 |
ການລົງເຄື່ອນໄຫວພົບປະມີຂຶ້ນໃນຕອນເຊົ້າວັນທີ 9 ກຸມພານີ້, ຊຶ່ງນໍາໂດຍ ທ່ານ ແກ້ວລັດຕະນະ ສີຫາວົງ ຄະນະປະຈຳພັກແຂວງ ຮອງປະທານສະພາປະຊາຊົນ ແຂວງຈຳປາສັກ ທັງເປັນຜູ້ສະໝັກເລືອກຕັ້ງນໍ້າເບີ 4 ປະຈຳເຂດເລືອກຕັ້ງທີ 15 ແຂວງຈຳປາສັກ, ພ້ອມກັບຜູ້ຮັບສະໝັກເລືອກຕັ້ງ ສສຊ ຄະນະທີ1, ໂດຍມີທ່ານ ຄຳຂອດ ໝື່ນຫຼວງ ຮອງເລຂາຄະນະບໍລິຫານງານພັກເມືອງ ປະທານຄະນະກຳມະການປົກຄອງເມືອງປາກຊ່ອງ, ມີທ່ານ ພັນໂທ ອິນປົນ ເພັດນາວາ ຫົວໜ້າພະແນກການເມືອງກອງພັນໃຫຍ່ ທະຫານຮາບ 502, ພອ້ມດ້ວຍຄະນະພັກ,ຄະນະບັນຊາ, ນາຍ ແລະ ພົນທະຫານ, ມີກອງພັນນ້ອຍ11,12,18 ແລະ ກອງພັນຕີພິເສດ 429 ເຂົ້າຮ່ວມຕ້ອນຮັບ.
 |
ການລົງພົບປະຄັ້ງນີ້, ໄດ້ຜ່ານປະຫວັດຫຍໍ້ຂອງຜູ້ສະໝັກແຕ່ລະທ່ານນັບແຕ່ນ້ຳເບີ1ຮອດນ້ຳເບີ 20.ຈາກນັ້ນ, ຄະນະຜູ້ສະໝັກໃນຄະນະທີ1 ກໍໄດ້ສະເໜີໂຕ ແລະ ພົບປະຕໍ່ຜູ້ມີສິດປ່ອນບັດເລືອກຕັ້ງໂດຍເລີ່ມຈາກນ້ຳເບີ4: ຄື ທ່ານ ແກ້ວລັດຕະນະ ສີຫາວົງ ຄະນະປະຈຳພັກແຂວງ ຮອງປະທານສະພາປະຊາຊົນແຂວງ ຜູ້ສະໝັກ ສສຊ ເຂດເລືອກຕັ້ງທີ15 ແຂວງຈຳປາສັກ ຕໍ່ດ້ວຍຜູ້ສະໝັກ ສສຊ ຕາມລຳດັບ ຊຶ່ງໃນນີ້, ຄະນະຜູ້ແທນໄດ້ສະແດງວິໄສທັດຂອງຕົນໃນການຮັບໃຊ້ປະຊົນ, ຖ້າໄດ້ຮັບການເລືອກຕັ້ງເປັນສະມາຊິກສະພາແຫ່ງຊາດຊຸດທີ X ແມ່ນຈະເປັນຕົວແທນທີ່ດີ, ເປັນຜູ້ຮັບຟັງແລກປ່ຽນຄຳຄິດຄໍາເຫັນທີ່ດີ ແລະ ຈະຮັບເອົາຄຳສະເໜີຂອງຜູ້ມີສິດເລືອກຕັ້ງ ນຳໄປສະເໜີຕໍ່ເພື່ອໃຫ້ພາກສ່ວນທີ່ກ່ຽວຂ້ອງພິຈາລະນາແກ້ໄຂ, ພ້ອມຮຽກຮ້ອງໃຫ້ເຫັນເຖິງບົດບາດຄວາມໝາຍ, ຄວາມສຳຄັນຂອງສະພາແຫ່ງຊາດ. ເພື່ອໃຫ້ຄະນະພັກ-ຄະນະບັນຊາ,ນາຍ ແລະ ພົນທະຫານ ໃຫ້ມີຄວາມຮັບຮູ້ເຂົ້າໃຈ ແລະ ກໍາແໜ້ນຢ່າງເລິກເຊິ່ງ ພ້ອມກັນປະຕິບັດສິດ,ພັນທະເອົາໃຈໃສ່ໄປໃຊ້ສິດຂອງຕົນໃນການເລືອກຕັ້ງ ຮັບປະກັນຜົນສຳເລັດໄດ້ຕາມຄາດໝາຍ.
(ຂ່າວ-ພາບ: ຈັນທະວີສັກ)
ຄໍາເຫັນ