 |
ພິທີໃນຄັ້ງນີ້ ໄດ້ເລີ່ມຕົ້ນດ້ວຍພີທີເຄົາລົບທຸງຊາດ, ຕໍ່ດ້ວຍການສວນສະໜາມກ້ອນກໍາລັງທຸງງານ, ທຸງຊາດ, ທຸງພັກ, ທຸງຊາວໜຸ່ມ, ກ້ອນກໍາລັງມະຫາສາມັກຄີຂອງຊາວໜຸ່ມບັນດາເຜົ່າ ພ້ອມຂານອາສາຕະລຸມບອນເຂົ້າໃນພາລະກິດສ້າງສາພັດທະນາປະເທດຊາດ ຕາມດ້ວຍກ້ອນກໍາລັງນັກກິລາຄະນະຊາວໜຸ່ມຈາກກະຊວງ, ອົງການ ແລະ ນວ ລວມທັງໝົດ 23 ກ້ອນກໍາລັງ.
 |
ໃນພິທີ, ທ່ານ ທອງລີ ສີສຸລິດ ເລຂາຄະນະບໍລິຫານງານ ສຊປລ ປະທານຈັດການແຂ່ງຂັນກິລາບານເຕະ ຊີງຂັນທ່ານປະທານ ສນຊ ປີ 2026 ກ່າວເປີດການແຂ່ງຂັນວ່າ: ການຈັດແຂ່ງຂັນກິລາບານ ເຕະໃນຄັ້ງນີ້, ເປັນກິດຈະກຳທີ່ມີຄວາມໝາຍໃນການສົ່ງເສີມສຸຂະພາບ, ເຊື່ອມສານມິດຕະພາບ, ຮັດແໜ້ນຄວາມຮ່ວມມື ທັງເປັນການເຕົ້າໂຮມຄວາມສາມັກຄີຮັກແພງ ລະຫວ່າງຄະນະຊາວໜຸ່ມບັນດາອົງການ, ກະ ຊວງ ແລະ ນວ; ເພື່ອເປັນການສ້າງຂະບວນການຂໍ່ານັບຮັບຕ້ອນສະເຫຼີມສະຫຼອງ 3 ວັນປະຫວັດສາດຄື: ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 71 ປີ; ວັນຊາດທີ 2 ທັນວາ ຄົບຮອບ 51 ປີ ແລະ ວັນເກີດປະທານໄກສອນ ພົມວິຫານ ຄົບຮອບ 106 ປີ; ເພື່ອເປັນການຜັນຂະຫຍາຍວາລະແຫ່ງຊາດໃນການຕ້ານ ແລະ ສະກັດກັ້ນບັນຫາຢາເສບຕິດ ທັງເປັນການປູກຈິດສໍານຶກໃຫ້ຊາວໜຸ່ມ-ເຍົາວະຊົນຫັນມາຫຼິ້ນກິລາ ແລະ ຫ່າງໄກຈາກຢາເສບຕິດ.
 |
ບານເຕະ ບໍ່ໄດ້ສອນໃຫ້ພວກເຮົາຮູ້ຈັກພຽງແຕ່ການແຂ່ງຂັນ ແຕ່ຍັງສອນໃຫ້ຮູ້ຈັກການເຮັດວຽກເປັນທີມ, ເຄົາລົບລະບຽບ ແລະ ກົດກະຕິກາ, ການເສຍສະຫຼະ, ຄວາມອົດທົນ ແລະ ການຮັບຜິດຊອບຮ່ວມກັນ ແລະ ຂໍຝາກໃຫ້ນັກກິລາທຸກຄົນທີ່ເຂົ້າຮ່ວມການແຂ່ງຂັນ ຕ້ອງຍົກສູງຈິດໃຈນໍ້າໃຈນັກກິລາ, ເຄົາ ລົບລະບຽບການແຂ່ງຂັນ ແລະ ຄູ່ແຂ່ງ, ຫຼິ້ນດ້ວຍຄວາມສາມັກຄີ, ມີວິໄນ ແລະ ຮູ້ຈັກຊ່ວຍເຫຼືອ ຊຶ່ງກັນ ແລະ ກັນ, ຂໍໃຫ້ທຸກທີມມຸ່ງໝັ້ນເຮັດເຕັມຄວາມສາມາດ ແຕ່ບໍ່ເອົາຊະນະດ້ວຍການລະເມີດກົດກະຕິກາ ຫຼື ທໍາລາຍມິດຕະພາບ, ຈົ່ງຈື່ໄວ້ວ່າໄຊຊະນະທີ່ມີຄຸນຄ່າ ແມ່ນໄຊຊະນະທີ່ມາພ້ອມກັບກຽດສັກສີ ແລະ ນໍ້າໃຈນັກກິລາ. ຂໍໃຫ້ຄູຝຶກນໍາພາທີມດ້ວຍເຫດຜົນ, ຫົວໜ້າທີມເປັນແບບຢ່າງໃນການເຄົາລົບລະບຽບການແຂ່ງ ຂັນ ແລະ ຂໍໃຫ້ຄະນະກຳມະການປະຕິບັດໜ້າທີ່ດ້ວຍຄວາມບໍລິສຸດ ຍຸຕິທໍາ ເປັນກາງ, ໂປ່ງໃສ ແລະ ເຄັ່ງຄັດຕາມກົດລະບຽບ, ຕ້ອງຮັບປະກັນໃຫ້ທຸກທີມ ໄດ້ຮັບການປະຕິບັດຢ່າງເທົ່າທຽມກັນ ແລະ ສ້າງຄວາມເຊື່ອໝັ້ນຕໍ່ການແຂ່ງຂັນ.
 |
ການແຂ່ງຂັນໃນຄັ້ງນີ້ປະກອບມີ 23 ທີມ ແບ່ງອອກເປັນ 6 ສາຍ ຄື: ສາຍ A, B, C, D, E ແລະ ສາຍ F ປະກອບມີສາຍລະ 4 ທີມ. ສ່ວນວັນເວລາການແຂ່ງຂັນແມ່ນທຸກວັນອັງຄານ ຫາ ວັນສຸກ ເວລາ 9:00-18:00 ໂມງ ທີ່ເດີ່ນກິລາດັ່ງກ່າວ. ເລີ່ມແຕ່ວັນທີ 2 ຕຸລາ ຫາ 11 ທັນວາ 2026 ຈຶ່ງຈະສໍາເລັດ.
ສໍາລັບລາງວັນ: ລາງວັນທີ 1 ຈະໄດ້ຮັບລາງວັນເງິນສົດ 50,000,000 ກີບ ພ້ອມຂັນລາງວັນ 1 ໜ່ວຍ ມູນຄ່າ 15,000,000 ກີບ ແລະ ຫຼຽນຄໍາ 35 ໜ່ວຍ ມູນຄ່າ 13,300,000 ກີບ ພ້ອມໃບຍ້ອງຍໍ; ລາງວັນທີ 2 ຈະໄດ້ຮັບລາງວັນເງິນສົດ 40,000,000 ກີບ ພ້ອມຫຼຽນເງິນ 35 ໜ່ວຍ ມູນຄ່າ 13,300,000 ກີບ ພ້ອມໃບຍ້ອງຍໍ; ລາງວັນທີ 3 ຈະໄດ້ຮັບລາງວັນເງິນສົດ 30,000,000 ກີບ ພ້ອມຫຼຽນທອງ 35 ໜ່ວຍ ມູນຄ່າ 13,300,000 ກີບ ພ້ອມໃບຍ້ອງຍໍ; ລາງວັນທີ 4 ຈະໄດ້ຮັບລາງວັນເງິນ ສົດ 10,000,000 ກີບ ພ້ອມໃບຍ້ອງຍໍ. ພ້ອມນັ້ນ, ຍັງມີລາງວັນທີມມາລະຍາດດີເດັ່ນ, ນັກເຕະດີເດັ່ນ, ຜູ້ຍິງປະຕູຫຼາຍ ແລະ ຜູ້ສົ່ງໃຫ້ຍິງປະຕູຫຼາຍ, ນັກເຕະເກັ່ງຮອບດ້ານ, ທີມກອງເຊຍດີເດັ່ນ 3 ທີມ, ຜູ້ຮັບປະຕູດີເດັ່ນ, ຄູຝຶກດີເດັ່ນ ແຕ່ລະລາງວັນຈະໄດ້ຮັບລາງວັນເງິນສົດ 2,000,000 ກີບ ລາງວັນຂັນ 1 ໜ່ວຍ ພ້ອມໃບຍ້ອງຍໍ.
 |
ໂອກາດນີ້, ທ່ານ ມອນໄຊ ລາວມົວຊົ່ງ ພ້ອມດ້ວຍຄະນະປະທານ ໄດ້ກົດປຸ່ມ, ຊົມການຈູດພຸ, ຈູດດອກໄມ້ໄຟ ເພື່ອເປັນສິລິມຸງຄຸນໃນການເປີດການແຂ່ງຂັນບານເຕະຢ່າງເປັນທາງການ.
 |
|||
 |
|||
(ຂ່າວ-ພາບ: ວັນເພັງ)
ຄໍາເຫັນ