 |
ທ່ານ ແສງປະເສີດ ສີລາເພັດ ຮອງປະທານສະຫະພັນກິລາດອກປີກໄກ່ແຂວງຫຼວງພະບາງ ໄດ້ໃຫ້ສຳພາດເມື່ອບໍ່ດົນມານີ້ວ່າ: ມາຮອດປັດຈຸບັນສະພາບຂອງນັກກິລາດອກປີກໄກ່ແຂວງຫຼວງພະບາງ ແມ່ນມີຄວາມພ້ອມແລ້ວ 95%, ຊຶ່ງນັກກິລາທີ່ຜ່ານການຄັດເລືອກມີທັງໝົດ 15 ຄົນ, ຍິງ 7 ຄົນ, ຈະເຂົ້າຮ່ວມແຂ່ງຂັນ 7 ລາຍການຄື: ທີມ ຍິງ-ຊາຍ, ດ່ຽວ ຍິງ-ຊາຍ, ຄູ່ ຍິງ-ຊາຍ ແລະຄູ່ປະສົມ, ຈາກບົດຮຽນ ແລະປະສົບການເຂົ້າຮ່ວມແຂ່ງຂັນ ຢູ່ແຂວງຊຽງຂວາງໃນຄັ້ງຜ່ານມາ ນັກກິລາແຂວງຫຼວງພະບາງ ແມ່ນໄປເຖິງພຽງຮອບ 8 ທີມ, ສຳລັບຄັ້ງນີ້ ເຫັນວ່າ ນັກກິລາມີຄວາມພ້ອມຫຼາຍກວ່າຄັ້ງຜ່ານມາ ຈຶ່ງຕັ້ງເປົ້າຈະຍາດໃຫ້ໄດ້ 3 ຫຼຽນຄຳ, 2 ຫຼຽນເງິນ ແລະ 2 ຫຼຽນທອງແດງ ລວມ 7 ຫຼຽນ.
 |
ທ່ານ ແສງປະເສີດ ສີລາເພັດ ໃຫ້ຮູ້ຕື່ມວ່າ: ສຳລັບງົບປະມານທີ່ນຳໃຊ້ເຂົ້າໃນການຝຶກຊ້ອມ ແລະເຂົ້າຮ່ວມແຂ່ງຂັນ ຄັ້ງນີ້ ໄດ້ຮັບການສະໜັບສະໜູນຈາກພາກລັດ ແລະບັນດາພາກສ່ວນທຸລະກິດຈຳນວນໜຶ່ງ, ໂອກາດນີ້ ທ່ານໄດ້ສະແດງຄວາມຂອບໃຈ ຕໍ່ການປະກອບສ່ວນຈາກທຸກພາກສ່ວນ, ພ້ອມທັງເຊີນຊວນໃຫ້ປະຊາຊົນຊາວແຂວງຫຼວງພະບາງ ພ້ອມກັນຮ່ວມສົ່ງກຳລັງໃຈ ໃຫ້ນັກກິລາແຂວງຫຼວງພະບາງ ໂດຍສະເພາະນັກກິລາດອກປີກໄກ່ ເພື່ອໃຫ້ຍາດໄດ້ຫຼຽນລາງວັນ ຈາກໃນງານມະຫະກໍາກິລາແຫ່ງຊາດ ຄັ້ງທີ XII ຫຼື ນະຄອນຫຼວງວຽງຈັນເກມ 2025 ມາສູ່ແຂວງຫຼວງພະບາງ.
(ຂ່າວ: ອາພຸພເດດ ບຸບຜາ-ພາບ: ດາວອນ ມະນີວັນ)
ຄໍາເຫັນ