 |
ໃນພິທີ, ທ່ານ ອານົງສັກ ອິນທະວົງ ຄະນະພັກ ຮອງຫົວໜ້າຄະນະຮັບຜິດຊອບຊຸດຮຽນທິດສະດີການເມືອງຂັ້ນຕົ້ນ ໄດ້ຜ່ານບົດສະຫຼຸບ, ຜ່ານຂໍ້ຕົກລົງ ວ່າດ້ວຍການມອບໃບຢັ້ງຢືນທິດສະດີ ການເມືອງຂັ້ນຕົ້ນ, ຄະນະພັກ ຄະນະໂຄສະນາອົບຮົມສູນກາງພັກ ໄດ້ເປີດຊຸດຮຽນທິດສະດີການເມືອງຂັ້ນຕົ້ນ ຊຸດທີ III ຂຶ້ນ ໃນວັນທີ 12 ມັງກອນ ເຖິງ ວັນທີ 24 ເມສາ 2026 ຢູ່ ຄອສພ ຊຶ່ງມີສະມາຊິກພັກ, ພະນັກງານຫຼັກແຫຼ່ງ ເຂົ້າຮຽນທັງໝົດຈໍານວນ 39 ສະຫາຍ ຍິງ 19 ສະຫາຍ
 |
ເນື້ອໃນຂອງການຮຽນທິດສະດີການເມືອງຂັ້ນຕົ້ນໃນຄັ້ງນີ້ ແມ່ນເນື້ອໃນຫຼັກສູດການຮຽນ-ການ ສອນ ທີ່ສະພາທິດສະດີສູນກາງພັກໄດ້ມີການຮັບຮອງ ແບ່ງອອກເປັນ 6 ກຸ່ມວິຊາ 50 ບົດ ຄື: ກຸ່ມວິຊາປັດຊະຍາມາກ-ເລນິນ 7 ບົດ, ກຸ່ມວິຊາເສດຖະສາດການເມືອງ ມາກ-ເລນິນ 9 ບົດ, ກຸ່ມວິຊາ ລັດທິສັງຄົມນິຍົມວິທະຍາສາດ 4 ບົດ, ວິຊາການເມືອງວິທະຍາ 4 ບົດ, ວິຊາສັງຄົມສາດ 4 ບົດ, ກຸ່ມ ວິຊາແນວຄິດ ໄກສອນ ພົມວິຫານ 5 ບົດ, ກຸ່ມວິຊາພື້ນຖານກ່ຽວກັບການຄຸ້ມຄອງບໍລິຫານລັດ 3 ບົດ, ວິຊາທິດສະດີ ລັດ ແລະ ກົດໝາຍ 2 ບົດ, ວິຊາເຕັກນິກບໍລິຫານ 2 ບົດ, ກຸ່ມວິຊາປະຫວັດສາດພັກ ແລະ ກໍ່ສ້າງພັກ 10 ບົດ, ລາຍງານເພີ່ມເຕີມຂອງຄະນະນໍາ ສະຖາບັນການເມືອງ ແລະ ການປົກຄອງ ແຫ່ງຊາດ 4 ບົດ ແລະ ຄະນະໂຄສະນາອົບຮົມສູນກາງພັກ ສະເໜີເພີ່ມເຕີມກ່ຽວກັບວິຊາສະເພາະ ຂອງຄະນະໂຄສະນາອົບຮົມສູນກາງພັກ 4 ບົດ, ການຮຽນຄັ້ງນີ້ໃຊ້ເວລາທັງໝົດ 3 ເດືອນ. ໃນນັ້ນ, ຂຶ້ນຫ້ອງຟັງການບັນລະຍາຍ, ສຳມະນາເປັນໜ່ວຍ, ແກ້ຂໍ້ຂ້ອງໃຈ, ສ່ອງແສງລາຍງານ, ຂຽນບົດຈົບຊັ້ນ ຫຼື ບົດປະເມີນຄວາມຮັບຮູ້ເປັນບຸກຄົນ, ປ້ອງກັນບົດເກັບກ່ຽວແບ່ງເປັນ 2 ຈຸ ແລະ ຕອບຄໍາຖາມ ເປັນລາຍບຸກຄົນ.
(ຂ່າວ: ແສງຈັນ)
ຄໍາເຫັນ