ຫົວໜ້າກົມຮ່ວມມືສາກົນ ກະຊວງຍຸຕິທໍາ, ພ້ອມດ້ວຍຜູ້ຕາງໜ້າຈາກອົງການໄອຍະການປະຊາຊົນສູງສຸດ ແລະ ກະຊວງການຕ່າງປະເທດ ໄດ້ເດີນທາງເຂົ້າຮ່ວມກອງປະຊຸມວິຊາການ ກ່ຽວກັບສົນທິສັນຍາອາຊຽນ ວ່າດ້ວຍການສົ່ງຜູ້ຮ້າຍຂ້າມແດນ ຄັ້ງທີ 11; ກອງປະຊຸມກ່ຽວກັບການສ້າງຄວາມກົມກຽວທາງດ້ານກົດໝາຍການຄ້າອາຊຽນ ຄັ້ງທີ 13 ແລະ ກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23 ທີ່ປະເທດສິງກະໂປ.
ກອງປະຊຸມຄັ້ງນີ້, ໄດ້ຮັບກຽດເປັນເຈົ້າພາບໂດຍ ກະຊວງກົດໝາຍ ປະເທດສິງກະໂປ ອີງຕາມຮອບວຽນຕົວອັກສອນ ແລະ ກົນໄກການຜັດປ່ຽນເປັນເຈົ້າພາບຂອງອາຊຽນ ຊິຶ່ງມີຄະນະຜູ້ແທນເຂົ້າຮ່ວມກອງປະຊຸມຈາກເຈົ້າໜ້າທີ່ອາວຸໂສກົດໝາຍ ຈາກປະເທດສະມາຊິກອາຊຽນ, ກອງເລຂາອາຊຽນ, ປະເທດຕີມໍແລັດສະເຕ (ຜູ້ສັງເກດການ) ລວມທັງຜູ້ຕາງໜ້າຈາກກະຊວງຍຸຕິທໍາ ປະເທດຍີ່ປຸ່ນ ແລະ ອົງການຈັດຕັ້ງສາກົນ (World Justice Project, HCCH, UNCITRAL, UNIDROIT ແລະ INSOL International).
ກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23 ໄດ້ພິຈາລະນາ, ຮັບຟັງ ແລະ ປຶກສາຫາລື ຫຼາຍຫົວຂໍ້ສໍາຄັນຄື: ການຮ່າງສົນທິສັນຍາອາຊຽນ ວ່າດ້ວຍການສົ່ງຜູ້ຮ້າຍຂ້າມແດນ, ກອງປະຊຸມເປີດກວ້າງທາງດ້ານກົດໝາຍອາຊຽນ, ການຢ້ຽມຢາມ ແລະ ແລກປ່ຽນບົດຮຽນທາງດ້ານກົດໝາຍ ແລະ ຍຸຕິທຳ ຂອງປະເທດສະມາຊິກອາຊຽນ, ໂຄງການເຈົ້າໜ້າທີ່ກົດໝາຍອາຊຽນ (AGLOP), ການສ້າງຄວາມເຂັ້ມແຂງໃຫ້ແກ່ຕາໜ່າງຂໍ້ມູນຂ່າວສານ ຂອງປະເທດສະມາຊິກອາຊຽນ (ALIA), ປຶ້ມສັງລວມຂໍ້ມູນອົງການຈັດຕັ້ງກົດໝາຍອາຊຽນ (ASEAN Government Law Directory), ການສ້າງຄວາມກົມກຽວທາງດ້ານກົດໝາຍການຄ້າອາຊຽນ, ການເປີດເສລີການບໍລິການທາງດ້ານກົດໝາຍ, ການໂອນຕົວນັກໂທດ ແລະ ການໂອນຕົວຜູ້ຖືກຕັດສິນລົງໂທດ, ການປ້ອງກັນອາຊະຍາກຳ ແລະ ຄວາມຍຸຕິທຳທາງອາຍາ, ການຮ່ວມມືທາງດ້ານວຽກງານຕຸລາການ, ການເສີມສ້າງຄວາມເຂັ້ມແຂງ ກ່ຽວກັບການຊ່ວຍເຫຼືອຊຶ່ງກັນ ແລະ ກັນທາງດ້ານກົດໝາຍ ໃນເລື່ອງແພ່ງ ແລະ ການຄ້າ, ການປະຕິຮູບວຽກງານອະນຸຍາໂຕຕຸລາການການຄ້າລະຫວ່າງປະເທດ (ຂໍ້ສະເໜີ
ໃໝ່).
ສໍາລັບການຮ່ວມມືລະຫວ່າງອາຊຽນກັບພາຍນອກເຈົ້າໜ້າທີ່ອາວຸໂສກົດໝາຍອາຊຽນ ກໍໄດ້ຮັບຟັງການສະເໜີ ແລກປ່ຽນບົດຮຽນຈາກອົງການ HCCH, UNCITRAL ແລະ UNIDROID ກ່ຽວກັບຄວາມສໍາຄັນໃນການເຂົ້າເປັນສະມາຊິກ ແລະ ພາຄີຂອງສົນທິສັນຍາ ເພື່ອເປັນບ່ອນອີງໃຫ້ແກ່ປະເທດສະມາຊິກພິຈາລະນາການເຂົ້າເປັນສະມາຊິກ ແລະ ພາຄີໃນອະນາຄົດ; ວຽກງານ ແລະ ບົດຮຽນທີ່ດີຈາກອົງການຍຸຕິທຳໂລກ (World Justice Project) ແລະ INSOL International ເພື່ອເປັນທິດທາງໃຫ້ແກ່ປະເທດສະມາຊິກ ໃນການພິຈາລະນາການຮ່ວມມືສອງຝ່າຍ ແລະ ການຮ່ວມມືຫຼາຍຝ່າຍ; ການສະເໜີຈາກຜູ້ຕາງໜ້າ ກະຊວງຍຸຕິທໍາຍີ່ປຸ່ນ ກ່ຽວກັບການຜັນຂະຫຍາຍ ແລະ ຈັດຕັ້ງປະຕິບັດແຜນປະຕິບັດງານອາຊຽນ-ຍີ່ປຸ່ນ ສໍາລັບໄຕມາດທີ 4 ຂອງປີ 2024 ແລະ ແຜນກິດຈະກຳປີ 2025 ໂດຍສະເພາະ ການສະເໜີຈັດກອງປະຂຸມລັດຖະມົນຕີຍຸຕິທໍາ ອາຊຽນ-ຍີ່ປຸ່ນ ໃນປີ 2025. ຜ່ານການປຶກສາຫາລື ໃນກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23, ປະເທດສະມາຊິກສາມາດຍາດມາໄດ້ຜົນສໍາເລັດຫຼາຍດ້ານ ໂດຍສະເພາະຜ່ານການລາຍງານຂອງປະເທດສະມາຊິກກ່ຽວກັບຄວາມຄືບໜ້າຂອງການຜັນຂະຫຍາຍ ແລະ ຈັດຕັ້ງປະຕິບັດບົດລາຍງານກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 21 ແລະ 22 ລວມທັງຖະແຫຼງການຮ່ວມລະຫວ່າງລັດ ຖະມົນຕີກົດໝາຍອາຊຽນ ຄັ້ງທີ 12. ພ້ອມກັນນັ້ນ, ປະເທດສະມາຊິກກໍສາມາດຮັບຮອງເອົາເນື້ອໃນພື້ນຖານຂອງບົດລາຍງານ ກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23 ເພື່ອສະເໜີການຮັບຮອງໃນກອງປະຊຸມລັດຖະມົນຕີກົດໝາຍອາຊຽນ ຄັ້ງທີ 13 ທີ່ ປະເທດຟີລິບປິນ ຈະເປັນເຈົ້າພາບໃນປີ 2025.
ສຳລັບເຈົ້າໜ້າທີ່ອາວຸໂສກົດໝາຍອາຊຽນ ສປປ ລາວ ໃນການນໍາເອົາຜົນສຳເລັດດັ່ງກ່າວມາຜັນຂະຫຍາຍ ແລະ ຈັດຕັ້ງປະຕິບັດພາຍໃນ, ກົມຮ່ວມມືສາກົນ ໃນນາມຈຸດປະສານງານວຽກງານອາຊຽນ ຂອງກະຊວງຍຸຕິທໍາ ຈະປະສານສົມທົບກັບບັນດາກົມພາຍໃນກະຊວງຍຸຕິທໍາ, ພ້ອມທັງຂະແໜງການທີ່ກ່ຽວຂ້ອງ ເພື່ອຈັດກອງປະຊຸມເຜີຍແຜ່ຜົນສໍາເລັດ ຈາກການເຂົ້າຮ່ວມກອງປະຊຸມເຈົ້າໜ້າທີ່ອາວຸໂສກົດໝາຍອາຊຽນ ຄັ້ງທີ 23 ໃນເດືອນພະຈິກ 2024 ເພື່ອນໍາໃຊ້ເວທີດັ່ງກ່າວໃນການແລກປ່ຽນບົດຮຽນ ແລະ ພິຈາລະນາການກຳນົດການຮ່ວມມືທາງດ້ານກົດໝາຍ ແລະ ຍຸຕິທໍາ ໃນອະນາຄົດບົນພື້ນຖານຫົວຂໍ້ ແລະ ບົດລາຍງານທີ່ຖືກຮັບຮອງໂດຍປະເທດສະມາຊິກ.
(ຂ່າວ-ພາບ: ວິລະກອນ ສົມຊະນິດ)
ຄໍາເຫັນ