ການເກັບກ່ຽວມຽ້ນມັດເຂົ້ານາປີຂອງຊາວກະສິກອນ ເມືອງຄົງເຊໂດນ ແຂວງສາລະວັນ ມາຮອດປັດຈຸບັນສຳເລັດແລ້ວ 85%, ທ່ານ ບົວສອນ ຈັນດາວົງ ຮອງຫົວໜ້າຫ້ອງການກະສິກຳ ແລະ ສິ່ງແວດລ້ອມເມືອງຄົງເຊໂດນ ໄດ້ລາຍງານໃຫ້ຮູ້ວ່າ: ໃນທົ່ວເມືອງ ມີເນື້ອທີ່ທັງໝົດ 16,854 ເຮັກຕາ, ເນື້ອທີ່ສາມາດເກັບກ່ຽວໄດ້ຕົວຈິງ 12,456 ເຮັກຕາ, ຜົນຜະລິດສະເລ່ຍໄດ້ 3,7 ໂຕນຕໍ່ເຮັກຕາ, ທຽບໃສ່ປີຜ່ານມາ ແມ່ນຫຼຸດຄາດໝາຍ ເນື່ອງຈາກມີຫຼາຍສາເຫດ ເປັນຕົ້ນ: ເກີດໄພພິບັດນໍ້າຖ້ວມ ໃນໄລຍະເຂົ້າທີ່ກຳລັງເຕີບ, ໄລຍະເກັບກ່ຽວ. ນອກຈາກນັ້ນ, ຍັງມີສັດຕູພືດແມງໄມ້ທໍາລາຍ.
ທ່ານ ບົວສອນ ຈັນດາວົງ ຍັງໃຫ້ຮູ້ຕື່ມວ່າ: ຄຽງຄູ່ກັບການເກັບເຂົ້ານາປີ, ຊາວກະສິກອນບາງບ່ອນທີ່ມີເງື່ອນໄຂ ຍັງກະກຽມໃສ່ການຜະລິດລະດູແລ້ງ ໃນເຂດຊົນປະທານທົ່ວເມືອງ ມີ 37 ໂຄງການ, ເນື້ອທີ່ຕາມແຜນການປູກເຂົ້າແມ່ນ 5,207 ເຮັກຕາ, ປູກພືດນອກເຂດຊົນລະປະທານ 1,717 ເຮັກຕາ, ມີ 9,494 ຄອບຄົວ, ປູກພືດໃນເຂດຊົນລະປະທານ 230 ເຮັກຕາ, ມີ 831 ເຮັກຕາ ສ່ວນຫຼາຍ ແມ່ນປະເພດໝາກຖົ່ວ, ໝາກແຕງ, ໝາກກະໂພດ, ໝາກເຜັດ, ຜັກກາດ ແລະ ພືດອື່ນໆໂດຍສະເພາະປູກຕາມແມ່ນ້ຳເຊໂດນ.
(ຂ່າວ: ຄຳສອນ ແກ້ວບຸນທະວົງ)
ຄໍາເຫັນ