ແຂວງຜົ້ງສາລີ ປາຖະກະຖາມູນເຊື້ອວັນແພດລາວ

ທ່ານ ຄຳເຫຼັກ ໃຈອີສານ ໄດ້ປາຖະກະຖາ ໂດຍຍົກໃຫ້ເຫັນເຖິງມູນເຊື້ອ ປະຫວັດຄວາມເປັນມາຂອງການກຳເນີດວັນແພດລາວ ແລະ ຜົນງານຂອງພະນັກງານແພດໝໍ ຂອງລາວຕະຫຼອດໄລຍະຜ່ານມາ ທີ່ໄດ້ເສຍສະຫຼະ ອຸທິດສະຕິປັນຍາ ແລະ ເຫື່ອແຮງຂອງຕົນໃນການປະຕິບັດໜ້າທີ່ ແລະ ຮັກສາສຸຂະພາບຂອງປະຊາຊົນບັນດາເຜົ່າ, ເຮັດໃຫ້ປະຊາຊົນມີສຸຂະພາບທີ່ດີໆ. ກ່ຽວກັບວັນປະຫວັດສາດດັ່ງກ່າວ ຫຼາຍປະເທດແມ່ນໄດ້ຖືເອົາວັນທີ່ 30 ມີນາ ປີ 1933, ຊຶ່ງເປັນວັນນຳໃຊ້ຍາສະຫຼົບທົ່ວໄປ ໃນການຜ່າຕັດ ແລະ ໄດ້ຖືເປັນວັນແພດໂລກ. ຈັນຍາບັນແພດໂລກແມ່ນສືບທອດປະຕິບັດຕາມຄຳປະຕິຍານ 7 ຂໍ້ຂອງທ່ານ ຮີບໂປກຣາດ ຊຶ່ງເປັນທ່ານໝໍຜູ້ທີ່ຍິ່ງໃຫຍ່ ໃນສະໄໝເກຣັກບູຮານ, ຜູ້ເປັນບິດາຂອງແພດໂລກ ທີ່ໄດ້ສາບານຕົນເອງ ເພື່ອກອບກູ້ຊີວິດມວນມະນຸດ ໃຫ້ພົ້ນຈາກໂລກໄພໄຂ້ເຈັບທັງປວງ ແລະ ເພື່ອໃຫ້ແພດໃນທົ່ວໂລກໄດ້ປະຕິຍານຕາມເນື້ອໃນຂອງຄຳປະຕິຍານນັ້ນ ອັນແມ່ນກົກເຄົ້າຂອງຈັນຍາບັນແພດ ຈົນມາເຖິງປັດຈຸບັນ. ຈາກນັ້ນ, ແຕ່ລະຊາດ ໄດ້ກຳນົດໃຫ້ມີວັນແພດຂອງຕົນ ໂດຍສະເພາະແມ່ນ ສປປ ລາວ ໄດ້ຖືເອົາວັນທີ່ 18 ມິຖຸນາ 1965.

ໂອກາດນີ້, ຍັງໄດ້ມອບໃບຍ້ອງຍໍຂອງທ່ານເຈົ້າແຂວງໃຫ້ແກ່ບຸກຄົນດີເດັ່ນໃນການແຂ່ງຂັນ-ຍ້ອງຍໍ, ຮັກຊາດ ແລະ ພັດທະນາແຂວງຜົ້ງສາລີ ປະຈຳປີ 2023. ໃນນີ້, ພະແນກສາທາລະນະສຸກແຂວງ 62 ທ່ານ, ໂຮງໝໍແຂວງ 61 ທ່ານ ແລະ ມອບໃບຍ້ອງຍໍຂອງທ່ານເຈົ້າເມືອງບູນເໜືອ ໃຫ້ແກ່ກົມກອງ, ບຸກຄົນ ແລະ ບ້ານທີມີຜົນງານດີເດັ່ນໄດ້ປະກອບສວ່ນໃນການປົກປັກຮັກສາ ແລະ ສ້າງສາພັດທະນາປະເທດຊາດ ປະຈຳປີ 202.

(ຂ່າວ: ສົມຄິດ)