ແຂວງໄຊຍະບູລີ ຖອດຖອນບົດຮຽນການຈັດຕັ້ງປະຕິບັດວຽກງານປະຕູດຽວ

ກອງປະຊຸມຖອດຖອນບົດຮຽນ ກ່ຽວກັບການຈັດຕັ້ງປະຕິບັດ ວຽກງານປະຕູດຽວພາຍໃນແຂວງໄຊຍະບູລີ ໄດ້ຈັດຂຶ້ນໃນວັນທີ 7 ທັນວາ 2023 ທີ່ຫ້ອງວ່າການແຂວງໄຊຍະບູລີ, ເຂົ້າຮ່ວມເປັນປະທານໂດຍ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງ, ມີເຈົ້າເມືອງ, ຫົວໜ້າຫ້ອງການ 11 ເມືອງ, ດ່ານສາກົນຂົວມິດຕະພາບນໍ້າເຫືອງ ແລະ ພະນັກງານສູນບໍລິການປະຕູດຽວເຂົ້າຮ່ວມໂດຍຜ່ານລະບົບ ວິດີໂອທາງໄກ.
ໃນກອງປະຊຸມ ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄດ້ກ່າວເປີດກອງປະຊຸມບາງຕອນທ່ານໄດ້ກ່າວວ່າ:ການບໍລິການຜ່ານປະຕູດຽວແມ່ນກົນໄກການແກ້ໄຂວຽກງານໃຫ້ແກ່ການຈັດຕັ້ງ ແລະ ປະຊາຊົນໃນຂອບເຂດສິດຂອງອົງການບໍລິຫານລັດນັບແຕ່ການຮັບຄໍາສະເໜີ, ຮັບເອກະສານຕ່າງໆໂດຍຜ່ານໜ່ວຍບໍລິຫານລັດພຽງບ່ອນດຽວຊຶ່ງມີຈຸດປະສົງເພື່ອປັບປຸງການພົວພັນວຽກງານລະຫວ່າງອົງການບໍລິຫານລັດກັບປະຊາຊົນ, ຜູ້ປະກອບການ ແລະ ອົງການຈັດຕັ້ງທຸກຂັ້ນໃຫ້ມີການປ່ຽນແປງທີ່ດີຂຶ້ນ, ຫຼຸດຜ່ອນຄວາມຫຍຸ້ງຍາກໃຫ້ແກ່ປະຊາຊົນ, ທັງເປັນການຕ້ານ ແລະ ສະກັດກັ້ນພະຍາດອາດຍາສິດ, ສໍ້ລາດບັງຫຼວງ, ການຮັບສິນບົນໃນຖັນແຖວພະນັກງານ-ລັດຖະກອນ, ຍົກສູງຄວາມສັກສິດ ແລະ ປະສິດທິຜົນຂອງການຄຸ້ມຄອງບໍລິຫານລັດ, ທ່ານຮອງເຈົ້າແຂວງຍັງໄດ້ກ່າວຕື່ມອີກວ່າ: ເພື່ອຮັບປະກັນໃຫ້ແກ່ການຈັດຕັ້ງປະຕິບັດກ່ຽວກັບການບໍລິຫານຜ່ານປະຕູດຽວໃຫ້ມີປະສິດທິພາບໄດ້ຮັບຜົນດີ ແລະ ເພິ່ງພໍໃຈໃຫ້ແກ່ຜູ້ມາໃຊ້ບໍລິການ ກ່ອນອື່ນຕ້ອງກໍາໄດ້ຫຼັກການໃນການເຮັດການບໍລິການ ແລະ ເປັນການຍົກລະດັບຄວາມຮູ້ຄວາມສາມາດໃນການຈັດຕັ້ງປະຕິບັດ, ພ້ອມທັງມີການຖອດຖອນບົດຮຽນ ແລະ ເປັນການທົບທວນ, ສະຫຼຸບຕີລາຄາຄືນກ່ຽວກັບຜົນສໍາເລັດ ແລະ ຂໍ້ບົກຜ່ອງ.
ກອງປະຊຸມຄັ້ງນີ້ຍັງໄດ້ຮັບຟັງການລາຍງານສະພາບການຈັດຕັ້ງປະຕິບັດ ວຽກງານປະຕູດຽວໃນໄລຍະຜ່ານມາ ແລະ ທິດທາງແຜນການ ຈາກນັ້ນບັນດາຜູ້ເຂົ້າຮ່ວມກໍໄດ້ຕີລາຄາແລກປ່ຽນຄໍາຄິດຄໍາເຫັນຊຶ່ງກັນ ແລະ ກັນຕໍ່ກັບວຽກງານດັ່ງກ່າວ.
(ຂ່າວ-ພາບ: ອຸ່ນເຮືອນ ໂພທິລັກ)