 |
ໃນວາລະ, ຜູ້ຕາງໜ້າຄະນະຈັດຕັ້ງສູນກາງພັກ ໄດ້ຜ່ານຄໍາສັ່ງ ວ່າດ້ວຍການຍົກຍ້າຍພະນັກງານການນໍາຂັ້ນສູງ ໄປຮັບໜ້າທີ່ໃໝ່ ເລກທີ 24/ກມສພ ລົງວັນທີ 11/3/2026 ກົມການເມືອງສູນກາງພັກ ອອກຄໍາສັ່ງ ຍົກຍ້າຍ ສະຫາຍ ລາວປາວຊົ່ງ ນະວົງໄຊ ກໍາມະການສູນກາງພັກ ຮອງເລຂາຄະນະບໍລິຫານງານພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໄປຮັບໜ້າທີ່ໃໝ່ຢູ່ສູນກາງແນວລາວສ້າງຊາດ, ຄໍາສັ່ງ ວ່າດ້ວຍການຍົກຍ້າຍພະນັກງານການນໍາຂັ້ນສູງໄປຮັບໜ້າທີ່ໃໝ່ ເລກທີ 07/ຄລສພ ລົງວັນທີ 24/3/2026 ຄະນະເລຂາທິການສູນກາງພັກ ອອກຄໍາສັ່ງ ຍົກຍ້າຍ ສະຫາຍ ນາງ ວິລະວອນ ພັນທະວົງ ກໍາມະການປະຈໍາພັກ ຮອງຫົວໜ້າຄະນະອົບຮົມສູນກາງພັກ ໄປຮັບໜ້າທີ່ໃໝ່ຢູ່ ສະພາແຫ່ງຊາດ, ຄໍາສັ່ງ ວ່າດ້ວຍ ການຍົກຍ້າຍພະນັກງານການນໍາຂັ້ນສູງໄປຮັບໜ້າທີ່ໃໝ່ ເລກທີ 27/ກມສພ ລົງວັນທີ 11 /3/2026 ກົມການເມືອງສູນກາງພັກ ອອກຄໍາສັ່ງ ຍົກຍ້າຍ ສະຫາຍ ໂພໄຊ ໄຂຄໍາພິທູນ ກໍາມະການສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໄປຮັບໜ້າທີ່ໃໝ່ ຢູ່ສະພາແຫ່ງຊາດ, ມະຕິຕົກລົງ ວ່າດ້ວຍການແຕ່ງຕັ້ງ ຮອງເລຂາຄະນະບໍລິຫານງານສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ເລກທີ 34/ກມສພ ລົງວັນທີ 11/3/2026 ກົມການເມືອງສູນກາງພັກ ຕົກລົງ ແຕ່ງຕັ້ງ ສະຫາຍ ວັນສີ ກົວມົວ ກໍາມະການສູນກາງພັກ ເປັນຮອງເລຂາຄະນະບໍລິຫານງານພັກ ຮອງຫົວໜ້າຄະນະໂຄສະນາອົບຮົມສູນກາງພັກ.
 |
ໃນພິທີທີ່ມີຄວາມໝາຍສໍາຄັນນີ້, ສະຫາຍ ຄໍາພັນ ເຜີຍຍະວົງ ໄດ້ໃຫ້ກຽດໂອ້ລົມ ຊຶ່ງໄດ້ສະແດງຄວາມຍ້ອງຍໍ ຊົມເຊີຍ ຕໍ່ຜົນງານໃນໄລຍະຜ່ານມາ ຂອງບັນດາສະຫາຍ ທີ່ຖືກຍົກຍ້າຍໄປຮັບໜ້າທີ່ໃໝ່ ມີບາງຕອນວ່າ: ຕະຫຼອດໄລຍະທີ່ຜ່ານມາ ພວກສະຫາຍໄດ້ອຸທິດເຫື່ອແຮງ, ສະຕິປັນຍາ, ກໍ່ສ້າງ, ບໍາລຸງຖັນແຖວພະນັກງານ ໃນຂົງເຂດຄວາມຮັບຜິດຊອບຂອງຕົນຊີ້ນໍາຢ່າງເຂັ້ມແຂງ, ຮອບດ້ານ ແລະ ຍາດໄດ້ຜົນສໍາເລັດຫຼາຍດ້ານ ໃນວຽກງານໂຄສະນາອົບຮົມ ແຕ່ລະໄລຍະ, ຂໍໃຫ້ບັນດາສະຫາຍ ຈົ່ງເພີ່ມທະວີຄວາມສາມັກຄີພາຍໃນ, ສືບຕໍ່ຕັ້ງໜ້າໃນການປະຕິບັດໜ້າທີ່ວຽກງານການເມືອງ ທີ່ການຈັດຕັ້ງມອບໝາຍໃຫ້ສໍາເລັດ ແລະ ໃນໂອກາດດຽວກັນ ສະຫາຍ ຄໍາພັນ ເຜີຍຍະວົງ ຍັງໄດ້ກ່າວຕໍ່ສະຫາຍ ທີ່ຖືກແຕ່ງຕັ້ງ ມາຮັບໜ້າທີ່ ຢູ່ຄະນະໂຄສະນາອົບຮົມສູນກາງພັກ ຈົ່ງສືບຕໍ່ເອົາໃຈໃສ່ການປະຕິບັດວຽກງານຢ່າງເປັນເຈົ້າການ ແລະ ຫວັງຢ່າງຍິ່ງວ່າ ບັນດາສະຫາຍສະມາຊິກພັກ, ພະນັກງານ-ລັດຖະກອນ ທຸກໆສະຫາຍທີ່ຂຶ້ນກັບ ຄອສພ ຈະສະໜັບສະໜູນ, ອໍານວຍຄວາມສະດວກ ແລະ ໃຫ້ການຮ່ວມມືໃນການເຮັດວຽກງານທີ່ຂັ້ນເທິງມອບໝາຍ ຢ່າງຈົບງາມ.
 |
(ຂ່າວ: ແສງຈັນ)
ຄໍາເຫັນ