 |
ກອງປະຊຸມຄັ້ງນີ້, ຈັດຂຶ້ນໃນວັນທີ 31 ຕຸລານີ້ ທີ່ ສູນການຮ່ວມມືສາກົນ ແລະ ການຝຶກອົບຮົມ, ນະຄອນຫຼວງວຽງຈັນ ໂດຍການເຂົ້າຮ່ວມເປັນປະທານຂອງ ທ່ານ ຈັນທະບູນ ສຸກອາລຸນ ຮອງລັດຖະມົນຕີກະຊວງອຸດສາຫະກໍາການຄ້າ (ອຄ); ມີບັນດາທ່ານການນໍາຂັ້ນຕ່າງໆຈາກກະຊວງກະສິກຳ ແລະ ສິ່ງແວດລ້ອມ, ກະຊວງອຸດສາຫະກໍາ ແລະ ການຄ້າ, ສຄອຊ, ສະມາຄົມທຸລະກິດກະສິກໍາລາວ, ຜູ້ຕາງໜ້າຈາກ ທະນາຄານພັດທະນາອາຊີ, ອົງການຈັດຕັ້ງສາກົນ, ສະພາການຄ້າ ແລະ ອຸດສາຫະກໍາ 18 ແຂວງ, ສະມາຄົມທຸລະກິດ, ຫົວໜ່ວຍທຸລະກິດກະສິກໍາ ແລະ ພາກສ່ວນອື່ນໆ ທີ່ຕິດພັນກັບຕອງໂສ້ທຸລະກິດກະສິກໍາ.
ທ່ານ ອຸເດດ ສຸວັນນະວົງ ປະທານ ສຄອຊ ກ່າວເປີດກອງປະຊຸມວ່າ: ປັດຈຸບັນ, ພວກເຮົາໄດ້ຫັນປ່ຽນກາຍເປັນປະເທດ ທີ່ມີການເຊື່ອມໂຍງທາງດ້ານພູມສັນຖານ ຢ່າງແທ້ຈິງ ໂດຍມີເສັ້ນທາງລົດໄຟ ເປັນເສັ້ນທາງໂດຍກົງໄປສູ່ຕະຫຼາດກະສິກໍາ ແລະ ອາຫານທີ່ສາມາດເຂົ້າເຖິງຄູ່ຄ້າໄດ້ຢ່າງວ່ອງໄວ ມີການເຊື່ອມໂຍງກັບຕະຫຼາດຂະໜາດໃຫຍ່ ເຊັ່ນ: ຕະຫຼາດຈີນ ແລະ ຕະຫຼາດພາກພື້ນອາຊຽນ ຊຶ່ງໄດ້ເປີດໂອກາດໃໝ່ ໂດຍສະເພາະຊຸກຍູ້ສົ່ງເສີມການຜະລິດກະສິກໍາພາຍໃນ, ນອກຈາກເປັນການທົດແທນການນໍາເຂົ້າ ຍັງເປັນການຜະລິດເພື່ອສົ່ງອອກ; ພ້ອມດຽວກັນນັ້ນ, ກໍເພື່ອສ້າງຄວາມເຂັ້ມແຂງໃຫ້ຜູ້ປະກອບການ ຫົວໜ່ວຍທຸລະກິດ ໃຫ້ມີການຂະຫຍາຍຕົວແບບຍືນຍົງ, ສຄອຊ ແລະ ສະມາຄົມທຸລະກິດກະສິກໍາລາວ ຈຶ່ງໄດ້ຈັດກອງປະຊຸມສຳມະນາພິເສດນີ້ຂຶ້ນ.
ກອງປະຊຸມໄດ້ຮັບຟັງການບັນຍາຍຫຼາຍຫົວຂໍ້ທີ່ສໍາຄັນ ຄື: ໂອກາດເຕີບໂຕທຸລະກິດກະສິກໍາລາວ ໂດຍ ທ່ານ ບຸນເລີດ ຫຼວງປະເສີດ ຮອງປະທານ ສຄອຊ, ສິ່ງທ້າທາຍຂອງທຸລະກິດກະສິກໍາລາວ ເພື່ອເຂົ້າເຖິງຕະຫຼາດສາກົນ ກະສິກໍາ ແລະ ອາຫານ ໂດຍ ທ່ານ ບຸນທ່ຽງ ລັດຕະນະວົງ ປະທານສະມາຄົມທຸລະກິດກະສິກໍາລາວ, ການຂັບເຄື່ອນການເຂົ້າເຖິງການເງິນ ແລະ ກາລະໂອກາດທາງທຸລະກິດ ໃຫ້ທຸລະກິດກະສິກໍາລາວ ຜ່ານໂຄງການລະບົບອາຫານກະສິກໍາແບບຍືນຍົງ ແຫ່ງ ສປປ ລາວ ໂດຍ ທ່ານ ເພັດສຸລະພົນ ຄຸລະທິດາ ຜູ້ຮັບຜິດຊອບໂຄງການດ້ານກະສິກໍາ ທະນາຄານພັດທະນາອາຊີ ປະຈໍາ ສປປ ລາວ, ການນໍາສະເໜີໂຄງການຈຸດສຸມຜະລິດເປັນສິນຄ້າ ທີ່ຕະຫຼາດຮອງຮັບ ໂດຍ ທ່ານ ຂັນທອງ ສີປະເສີດ ຮອງປະທານສະມາຄົມທຸລະກິດດະສິກໍາລາວ. ນອກນີ້, ກໍໄດ້ຈັດເວທີເສວະນາໃນຫົວຂໍ້: ປຶກສາຫາລືເພື່ອແກ້ໄຂຂໍ້ຄົງຄ້າງ ແລະ ສິ່ງທ້າທາຍຕໍ່ອຸປະສັກທຸລະກິດກະສິກໍາລາວ. ພ້ອມນີ້, ມີການນໍາສະເໜີ ທຶນສົ່ງເສີມການຜະລິດສິນຄ້າ ເພື່ອຫຼຸດຜ່ອນການນໍາເຂົ້າ ໂດຍ ທ່ານ ຈັນທະສອນ ເພັດວິໄຊ ວ່າການແທນຫົວໜ້າພະແນກບໍລິຫານ ແລະ ຄຸ້ມຄອງກອງທຶນສົ່ງເສີມການຜະລິດສິນຄ້າລາວ (ກສລ) ກົມສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ກະຊວງ ອຄ.
 |
ກອງປະຊຸມຍັງໄດ້ຮັບຟັງ ການໂອ້ລົມຂອງ ທ່ານ ຈັນທະບູນ ສຸກອາລຸນ ຊຶ່ງໄດ້ເນັ້ນຢໍ້າເຖິງຄວາມເຂົ້າໃຈຂອງພາກລັດ ຕໍ່ກັບການສ້າງກະສິກໍາທີ່ເຂັ້ມແຂງ ກໍຄືເປົ້າໝາຍການຜະລິດຕາມຄາດໝາຍ, ແຕ່ຕະຫຼາດ ແລະ ການປຸງແຕ່ງ ຄືເສັ້ນເລືອດໃຫຍ່ທີ່ສູບສີດໃຫ້ລະບົບຕ່ອງໂສ້, ຄວາມສໍາເລັດຂອງທຸລະກິດກະສິກໍາ ຈະເປັນປັດໄຈຕັດສິນໃນການບັນລຸເປົ້າໝາຍ “ເສດຖະກິດເອກະລາດເປັນເຈົ້າຕົນເອງ” ຂອງພັກ. ດັ່ງນັ້ນ, ກະຊວງ ອຄ ຈຶ່ງໃຫ້ຄໍາໝັ້້ນສັນຍາ ແລະ ຈະໃຫ້ທິດຊີ້ນໍາ 3 ດ້ານຫຼັກ ທີ່ຕອບສະໜອງຕໍ່ທຸກບັນຫາ ທີ່ໄດ້ຍົກຂຶ້ນມາຄື: ທິດທາງທີ 1 ຫັນວັດຖຸດິບສູ່ການປຸງແຕ່ງເພື່ອສ້າງມູນຄ່າ, ທິດທາງທີ 2 ປົດລ໊ອກແຫຼ່ງທຶນດ້ວຍ ກສລ ແລະ ການຄໍ້າປະກັນແບບໃໝ່ ແລະ ທິດທາງທີ 3 ປະຕິຮູບລະບຽບການ ແລະ ປົກປ້ອງຕະຫຼາດພາຍໃນ.
ພ້ອມນີ້, ກອງປະຊຸມຍັງໄດ້ຈັດພິທີ ເຊັນ “MOU ຮ່ວມກັນສຶກສາ ເພື່ອອໍານວຍຄວາມສະດວກໃຫ້ແກ່ການສະໜອງທຶນ ແບບບໍ່ມີຂໍ້ຜູກມັດ” ລະຫວ່າງ ສຄອຊ, ສະມາຄົມທຸລະກິດກະສິກໍາລາວ ແລະ ກສລ.
(ຂ່າວ-ພາບ: ສຸກສະຫວັນ)
ຄໍາເຫັນ