 |
ເສັ້ນທາງຫຼວງແຫ່ງຊາດ ເລກທີ 21 ເປັນເສັ້ນທາງບູລິມະສິດສາຍໜຶ່ງ ນອນໃນແຜນພັດທະນາເສດຖະກິດ -ສັງຄົມຂອງແຂວງ, ຊຶ່ງເລີ່ມແຕ່ເມືອງປາກຊັນ ຫາ ບ້ານທ່າສີ ເມືອງບໍລິຄັນ ລວງຍາວ 81 ກມ, ເປັນເສັ້ນທາງເຊື່ອມຕໍ່ກັບບັນດາແຂວງພາກເໜືອ ເຊັ່ນ: ແຂວງໄຊສົມບູນ, ແຂວງຊຽງຂວາງ ແລະ ແຂວງຫົວພັນ, ເສັ້ນທາງດັ່ງກ່າວໄດ້ຮັບຮອງເປັນທາງຫຼວງແຫ່ງຊາດ ໃນປີ 2004. ຜ່ານມາລັດຖະບານ ໄດ້ຮັບທຶນກູ້ຢືມຈາກ ADB ໃນປີ 2009 ໄດ້ປັບປຸງຍົກລະດັບ ກໍ່ສ້າງເປັນທາງປູຢາງ 2 ຊັ້ນ, ອອກແບບຮັບນໍ້າໜັກ 8,2 ໂຕນຕໍ່ເພົາ, ມາຮອດປີ 2016 ໄລຍະ ບ້ານຜາເມືອງ ຫາ ບ້ານທ່າສີ ລວງຍາວ 28,77 ກມ, ໄດ້ຮັບງົບປະມານປັບປຸງຍົກລະດັບ ສາມາດຮັບນໍ້າໜັກ 9,1 ໂຕນຕໍ່ເພົາ.
ສໍາລັບເສັ້ນທາງຫຼວງແຫ່ງຊາດ ເລກ 1D ໄລຍະແຂວງບໍລິຄໍາໄຊ ເລີ່ມແຕ່ຊາຍແດນແຂວງໄຊສົມບູນ (ບ້ານທ່າສີ) ຫາ ທາງຫຼວງແຫ່ງຊາດເລກ 8 ບ້ານປ່າຄາ ເມືອງຄໍາເກີດ ລວງຍາວທັງ ໝົດ 156 ກມ, ສໍາລັບໄລຍະທີ່ບໍລິສັດ ສະເໜີຂໍລົງທຶນໃນການສຶກສາສໍາຫຼວດ-ອອກແບບ, ຟື້ນຟູ ແລະ ບູລະນະຮັກສາ ໄລຍະແຂວງບໍລິຄໍາໄຊ ແມ່ນເລີ່ມແຕ່ແຍກທາງເລກທີ 21 ບ້ານທ່າສີ ຫາຊາຍແດນແຂວງໄຊສົມບູນ ລວງຍາວ 1,10 ກມ. ເສັ້ນທາງຫຼວງແຫ່ງຊາດເລກທີ 21 ເປັນເສັ້ນທາງບູລິມະສິດອັນດັບໜຶ່ງ ນອນໃນແຜນພັດທະນາເສດຖະກິດ-ສັງຄົມແຫ່ງຊາດ ເວົ້າລວມ; ເວົ້າສະເພາະ ກໍຄືແຜນພັດທະນາເສດຖະກິດ-ສັງຄົມຂອງແຂວງບໍລິຄຳໄຊ, ຊຶ່ງເປັນເສັ້ນທາງສາຍຫຼັກເພື່ອເຊື່ອມໂຍງກັບອານຸພາກພື້ນຂອງລາວ ແລະ ເປັນເສັ້ນທາງຂົນສົ່ງສິນຄ້າອອກສູ່ທະເລນ້ຳເລິກ ທີ່ໃກ້ທີ່ສຸດ (ທ່າເຮືອບຸງອາງ).
ຕາງໜ້າອົງການປົກຄອງແຂວງ ໃຫ້ກຽດລົງນາມເຊັນໂດຍ ທ່ານ ວິໄຊ ພູມີ ຫົວໜ້າພະແນກ ຍທຂ ແຂວງ, ທ່ານ ບຸນລ້ຽງ ດວງສະເພົາທອງ ຫົວໜ້າ ພະແນກການເງິນ. ທ່ານ ນາງ ເພບພະລັກ ຄໍາວິສອນ ອໍານວຍການບໍລິສັດ PSL, ທ່ານ ນາງ ເສີງ ເສີງ ຊິງ ຮອງອໍານວຍການບໍລິສັດ AVIC (ເອວິກ) ແລະ ທ່ານ ນາງ ສອນດາລາ ຮອງອໍານວຍການບໍລິສັດ PSL.
(ພາບ-ຂ່າວ: ວຽງສະຫວັນ)
ຄໍາເຫັນ