ຄວາມຈໍາເປັນ ໃນການຂຶ້ນບັນຊີຢາເສບຕິດທີ່ເກືອດຫ້າມ ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້

ທ່ານ ພົທ ວັນທອງ ກອງມະນີ ໄດ້ຍົກໃຫ້ເຫັນເຫດຜົນ ແລະ ຄວາມຈໍາເປັນ ໃນການຂຶ້ນບັນຊີຢາເສບຕິດທີ່ເກືອດຫ້າມ ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້ ແມ່ນການປະຕິບັດຕາມມະຕິຂອງ ຄະນະປະຈຳສະພາແຫ່ງຊາດ ສືບຕໍ່ຈັດຕັ້ງປະຕິບັດແຜນງານແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເພື່ອຄວບຄຸມ, ປ້ອງກັນ, ສະກັດກັ້ນ ແລະ ຕ້ານຢາເສບຕິດໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ ແນໃສ່ປົກປັກຮັກສາຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍຂອງສັງຄົມ ປະກອບສ່ວນເຂົ້າໃນການສ້າງສາພັດທະນາເສດຖະກິດ-ສັງຄົມຂອງຊາດ. ຊຶ່ງໄລຍະຜ່ານມາ, ກະຊວງ ປກສ ໄດ້ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍມີການເຂົ້າຮ່ວມຂອງທຸກຂະແໜງການ ຂອງອົງການຈັດຕັ້ງພັກ-ລັດ ແລະ ສັງຄົມຢ່າງຕັ້ງໜ້າ ແລະ ເຈົ້າໜ້າທີ່ສາມາດແກ້ໄຂຄະດີຢາເສບຕິດໄດ້ຢ່າງຫຼວງຫຼາຍ ແລະ ຢຶດວັດຖຸເຄື່ອງຂອງກາງຄະດີ ເປັນຢາເສບຕິດປະເພດຕ່າງໆ, ວັດຖຸອຸປະກອນ ແລະ ພາຫະນະໄດ້ເປັນຈໍານວນຫຼາຍ, ແຕ່ເຖິງຢ່າງໃດກໍຕາມ ຍ້ອນສະພາບປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ຍັງມີປະເພດຢາເສບຕິດທີ່ມີລັກສະນະຫຼາຍຊະນິດ, ຫຼາຍຮູບແບບ, ຫຼາຍສີສັນ ຍັງສືບຕໍ່ເກີດຂຶ້ນຢ່າງຫຼວງຫຼາຍໃນປັດຈຸບັນ ທີ່ບໍ່ທັນໄດ້ກຳນົດໄວ້ໃນກົດໝາຍ ແລະ ລະບຽບການ. ດັ່ງນັ້ນ, ກະຊວງ ປກສ ຈຶ່ງມີຄວາມຈໍາເປັນໃນການຈັດຕັ້ງຜັນຂະຫຍາຍ ຂໍ້ 1 ແລະ ຂໍ້ 2 ມາດຕາ 2 ຂອງກົດໝາຍ ວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍຢາເສບຕິດ ສະບັບປີ 2021 ມາເປັນມະຕິຂອງສະພາແຫ່ງຊາດ ກ່ຽວກັບບັນຊີຢາເສບຕິດທີ່ເກືອດຫ້າມ ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້ ໃຫ້ເປັນອັນລະອຽດ ເພື່ອເປັນບ່ອນອີງໃຫ້ເຈົ້າໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ແລະ ເຈົ້າໜ້າທີ່ຂະແໜງການທີ່ກ່ຽວຂ້ອງ ໃນການນໍາເອົາຜູ້ກະທໍາຜິດມາລົງໂທດຕາມກົດໝາຍ ເຮັດໃຫ້ສັງຄົມມີຄວາມສະຫງົບປອດໄພຈາກສິ່ງເສບຕິດ.
ໃນໄລຍະຜ່ານມາ, ລັດຖະບານໄດ້ອອກຂໍ້ຕົກລົງ ວ່າດ້ວຍບັນຊີຢາເສບຕິດທີ່ເກືອດຫ້າມ ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້ ສະບັບເລກທີ 87/ນຍ, ລົງວັນທີ 29 ກໍລະກົດ 2026 ສະພາບການ ຈັດຕັ້ງປະຕິບັດ ແມ່ນພົບຄວາມຫຍຸ້ງຍາກ ແລະ ບໍ່ທັນມີຄວາມເປັນເອກະພາບໃນການຈັດຕັ້ງປະຕິບັດ, ຕິດພັນບັນຫາທາງອາຍາ, ຕິດພັນກັບຫຼາຍຂະແໜງການ ທຸກພາກສ່ວນໃນສັງຄົມ. ດັ່ງນັ້ນ, ກອງປະຊຸມຮ່ວມ 4 ພາກ ສ່ວນ (ກະຊວງປ້ອງກັນຄວາມສະຫງົບ, ກະຊວງຍຸຕິທຳ, ອົງການໄອຍະການປະຊາຊົນສູງສຸດ ແລະ ສານປະ ຊາຊົນສູງສຸດ) ໃນການດໍາເນີນຄະດີຕາມຂະບວນຍຸຕິທໍາ ຄັ້ງທີ 8 ໃນວັນທີ 21 ກັນຍາ 2026 ໄດ້ປຶກສາຫາລືການຮ່ວມມືຫຼາຍດ້ານ ຊຶ່ງປະກອບມີທັງໝົດ 24 ບັນຫາ ທີ່ຈະຕ້ອງໄດ້ຮ່ວມກັນປະຕິບັດ ແລະ ແກ້ໄຂ, ໃນນັ້ນ ຂໍ້ທີ 2 ຂອງບົດບັນທຶກກຳນົດໄວ້ ຄື: ມອບໃຫ້ກະຊວງ ປກສ ແລະ ອົງການໄອຍະການປະຊາຊົນສູງສຸດນໍາເອົາບັນຊີຢາເສບຕິດທີ່ເກືອດຫ້າມ ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້ ຕາມຂໍ້ຕົກລົງສະບັບເລກທີ 87/ນຍ, ລົງວັນທີ 29 ກໍລະກົດ 2026 ສະເໜີຄະນະປະຈໍາສະພາແຫ່ງຊາດ ພິຈາລະນາອອກມະຕິຮັບຮອງ.
ທ່ານ ພົທ ວັນທອງ ກອງມະນີ ກ່າວອີກວ່າ: ຕໍ່ກັບໂຄງປະກອບຂອງຂໍ້ຕົກລົງສະບັບປັດຈຸບັນ ປະກອບມີ: 3 ມາດຕາ ດັ່ງນີ້: 1. ມາດຕາ 1 ຮັບຮອງເອົາບັນຊີຢາເສບຕິດ ທີ່ເກືອດຫ້າມ ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້ ຕາມທີ່ໄດ້ກຳນົດໄວ້ໃນກົດໝາຍ ວ່າດ້ວຍຢາເສບຕິດແບ່ງອອກເປັນສອງປະເພດຄື: ຢາເສບຕິດທີ່ເກືອດຫ້າມ ປະເພດທີ I ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້ປະເພດທີ II ຄື: ຂໍ້ 1 ຢາເສບຕິດທີ່ເກືອດຫ້າມປະເພດທີ 1 ປະກອບມີ: ຂໍ້ 1.1 ຢາເສບຕິດ ທີ່ເກືອດຫ້າມທີ່ກະຕຸ້ນ ແລະ ອອກລິດຕໍ່ ຈິດປະສາດຢ່າງຮ້າຍແຮງ ແລະ ບໍ່ອະນຸຍາດໃຫ້ນໍາໃຊ້ຢ່າງເດັດຂາດ ປະກອບມີ 95 ຊະນິດ; ຂໍ້ 1.2 ຢາເສບຕິດ ທີ່ເກືອດຫ້າມຊະນິດໃໝ່ທີ່ກະຕຸ້ນ ຫຼື ອອກລິດຕໍ່ຈິດປະສາດຢ່າງຮ້າຍແຮງ ແລະ ບໍ່ອະນຸຍາດໃຫ້ນໍາໃຊ້ຢ່າງເດັດ ຂາດ ປະກອບມີ 61 ຊະນິດ; 2. ຢາເສບຕິດ ແລະ ສານເຄມີ ທີ່ຖືກຄວບຄຸມການນໍາໃຊ້ ປະເພດທີ II ແບ່ງ ອອກເປັນສອງປະເພດ ຄື: ຂໍ້ 2.1 ຢາເສບຕິດ ທີ່ຖືກຄວບຄຸມການນໍາໃຊ້ ມີ 4 ປະເພດຍ່ອຍ ຄື: ຂໍ້ 2.1.1 ປະເພດຍ່ອຍທີ 1 ປະກອບມີ 94 ຊະນິດ; ຂໍ້ 2.1.2 ປະເພດຍ່ອຍທີ 2 ປະກອບມີ 68 ຊະນິດ; ຂໍ້ 2.1.3 ປະເພດຍ່ອຍທີ 3 ປະກອບມີ 29 ຊະນິດ; ຂໍ້ 2.1.4 ປະເພດຍ່ອຍທີ 4 ປະກອບມີ 7 ຊະນິດ ແລະ ຂໍ້ 2.2 ສານເຄມີ ທີ່ຖືກຄວບຄຸມການນໍາໃຊ້ມີສອງປະເພດຍ່ອຍ ຄື: ຂໍ້ 2.2.1 ປະເພດຍ່ອຍທີ 1 ປະກອບມີ 84 ຊະນິດ ແລະ ຂໍ້ 2.2.2 ປະເພດຍ່ອຍທີ 2 ປະກອບມີ 32 ຊະນິດ.
ສັງລວມແລ້ວ ບັນດາລາຍການປະເພດຢາເສບຕິດທີ່ເກືອດຫ້າມ ແລະ ຢາເສບຕິດ, ສານເຄມີ ທີ່ຖືກຄວບຄຸມການນໍາໃຊ້ ທີ່ໄດ້ກຳນົດໄວ້ໃນມາດຕາ 1 ຂອງຂໍ້ຕົກລົງສະບັບນີ້ ເນື້ອໃນທີ່ໄດ້ກຳນົດໃສ່ນັ້ນ ແມ່ນມາຈາກດໍາລັດ 076/ນຍ ສະບັບປີ 2009, ຈໍານວນໜຶ່ງກໍໄດ້ມາຈາກລາຍການບັນຊີສາກົນ ມາກຳນົດເພີ່ມເຂົ້າ ແລະ ຈໍານວນໜຶ່ງກໍໄດ້ຈາກສະພາບຄວາມເປັນຈິງທີ່ເກີດຂຶ້ນໃນປັດຈຸບັນ ເປັນຕົ້ນ ຕົ້ນ, ໃບ, ດອກ, ຢາງກັນຊາ, ຢາງຝິ່ນ ແລະ ນໍ້າກະທ້ອມ, ຕົ້ນປໍແກ້ວ, ຕົ້ນພືດ ແລະ ເຫັດຊະນິດຕ່າງໆ ທີ່ໃຫ້ສານເສບຕິດ ແລະ ທາດເບື່ອ, ຢາສູບໄຟຟ້າ ແລະ ອື່ນໆ. ຂ່າວ: ບຸນຕອມ, ພາບ: ຕຸໄລເພັດ