 |
ສະຫາຍ ພັອ ຄຳຫຼ້າ ບົວພະຄຸນ ຮອງຫົວໜ້າກົມຕຳຫຼວດຄຸມຂັງ-ດັດສ້າງ ໄດ້ຜ່ານບົດສະຫຼຸບວ່າ: ໃນໄລຍະ 1 ປີຜ່ານມາ, ຄະນະພັກ-ຄະນະບັນຊາແຕ່ລະຂັ້ນ ໄດ້ເອົາໃຈໃສ່ນຳພາ-ຊີ້ນຳຢ່າງໃກ້ຊິດ ໃນການປັບປຸງກຳລັງໃຫ້ມີຄວາມໜັກແໜ້ນເຂັ້ມແຂງ, ປັດຈຸບັນທົ່ວປະເທດມີກຳລັງທັງໝົດ 3 ພັນກວ່າສະຫາຍ; ໃນນີ້, ໄດ້ສຸມໃສ່ຍົກລະດັບວິຊາສະເພາະໃຫ້ພະນັກງານທັງພາຍໃນ ແລະ ຕ່າງປະເທດໄດ້ 102 ສະຫາຍ, ພ້ອມທັງປະຕິບັດນະໂຍບາຍຍ້ອງຍໍ ແລະ ເລື່ອນຊັ້ນໃຫ້ຜູ້ທີ່ມີຜົນງານດີເດັ່ນຢ່າງສົມກຽດ. ຄຽງຄູ່ກັບການກໍ່ສ້າງກຳລັງ ໄດ້ສຸມໃສ່ວຽກງານວິຊາສະເພາະຢ່າງຕັ້ງໜ້າ ສາມາດຮັບປະກັນຄວາມສະຫງົບປອດໄພພາຍໃນຄ້າຍໄດ້ 100%.
ປັດຈຸບັນ, ມີຜູ້ຖືກຄຸມຂັງທົ່ວປະເທດເກືອບ 40 ພັນຄົນ ຊຶ່ງຄະນະບັນຊາໄດ້ເອົາໃຈໃສ່ຄົ້ນຄວ້າປະຕິບັດນະໂຍບາຍອະໄພຍະໂທດ-ຜ່ອນໂທດໃຫ້ນັກໂທດທີ່ມີຄວາມກ້າວໜ້າໃນວັນຊາດທີ 2 ທັນວາ ຈຳນວນ 2,858 ຄົນ ແລະ ປ່ອຍຕົວຜູ້ພົ້ນໂທດ 670 ຄົນ. ນອກຈາກນັ້ນ, ຍັງໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ ໂດຍສາມາດອົບຮົມເປົ້າໝາຍຕ່າງໆໄດ້ຫຼາຍກວ່າ 57,000 ເທື່ອຄົນ, ພ້ອມທັງຊຸກຍູ້ການຝຶກວິຊາຊີບ ແລະ ການອອກແຮງງານຜະລິດໃນຂະແໜງຫັດຖະກຳ, ກະສິກຳ ແລະ ບໍລິການ ຊຶ່ງມີນັກໂທດເຂົ້າຮ່ວມ 15,785 ຄົນ ສາມາດສ້າງລາຍຮັບເພື່ອມາປັບປຸງຊີວິດການເປັນຢູ່ ແລະ ບູລະນະກົມກອງ.
ພິເສດແມ່ນໄດ້ເອົາໃຈໃສ່ຊີ້ນຳການພັດທະນາພື້ນຖານໂຄງລ່າງ, ສາມາດສຳເລັດ 7 ໂຄງການໃຫຍ່ ມູນຄ່າກວ່າ 114 ຕື້ກີບ ເປັນຕົ້ນ ການສ້າງເຮືອນນອນ, ໂຮງໝໍຄ້າຍ ແລະ ລະບົບເຕັກນິກຢູ່ຄ້າຍຄຸມຂັງແຂວງຈຳປາສັກ, ສະຫວັນນະເຂດ ແລະ ຫຼັກ 62 ເພື່ອແກ້ໄຂບັນຫາຄວາມແອອັດ ແລະ ຍົກລະດັບຄຸນນະພາບຊີວິດຂອງຜູ້ຖືກຄຸມຂັງໃຫ້ດີຂຶ້ນກວ່າເກົ່າ.
 |
ສຳລັບທິດທາງປີ 2026 ຈະສືບຕໍ່ສຸມໃສ່ປັບປຸງກົງຈັກການຈັດຕັ້ງໃຫ້ເຂັ້ມແຂງ, ກໍ່ສ້າງພະນັກງານໃຫ້ມີຄວາມຮູ້ຄວາມສາມາດ ແລະ ມີລະບຽບວິໄນເຂັ້ມງວດ, ເພີ່ມທະວີການປ້ອງກັນເວນຍາມ 24 ຊົ່ວໂມງ ເພື່ອຮັບປະກັນຄວາມສະຫງົບຮຽບຮ້ອຍ ແລະ ສະກັດກັ້ນທຸກປະກົດການຫຍໍ້ທໍ້ພາຍໃນຄ້າຍ. ພ້ອມກັນນັ້ນ, ຈະເລັ່ງຫັນການຄຸ້ມຄອງສຳນວນເອກະສານນັກໂທດເຂົ້າສູ່ລະບົບດີຈີຕອນທີ່ທັນສະໄໝ, ສືບຕໍ່ຊຸກຍູ້ການຝຶກວິຊາຊີບໃຫ້ກາຍເປັນຂະບວນການຟົດຟື້ນ ເພື່ອໃຫ້ນັກໂທດມີອາຊີບທີ່ໝັ້ນຄົງພາຍຫຼັງພົ້ນໂທດອອກໄປສູ່ສັງຄົມ, ເອົາໃຈໃສ່ປະຕິບັດນະໂຍບາຍຕ່າງໆ ໃຫ້ຖືກຕ້ອງຕາມລະບຽບກົດໝາຍ ແລະ ສືບຕໍ່ພັດທະນາພື້ນຖານໂຄງລ່າງຄ້າຍຄຸມຂັງໃຫ້ມີຄວາມພ້ອມ ເພື່ອແກ້ໄຂບັນຫາຄວາມແອອັດ ແລະ ຮັບປະກັນໃຫ້ວຽກງານວິຊາສະເພາະມີປະສິດທິຜົນສູງສຸດ.
(ຂ່າວ: ແກ້ວ)
ຄໍາເຫັນ