ຂະແໜງການຄ້າຕ່າງປະເທດ 8 ແຂວງ ແລກປ່ຽນບົດຮຽນຮ່ວມກັນ

ກອງປະຊຸມພົບປະແລກປ່ຽນບົດຮຽນລະຫວ່າງຂະແໜງການຄ້າຕ່າງປະເທດ 8 ແຂວງ(ອຸດົມໄຊ, ສະຫວັນນະເຂດ, ຄຳມ່ວນ, ບໍລິຄຳໄຊ, ຈຳປາສັກ, ສາລະວັນ, ເຊກອງ, ອັດຕະປື) ຄັ້ງທີ 3 ໄດ້ຈັດຂຶ້ນຢ່າງເປັນທາງການໃນວັນທີ 22 ທັນວາຜ່ານມານີ້ທີ່ຫ້ອງປະຊຸມພະແນກອຸດສາຫະກຳ ແລະການຄ້າ(ອຄ)ແຂວງສະຫວັນນະເຂດ ໂດຍມີຫົວໜ້າ-ຮອງຫົວໜ້າພະແນກ, ຫົວໜ້າ-ຮອງຫົວໜ້າຂະແໜງ ແລະພະນັກງານວິຊາການທີ່ກ່ຽວຂ້ອງຂອງ 8 ແຂວງເຂົ້າຮ່ວມຢ່າງພ້ອມພຽງ.
ໂອກາດນີ້, ທ່ານ ວັນແສງ ແກ້ວບຸນພັນ ຫົວໜ້າພະແນກ ອຄ ແຂວງສະຫວັນນະເຂດ ກໍໄດ້ຂຶ້ນກ່າວຕ້ອນຮັບ ພ້ອມທັງກ່າວເປີດກອງປະຊຸມ ຊຶ່ງມີບາງຕອນວ່າ: ໂດຍປະຕິບັດຕາມບົດບັນທຶກກອງປະຊຸມພົບປະແລກປ່ຽນບົດຮຽນລະຫວ່າງຂະແໜງນໍາເຂົ້າ ແລະສົ່ງອອກ(ໃນເມື່ອກ່ອນ) ຂອງ 6 ແຂວງພາກເໜືອ, ພາກກາງ ແລະ ພາກໃຕ້ ຄັ້ງວັນທີ 23 ທັນວາ 2022 ທີ່ແຂວງຄຳມ່ວນຊຶ່ງຕາມກຳນົດເວລາປີນີ້, ພະແນກ ອຄ ແຂວງສະຫວັນນະເຂດ ໄດ້ເປັນເຈົ້າພາບຈັດກອງປະຊຸມ, ດັ່ງທີ່ຮັບຮູ້ວ່າ: ລັດຖະບານ ກໍຄືກະຊວງ ອຄ ໄດ້ເພີ່ມທະວີແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະໜີ້ສິນຕ່າງປະເທດ, ວຽກງານການຄ້າຕ່າງປະເທດ ກໍແມ່ນບຸລິມະສິດທີ 1 ຂອງກະຊວງໃນການຄຸ້ມຄອງການນຳເຂົ້າ-ສົ່ງອອກ, ໃນນີ້ ກໍຈະລວມເອົາວຽກງານອໍານວຍຄວາມສະດວກທາງດ້ານການຄ້າ ແລະການຂົນສົ່ງ, ວຽກງານການຢັ້ງຢືນແຫຼ່ງກຳເນີດສິນຄ້າ, ວຽກງານການຄ້າຊາຍແດນ ແລະວຽກງານເຊື່ອມໂຢງສາກົນ ແລະອື່ນໆ ທີ່ຕິດພັນ ຊຶ່ງໃນການປະຕິບັດຕົວຈິງ ເຊື່ອວ່າແຕ່ລະແຂວງກໍຈະມີຜົນສຳເລັດ ແລະຂໍ້ຄົງຄ້າງແຕກຕ່າງກັນ ທີ່ຈະຕ້ອງພ້ອມກັນແກ້ໄຂໃຫ້ທັນກັບສະພາບການຂອງປະເທດ.
ເຖິງຢ່າງໃດກໍຕາມ, ຄຽງຄູ່ກັບຜົນສຳເລັດທີ່ປະຕິບັດໄດ້ນັ້ນ, ພວກເຮົາກໍຍັງມີຫຼາຍບັນຫາ ທີ່ຕ້ອງໄດ້ພ້ອມກັນສືບຕໍ່ປະສານສົມທົບ, ຮ່ວມມືກັນແກ້ໄຂບັນດາບັນຫາທີ່ເປັນອຸປະສັກ ແລະຂໍ້ຄົງຄ້າງໃຫ້ແກ່ການຄ້າເປັນຕົ້ນ: ການຈັດຕັ້ງປະຕິບັດຕາມແຈ້ງການຂອງຫ້ອງການກະຊວງ ໃນການລົງທະບຽນເປັນຜູ້ນຳເຂົ້າ-ສົ່ງອອກ, ການເປັນເຈົ້າການປະຕິບັດດຳລັດວ່າດ້ວຍກອງເລຂາວຽກອຳນວຍຄວາມສະດວກທາງດ້ານການຄ້າ ແລະການຂົນນສົ່ງ, ການຈັດຕັ້ງປະຕິບັດອອກໃບຢັ້ງຢືນແຫຼ່ງກຳເນີດສິນຄ້າພາຍໃຕ້ສັນຍາອາຊຽນຜ່ານທາງອອນລາຍ ຫຼື ຜ່ານທາງລະບົບ E-CO ຢ່າງດຽວໃຫ້ໄດ້ 100% ນັບຕັ້ງແຕ່ວັນທີ 1 ມັງກອນ 2024 ເປັນຕົ້ນໄປ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການລາຍງານຫຍ້ໍກ່ຽວກັບການຈັດຕັ້ງປະຕິບັດບົດບັນທຶກຮ່ວມກັນໃນໜຶ່ງປີຜ່ານມາ ແລະວຽກງານທີ່ພົ້ນເດັ່ນຂອງແຕ່ລະແຂວງ ຈາກນັ້ນກໍຈະໄດ້ມີການແລກປ່ຽນບົດຮຽນກັນໃນຫຼາຍຫົວຂໍ້ເປັນຕົ້ນ: ການປະຕິບັດວຽກງານກອງເລຂາ ໜ່ວຍງານອຳນວຍຄວາມສະດວກທາງດ້ານການຄ້າຂັ້ນແຂວງ ໂດຍສະເພາະການກຳນົດແຜນລະອຽດໃນການຈັດຕັ້ງປະຕິບັດໃນປີ 2024-2027, ການສົ່ງອອກສິນຄ້າກະສິກຳ(ໂດຍສະເພາະການສົ່ງອອກໄປປະເທດທີ່ຜ່ານການເຈລະຈາເປີດຕະຫຼາດ SPS), ການກຳນົດລາຄາສົ່ງອອກ ແລະໂກຕ້າສົ່ງອອກສິນຄ້າກະສິກຳ(ປະເພດມັນຕົ້ນ, ຢາງພາລາ) ແນໃສ່ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ແລະປະສິດທິຜົນສູງ.
(ຂ່າວ-ພາບ: ສະຫວັນນະເຂດ)