງພະບາງ ກໍໄດ້ມອບຄອມພີວເຕີຕັ້ງໂຕະ 1 ເຄື່ອງ, ປິ່ນເຕີ ຫຼື ເຄື່ອງພິມເອກະສານ 1 ເຄື່ອງ ແລະ ກ້ອງຖ່າຍຮູບ 1 ເຄື່ອງ ໃຫ້ຄະນະໂຄສະນາອົບຮົມນະຄອນ-ຫຼວງພະບາງ ນຳໃຊ້ເຂົ້າໃນວຽກງານ ໃຫ້ໄດ້ຮັບຜົນດີຂຶ້ນໄປເລື້ອຍໆ.
(ຂ່າວ: ສີປະເສີດ ພົມມະຈັນ)