 |
ໂອກາດນີ້, ທ່ານ ບຸນເທືອງ ມູນລາສີ ຜູ້ອຳນວຍການສະຖາບັນຣັຕະນະບໍລິຫານທຸລະກິດ ໃຫ້ຮູ້ວ່າ: ສະຖາບັນໄດ້ເອົາໃຈໃສ່ຈັດຕັ້ງປະຕິບັດຕາມພາລະບົດບາດຢ່າງເຂັ້ມງວດ ເພື່ອສ້າງ ແລະ ພັດທະນາຊັບພະຍາກອນມະນຸດໃຫ້ມີຄຸນທາດການເມືອງ, ຄຸນສົມບັດສິນທຳປະຕິບັດ, ມີຄວາມຮູ້ຄວາມສາມາດ ແລະ ອອກຮັບໃຊ້ສັງຄົມຢ່າງມີຄຸນນະພາບ. ປັດຈຸບັນສະຖາບັນມີພະນັກງານ ແລະ ຄູ-ອາຈານທັງໝົດ 146 ທ່ານ, ອາຈານຮັບເຊີນ 41 ທ່ານ, ມີນັກສຶກສາທັງໝົດ 2,789 ຄົນ ຍິງ 1,219 ຄົນ ໄດ້ເປີດສອນທັງໝົດ 11 ຫຼັກສູດດັ່ງນີ້: ຫຼັກສູດປະລິນຍາຕີ (ປົກກະຕິ): ມີ 7 ສາຂາວິຊາຄື: ບໍລິຫານທຸລະກິດທົ່ວໄປ, ການເງິນ-ການທະນາຄານ, ການຕະຫຼາດ, ການທ່ອງທ່ຽວ, ພາສາອັງກິດທຸລະກິດ, ພາສາອັງກິດທົ່ວໄປ ແລະ ພາສາຈີນສຳລັບການສຶກສາ; ຫຼັກສູດຕໍ່ເນື່ອງລະດັບປະລິນຍາຕີ: ປະກອບມີ 3 ສາຂາວິຊາຄື: ຫຼັກສູດປະລິນຍາໂທ: ໂຄງການຮ່ວມມືກັບມະຫາວິທະຍາໄລແຫ່ງຊາດ ໃນສາຂາການບໍລິຫານການເງິນໃນສົກສຶກສາຜ່ານມານີ້, ມີຜູ້ສຳເລັດການສຶກສາທັງໝົດ 251 ຄົນ ຍິງ 176 ຄົນ ປະກອບມີ: ສາຂາພາສາອັງກິດທຸລະກິດ 61 ຄົນ, ການເງິນ-ການທະນາຄານ 65 ຄົນ, ບໍລິຫານທຸລະກິດທົ່ວໄປ 94 ຄົນ ແລະ ການຕະຫຼາດ 31 ຄົນ.
 |
ທ່ານ ບຸນເທືອງ ມູນລາສີ ໃຫ້ຮູ້ຕື່ມວ່າ: ວຽກງານກິດຈະກຳສັງຄົມ ແລະ ການພົວພັນຮ່ວມມືສາກົນ ນອກຈາກການຮຽນ-ການສອນໃນຫ້ອງແລ້ວ, ສະຖາບັນ ຍັງໄດ້ສ້າງຂະບວນການຟົດຟື້ນ ເຊັ່ນ: ວຽກງານແຮງງານສຶກສາ ແລະ ຈິດອາສາ, ຈັດກິດຈະກໍາອະນາໄມສິ່ງແວດລ້ອມ ແລະ ບໍລິຈາກເລືອດສົມທົບກັບສູນເລືອດແຫ່ງຊາດເປັນປະຈຳປີລະ 2 ຄັ້ງ, ໄດ້ນຳພານັກສຶກສາທັດສະນະໂຮງຈັກ-ໂຮງງານ ທັງພາຍໃນ ແລະ ຕ່າງປະເທດ ລວມທັງການແລກປ່ຽນວັດທະນະທຳທີ່ ສປຈີນ ແລະ ຍັງໄດ້ເຊັນສັນຍາ MOU ຮ່ວມມືທາງດ້ານວິຊາການກັບມະຫາວິທະຍາໄລ ແລະ ວິທະຍາໄລຕ່າງໆ ຢູ່ ສປ ຈີນ, ຫວຽດນາມ, ໄທ ແລະ ອິນເດຍ ເພື່ອເປີດໂອກາດໃຫ້ນັກສຶກສາລາວ ໄດ້ໄປຝຶກງານ ແລະ ຫາປະສົບການ.
ສຳລັບທິດທາງແຜນການສົກສຶກສາ 2026-2027 ເພື່ອມຸ່ງໝັ້ນ ແລະ ກ້າວສູ່ວິໄສທັດປີ 2030, ສະຖາບັນ ໄດ້ວາງວຽກຈຸດສຸມ 5 ດ້ານຄື: ຈະສືບຕໍ່ສຶກສາອົບຮົມການເມືອງ-ແນວຄິດ ໃຫ້ພະນັກງານ ແລະ ນັກສຶກສາ, ສືບຕໍ່ຮັບນັກຮຽນຈົບຊັ້ນ ມ.7 ເຂົ້າຮຽນໃນແຕ່ລະ ລະບົບ, ປັບປຸງ ແລະ ສ້າງຫຼັກສູດໃໝ່ໃຫ້ຕອບສະໜອງຕະຫຼາດແຮງງານຕາມ 10 ມາດຖານ ແລະ 50 ຕົວຊີ້ວັດ, ມຸ່ງເນັ້ນສ້າງວາລະສານຄົ້ນຄວ້າວິທະຍາສາດ ແລະ ພັດທະນາໂຄງລ່າງພື້ນຖານໃຫ້ທັນສະໄໝ ແລະ ສົ່ງເສີມບຸກຄະລາກອນໄປຍົກລະດັບຊັ້ນສູງ ແລະ ເປີດກວ້າງການຮ່ວມມືສາກົນຢ່າງມີປະສິດທິຜົນ.
 |
ໂອກາດດັ່ງກ່າວ, ທ່ານ ໄກສອນ ເພັງໂສພາ ກ່າວວ່າ: ໃນປັດຈຸບັນປັດໄຈສຳຄັນໃນການນຳພາປະເທດຊາດໃຫ້ຫຼຸດພົ້ນອອກຈາກຄວາມດ້ອຍພັດທະນາແມ່ນ "ຊັບພະຍາກອນມະນຸດ" ທີ່ມີຄຸນນະພາບເທົ່ານັ້ນ. ດ້ວຍເຫດນີ້, ກົມການສຶກສາຊັ້ນສູງ ຈຶ່ງໄດ້ວາງເປົ້າໝາຍລວມຢ່າງຈະແຈ້ງວ່າ ຮອດປີ 2030, ຕ້ອງຮັບປະກັນໃຫ້ພົນລະເມືອງລາວ ໄດ້ເຂົ້າຮຽນການສຶກສາຊັ້ນສູງທີ່ມີຄຸນນະພາບ, ໄດ້ຮັບໂອກາດໃນການສຶກສາຢ່າງຕໍ່ເນື່ອງ, ທົ່ວເຖິງ ແລະ ເທົ່າທຽມ. ສະນັ້ນ, ໃນຜົນສຳເລັດຄັ້ງນີ້ຂໍຕີລາຄາສູງ ແລະ ເນັ້ນໜັກເຖິງບົດບາດອັນສຳຄັນຂອງການສຶກສາພາກເອກະຊົນ ໃນການປະກອບສ່ວນພັດທະນາຊັບພະຍາກອນມະນຸດ ຢູ່ ສປປ ລາວ ໂດຍລວມ ແລະ ໂດຍສະເພາະສະຖາບັນຣັຕະນະບໍລິຫານທຸລະກິດ ໄດ້ຊ່ວຍແບ່ງເບົາພາລະຂອງລັດຖະບານ ໃນການຂະຫຍາຍໂອກາດການເຂົ້າເຖິງການສຶກສາຊັ້ນສູງໃຫ້ລູກ-ຫຼານປະຊາຊົນລາວ. ຊ່ວຍກະຕຸ້ນໃຫ້ເກີດການແຂ່ງຂັນໃນການຍົກລະດັບຄຸນນະພາບການສຶກສາ ສາມາດສ້າງ ແລະ ປະຕິບັດຫຼັກສູດທີ່ຕອບສະໜອງໄດ້ຢ່າງວ່ອງໄວຕໍ່ຄວາມຕ້ອງການຕົວຈິງຂອງຕະຫຼາດແຮງງານໃນຍຸກປັດຈຸບັນ.
ເພື່ອໃຫ້ບັນລຸວິໄສທັດທີ່ກ່າວມານັ້ນ, ຂໍໃຫ້ຄະນະອຳນວຍການ ແລະ ຄູ-ອາຈານ ສະຖາບັນຣັຕະນະ ບໍລິຫານທຸລະກິດ ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດວຽກງານຈຸດສຸມໃນການຍົກລະດັບຄຸນນະພາບຫຼັກສູດ ແລະ ການສິດສອນ: ຕ້ອງເອົາໃຈໃສ່ປັບປຸງຫຼັກສູດການຮຽນການສອນໃຫ້ສອດຄ່ອງກັບມາດຕະຖານຫຼັກສູດແຫ່ງຊາດ, ເພື່ອຮັບປະກັນວ່າ ນັກສຶກສາທີ່ຮຽນຈົບໄປ ຕ້ອງມີຄວາມຮູ້ຄວາມສາມາດ, ມີອາຊີບ ສອດຄ່ອງກັບຄວາມຕ້ອງການຂອງຕະຫຼາດແຮງງານ; ການສົ່ງເສີມການສຶກສາສາຍວິທະຍາສາດ ແລະ ເຕັກໂນໂລຊີ: ສະຖາບັນຣັຕະນະບໍລິຫານທຸລະກິດ ມີທ່າແຮງໂດຍກົງ. ສະນັ້ນ, ຕ້ອງຊຸກຍູ້ສົ່ງເສີມການສຶກສາໃນສາຍ STEM (ວິທະຍາສາດ, ເຕັກໂນໂລຊີ, ວິສະວະກຳສາດ ແລະ ຄະນິດສາດ) ໃຫ້ມີກຳລັງຂຶ້ນ ແລະ ການຮ່ວມມື ແລະ ການຫັນເປັນທັນສະໄໝ: ຕ້ອງເພີ່ມທະວີການຮ່ວມມືລະຫວ່າງສະຖາບັນການສຶກສາກັບພາກຸລະກິດທັງພາກລັດ ແລະ ເອກະຊົນ. ພ້ອມນັ້ນ, ຕ້ອງນຳໃຊ້ດີຈີຕອນໃນການຄຸ້ມຄອງບໍລິຫານ ແລະ ການຮຽນ-ການສອນ ໃຫ້ມີຄວາມທັນສະໄໝ.
ໃນພິທີ, ໄດ້ມອບທຶນການສຶກສາໃຫ້ຜູ້ທີ່ມີຜົນການຮຽນດີ ຮຽນເກັ່ງ ແລະ ມອບໃບຍ້ອງຍໍໃຫ້ນັກສຶກສາດີເດັ່ນ ດ້ານຮຽນ ແລະ ການເຄື່ອນໄຫວກິດຈະກຳນອກຫຼັກສູດ.
(ພາບ-ຂ່າວ: ໂດຍ ສົງການ ພັນແພງດີ)
ຄໍາເຫັນ