 |
ສຳລັບການຈັດຕັ້ງປະຕິບັດວຽກ ເປັນຕົ້ນ ເຈົ້າຂອງໂຄງການແມ່ນ ກົມຂົວທາງ, ກະຊວງໂຍທາທິການ ແລະ ຂົນສົ່ງ, ທີ່ປຶກສາໂຄງການ ແມ່ນບໍລິສັດ Asian Engineering Consultants (ໄທ) ຮ່ວມກັບ ບໍລິສັດ Lao Consulting Group (ລາວ), ຜູ້ຮັບເໝົາກໍ່ສ້າງ: ສັນຍາ 1 ແມ່ນປັບປຸງທາງເລກ 12 ແຕ່ ເມືອງທ່າແຂກ ຫາ ເມືອງຍົມມະລາດ ແລະ ທາງເວັ້ນຕົວເມືອງທ່າແຂກ 4 ກິໂລແມັດ ລວມຄວາມຍາວທັງໝົດ 61.5 ກິໂລແມັດ. ສຳລັບຄວາມຄືບໜ້າການຈັດຕັ້ງປະຕິບັດວຽກ ພາຍຫຼັງໄດ້ເຊັນສັນຍາຮັບເໝົາກໍ່ສ້າງ ກັບບໍລິສັດຮັບເໝົາ 2 ສັນຍາ ໃນວັນທີ 22 ພຶດສະພາ 2025 ຜ່ານມາ, ໜ້າວຽກທີ່ຈັດຕັ້ງປະຕິບັດໄດ້ ແມ່ນກະກຽມດໍາເນີນວຽກຍົກຍ້າຍ ແລະ ຊົດເຊີຍ ສິ່ງກີດຂວາງຕ່າງໆອອກຈາກແລວການກໍ່ສ້າງ, ກໍ່ສ້າງ ສໍານັກງານຫ້ອງການ, ຫ້ອງທົດລອງ ແລະ ທີ່ພັກເຊົາ ຂອງຄະນະຮັບຜິດຊອງໂຄງການ ແລະ ທີ່ປຶກສາ. ສ່ວນສັນຍາ 1 ແລະ ສັນຍາ 2 ໄດ້ດໍາເນີນວຽກສ້ອມແປງໜ້າທາງເກົ່າ ເພື່ອແກ້ໄຂການສັນຈອນ, ຊຶ່ງຜູ້ຮັບເໝົາ ໄດ້ຜະລິດຫີນ ເພື່ອກໍ່ສ້າງຊັ້ນເສື່ອທາງ, ຫີນສ່ວນປະສົມເບຕົງ ພ້ອມທັງໄດ້ເລີ່ມດຳເນີິນວຽກ ບຸກເບີກ ແລະ ອະນາໄມ ຕາມຂອບເຂດການກໍ່ສ້າງທາງ. ສະຫຼຸບຄວາມຄືບໜ້າການຈັດຕັ້ງປະຕິບັດວຽກ ຂອງໂຄງການ ສະເລ່ຍໄດ້ທັງໝົດ 0.53%, ຕາມແຜນ ການແມ່ນ 1.15%, ຫຼຸດແຜນການທີ່ກໍານົດໄວ້ 0.62%.
ໂອກາດດັ່ງກ່າວ, ທ່ານ ວັນໄຊ ພອງສະຫວັນ ໄດ້ກ່າວວ່າ: ຖ້າຫາກໂຄງການສໍາເລັດຕາມແຜນການ ຈະເປັນເງື່ອນໄຂທີ່ສໍາຄັນ ເຮັດໃຫ້ການຂົນສົ່ງຂອງແຂວງ ກໍຄືພາກພື້ນມີຄວາມສະດວກໂລ່ງລ່ຽນ, ເປັນແຮງກະຕຸ້ນເຮັດໃຫ້ເສດຖະກິດຂອງບັນດາເມືອງ ຕາມແລວທາງມີການຂະຫຍາຍຕົວເພີ່ມຂຶ້ນ, ດຶງດູດນັກທ່ອງທ່ຽວ. ພ້ອມນີ້, ຍັງໄດ້ສະເໜີເພີ່ມຕື່ມ ໂດຍທີ່ເຫັນວ່າ ແຂວງ ແລະ ກະຊວງ ຍທຂ ຕ້ອງໄດ້ເອົາໃຈໃສ່ຮ່ວມກັນ ເພື່ອເຮັດໃຫ້ເສັ້ນທາງດັ່ງກ່າວ ສໍາເລັດຕາມແຜນການທີ່ວາງໄວ້ ແລະ ເກີດຜົນປະໂຫຍດສູງສຸດ.
 |
ທ່ານ ລັດຖະມົນຕີກະຊວງ ຍທຂ ໄດ້ມີຄໍາເຫັນຊີ້ນໍາ ໃຫ້ເຈົ້າຂອງໂຄງການເອົາໃຈໃສ່ ຈັດຕັ້ງປະຕິບັດວຽກງານໃຫ້ມີຜົນສໍາເລັດຕາມແຜນການ. ພ້ອມດຽວກັນນັ້ນ, ກໍໃຫ້ກວດກາຄືນບາງໜ້າວຽກ ບາງໄລຍະ ທີ່ເປັນເຂດຊຸມຊົນ ໃຫ້ເອົາໃຈໃສ່ຮັບປະກັນການກໍ່ສ້າງ ໃຫ້ມີຄວາມປອດໄພ, ເອົາໃຈໃສ່ ບັນຫາສະພາບແວດລ້ອມ ບໍ່ໃຫ້ມີຜົນກະທົບຕໍ່ການຮຽນ-ການສອນ ໃນເຂດແລວທາງ ພ້ອມທັງເນັ້ນໃຫ້ຄະນະກົມທີ່ຕິດຕາມ ເອົາໃຈໃສ່ສົມທົບກັບເຈົ້າຂອງໂຄງການ ຕິດຕາມກວດກາ ເພີ່ມຕື່ມ ລາຍລະອຽດຂອງໂຄງການ, ວັດສະດຸທີ່ນໍາມາກໍ່ສ້າງຕ້ອງໃຫ້ມີມາດຕະຖານ ທັງນີ້ກໍເພື່ອເຮັດໃຫ້ການຈັດຕັ້ງປະຕິບັດໂຄງການດໍາເນີນໄປຕາມແຜນການ.
ຂ່າວ: ແຂວງຄຳມ່ວນ
ຄໍາເຫັນ