ຄວາມຮຽກຮ້ອງຕ້ອງການຂອງກຳມະກອນໃນຍຸກປັດຈຸບັນ

ຂະບວນການດັ່ງກ່າວໄດ້ເປັນສັນຍາລັກການຕໍ່ສູ້ທີ່ສໍາຄັນຂອງຊົນຊັ້ນກຳ ມະກອນ ແລະ ຜູ້ອອກແຮງງານໃນທົ່ວໂລກ ເພື່ອຮຽກຮ້ອງຄວາມເປັນທຳ, ສິດທິ, ຜົນປະໂຫຍດອັນຊອບທຳ, ກຽດສັກສີ, ຄວາມໝັ້ນຄົງ, ຄວາມຍຸຕິທຳ, ສຸຂະພາບ ແລະ ຄວາມປອດໄພໃນການອອກແຮງງານມາສູ່ກຳມະກອນ ແລະ ປະຊາຊົນທຸກຄົນໃນສັງຄົມ ເພື່ອຕອບສະໜອງຄວາມຕ້ອງການຂອງຜູ້ອອກແຮງງານທົ່ວໂລກ ໃນຍຸກໂລກາພິວັດນີ້ມີຫຼາຍບັນຫາຄື:

1). ເຮັດວຽກງານທີ່ມີຄຸນຄ່າ ແລະ ເປັນທຳ; 2). ມີຄວາມສະເໝີພາບຍິງ-ຊາຍໃນການອອກແຮງງານໂດຍບໍ່ເລືອກປະຕິບັດ; 3). ມີອາຊີບທີ່ໝັ້ນຄົງ; 4). ມີກຽດສັກສີໃນການດໍາລົງຊີວິດ; 5). ມີສິດທິມະນຸດ; 6). ມີສິດເສລີ ພາບໃນການປະກອບຄໍາຄິດຄໍາເຫັນ; 7). ມີສິດໃນການເຂົ້າຮ່ວມທາງດ້ານການເມືອງ, ເສດຖະກິດ ແລະ ສັງຄົມ; 8). ມີສະຫວັດດີການທີ່ດີ; 9). ມີສຸຂະພາບ ແລະ ຄວາມປອດໄພໃນການອອກແຮງງານ; 10). ໄດ້ຮັບການສຶກສາ, ວັດ ທະນະທຳ ແລະ ຮັບຮູ້ຂໍ້ມູນຂ່າວສານທີ່ຊັດເຈນ ແລະ ເປັນຈິງ; 11). ຢຸດຕິໃນການນໍາໃຊ້ແຮງງານເດັກ

12). ຢຸດຕິການກໍ່ສົງຄາມທຸກຮູບແບບ.

ໂດຍອີງຕາມຂໍ້ມູນຈາກ (data.worldbank.org) ປີ 2023, ປັດຈຸບັນໃນທົ່ວໂລກມີຜູ້ອອກແຮງງານທັງໝົດ 3,650,000,000 ຄົນ; ໃນນັ້ນ, ມີຜູ້ອອກແຮງງານໃນລະບົບທີ່ໄດ້ລົງທະບຽນ 57.4%; ຂອງຜູ້ອອກແຮງງານໃນທົ່ວ ໂລກ; ການຈ້າງງານນອກລະບົບມີ 2,027,600,000 ຄົນ; ອັດຕາການຫວ່າງງານຂອງຜູ້ອອກແຮງງານ 5.2%; ແຮງງານທີ່ທຸກຍາກມີ 6.4% ຂອງຜູ້ອອກແຮງງານທັງໝົດ; ຈໍານວນຜູ້ຫວ່າງງານເພີ່ມຂຶ້ນເຖິງ 2,000 ລ້ານຄົນ; ຜູ້ທີ່ເຂົ້າເປັນສະມາຊິກກຳມະບານ 251 ລ້ານຄົນ; ບັນຫາທີ່ຜູ້ອອກແຮງງານກໍາລັງປະເຊີນຢູ່ ແມ່ນບັນຫາການຈ້າງງານ ຜູ້ອອກແຮງງານຫຼຸດລົງ, ມີການປັບຄ່າແຮງງານຄືນໃໝ່, ບັນຫາໄພເງິນເຟີ້ສູງ, ມີການເຄື່ອນຍ້າຍແຮງງານຫຼາຍ ແລະ ຫັນມາເຮັດເສດຖະກິດດີຈີຕອນຫຼາຍຂຶ້ນ.

ຕະຫຼາດແຮງງານໃນທົ່ວໂລກໃນປີ 2025 ກໍາລັງປ່ຽນແປງຢ່າງຫຼວງຫຼາຍ ຈາກປັດໃຈຫຼາຍປະການ ລວມທັງ ດ້ານເຕັກໂນໂລຊີທີ່ກ້າວໜ້າ, ປັນຫາສະພາບດິນຟ້າອາກາດ ແລະ ການປ່ຽນແປງທາງເສດຖະກິດຫຼັງໂຄວິດ-19 ອົງ ການແຮງງານສາກົນ (ILO) ແລະ World Economic Forum (WEF) ໄດ້ຄາດການວ່າຈະມີການສ້າງຕຳແໜ່ງ ງານໃໝ່ກວ່າ 170 ລ້ານ ແລະ ຕຳແໜ່ງເກົ່າຈະຖືກລຶບລ້າງໄປກວ່າ 83 ລ້ານຕຳແໜ່ງ ເນື່ອງຈາກການປັບໃຊ້ເຕັກ ໂນໂລຊີອັດຕະໂນມັດ ແລະ ປັນຍາປະດິດ (AI) ໂດຍສະເພາະຂະແໜງການທີ່ນໍາໃຊ້ແຮງງານທາງດ້ານຮ່າງກາຍເປັນຫຼັກ. ຕໍ່ບັນຫາດັ່ງກ່າວ ທາງດ້ານນິຕິກຳຫຼາຍປະເທດມີການເຄື່ອນໄຫວ ແລະ ປັບປຸງກົດໝາຍວ່າດ້ວຍແຮງງານເຊັ່ນ: ສປປລາວ, ກຳປູເຈຍ ແລະ ມຽນມາ ພວມດໍາເນີນການປັບປຸງກົດໝາຍວ່າດ້ວຍແຮງງານ ເພື່ອປະຕິບັດຕາມມາດຕະຖານສາກົນ ແລະ ເພີ່ມທະວີການປົກປ້ອງແຮງງານທັງໃນ ແລະ ນອກລະບົບ; ແຕ່ລະປະເທດມີການເພີ່ມຕຳແໜ່ງງານໃໝ່ໃນດ້ານ Al, Green Economy ແລະ Data Analysis ແລະ ການເຮັດວຽກແບບຍືນຍົງ (Remote/Hybrid Work) ກໍາລັງເພີ່ມຂຶ້ນຢ່າງຕໍ່ເນື່ອງ.